Kôlôsé

2 Inyule me nsômbôl le ni yi lelaa me njo sañ keñi inyu nan ni inyu bôt ba yé i Laôdikéa, Yak inyu bôt bobasôna ba yé ngi tehe me.* 2 Hala a yé inyu boñ le miñem nwap mi kôhna hogbe, ba bak ba édi loñge ikété gwéha, ba ban-ga ki lingwañ jolisôna li li nlôl i bana nogna ilam i i nset bé, inyu boñ le ba kôhna bañga yi i jimb lipubi li Nyambe, hala wee Kristô. 3 I nyeni nyen masôô ma nkus momasôna ma pék ni ma yi ma sôlne. 4 Me yé i kal hala le ndi mut nye ki nye a lôk bañ bé ni bipôdôl bi bi nlop bôt. 5 To hala kiki memede me ta bé lôñni bé, ndi me yé lôñni bé ni mahoñol,* me konok maséé i tehe le ni nkena mam manan ikété oda, ni ban-ga hémle i ngui inyu Kristô.

6 Jon, ndik kiki ni bi neebe Nwet le Kristô Yésu, hala nyen kena ni bisu i hiôm ikété adna ni nye, 7 ôma ki minkañ, ni holok ikété adna lôñni nye, ni bak ni umi siñ siñ ikété hémle ndik kiki ba bi niiga bé, ni tinak mayéga i nya i nloo hihéga.

8 Yoña yihe le mut to wada a yilha bañ bé minkol* ni njel pék i bôt lôñni biyôglô bi malôga inoñnaga ni bilem bi bôt ba binam, inoñnaga ni matiñ ma nkoñ ’isi, ndi ha inoñnaga ni Kristô bé; 9 inyule a yé yaga nyonok ni bilem bilam bi Nyambe gwobisôna.* 10 Jon yak bé ni yé nyonok ni njel yé, nye nu a yé ñéga* i ngii bangomin ni baane bobasôna. 11 Ni njel maada manan lôñni nye, ni bi kweeba ni likwee li li mbôña bé ni moo ma bôt ba binam, li li yé i kit nyuu minsôn; ndi ni likwee li li nlôl ni Kristô. 12 Inyule ni bi juba lôñni nye ikété sôble yé, inyu maada manan lôñni nye nyen ni bi tuge ki lôñ yada ni nye ni njel hémle nan inyu nson ngui u Nyambe, nu a bi tugul nye ikété bawoga.

13 Handugi hala, to kiki ni bé nwok ikété mahôha manan ni ikété libak li ngikweeba li minsôn minan, Nyambe a bi témbna bé i niñ lôñ yada ni nye. A bi nwéhél bés mahôha més momasôna ni loñgeñem, 14 a sas* mbén Môsi i i bééna mambén, i kolbaga bés. A bi héya yo ngéda a bi tômôl yo i kék njiiha.* 15 Ni njel kék njiiha* nyen a bi héya bangomin ni baane mambot, a wéha bo nyuu i mbamba inyu yis bôt le a nyémbél bo, a kena ki bo kiki bôt ba mok ni njel kék njiiha.*

16 Jon ni neebe bañ le mut nye ki nye a kéés bé inyu gwom ni nje to inyu gwom ni nyo, to inyu tééda kel ngand, to sôñ mondo,* to kel Sabat. 17 I mam mana ma yé titii i mam ma nlama lo, ndi ntiik jam womede u yé Kristô. 18 Mut nye ki nye a kéñ bañ bé njel i kôhna bom, mut nu a nkon maséé ni suhulnyuu i bihéñba lôñni libéghak li biañgel, “a nigbenege i”* mam a ntehe. Ndi a nhumbul yaga nyuu ni mahoñol mé ma minsôn, ibabé i bana njom i kôli i boñ hala, 19 a ntéñbe bé to ni nu a yé ño; ni njel ño nyen nyuu yosôna i nkôhna i mam ma mbéda yo, i bak noñgaga loñge ni njel môñga mé ni minliiñ, i holok ki ni mahol ma nlôl ni Nyambe.

20 Ibale ni bi wo lôñni Kristô, ni tjôô ki matiñ ma nkoñ ’isi, inyuki ni niñ wengoñle ni ngi yii bôt ba nkoñ ’isi, mu kiki ni nkônde suhus bébomede i noñ mambén ma nkoñ ’isi mana le: 21 “U yoñ bañ, u noode bañ, to tihba u tihba bañ”? 22 Ngo mam mana momasôna ma nlama tjiba lôñni ligwéélak jap, ma yé inoñnaga ni mambén lôñni biniigana bi bôt ba binam. 23 I mam mana ma nene wengoñle ma yé mam ma pék. Bôt ba nôgôl mo inyule ba nsômbôl pohol bomede lelaa ba bégés Nyambe. Ba nôgha ki nyuu yap njôghe inyu unda suhulnyuu i bihéñba. Ndi ma ta bé nseñ inyu jôs minheña mi minsôn.