1 Tésalônika

5 Ndi inyu mangéda ni bikék, a lôk kéé, ni gwé bé ngôñ le ba tilna bé jam jo ki jo. 2 Inyule bébomede ni nyi yaga loñge le hilo hi Yéhôva* hi nlo toi kiki mut wip a nlo juu. 3 To imbe ngéda bôt b’a kal le: “Nsañ u yé, to woñi u ta ha bé!” Ha nyen tjiba y’a kwél bo kunda yada, nlélém kiki nkôôga u mpuhe muda jém; ba ga pei yaga bé. 4 Ndi, a lôk kéé, bé ni ta bé ikété jiibe le hilo hini hi puhe bé kiki bôt ba wip,* 5 inyule bébobasôna ni yé bon ba mapubi ni bon ba njamuha. Di ta bé bôt ba juu, to ba jiibe.

6 Jon, di ke bañ ’ilo kiki bana bape, ndi di yén péé, di hiômôk ni pék. 7 Inyule i bôt ba nke ’ilo, ba nke ’ilo juu; Yak i bôt ba nhiôô, ba nhiôô juu. 8 Ndi bés ba di yé bôt ba njamuha, di hiômôk ni pék, di haba ben tôl i hémle ni i gwéha, di haba ki botñem i tohi kiki kôñgô, 9 inyule Nyambe a bi téé bé bés inyu hiun, ndi le di kôhna tohi ni njel Nwet wés Yésu Kristô. 10 A bi wo inyu yés, le to di nyén péé, to di nke ’ilo,* di nlama niñ lôñni nye. 11 Jon kena ni bisu i tina makénd* bé ni bé, ni i lédhana bé ni bé, ndik kiki ni yé yaga i boñ.

12 Nano di mbat bé, a lôk kéé, le ni ti bôt ba ntumbba ni nson ikété nan lipém, ba ba ñéga bé i Nwet, ba tinak bé maéba; 13 tina ki bo lipém iloo hihéga ikété gwéha inyu nson wap. Niña ikété nsañ bé ni bé. 14 Ndi di nti yak bé makénd, a lôk kéé, le ni béhe bôt* ba nke nkoda, ni tinak bôt ba gwé nduña keñi* hogbe, ni nidik bôt ba ntomb, ni ban-ga wongut inyu bôt bobasôna. 15 Yoña yihe le mut nye ki nye a timbhe bañ béba inyu béba, ndi kena ni bisu i bôñlana bé ni bé mam ma yé loñge ngéda yosôna, ni boñok yak hala inyu bôt bobasôna.

16 Kona maséé ngéda yosôna. 17 Soohana hiki ngéda. 18 Tina mayéga inyu mam momasôna. Hala nyen a yé sômbôl i Nyambe inyu nan ikété adna ni Kristô Yésu. 19 Ni lém bañ hié hi mbuu u Nyambe. 20 Ni yan bañ mbañ. 21 Wana mam momasôna; téñbana ni mam ma yé malam. 22 Tjéla mintén mi mam mabe nwominsôna.

23 Nyambe nu nsañ nyemede a téé bé bapubhaga i nya i yôni. A lôk kéé, mbuu ni niñ* lôñni nyuu nan bi ba mbôô ikété manjel momasôna, bi yégle ki ngi nsohi ngéda Nwet wés Yésu Kristô a mba ha. 24 Nu a yé i sébél bé a yé maliga, a ga boñ toi hala.

25 A lôk kéé, kena ni bisu i soohe inyu yés.

26 Yégnana lôk kéé yosôna, ni sohok bo mamañ i nya i yé pubhaga.

27 Me nyégsa bé i jôl li Nwet le ni éñél lôk kéé yosôna i kaat ini.

28 Konangoo i mbuma ñañ i Nwet wés Yésu Kristô i ba lôñni bé.