1 Korintô

9 Baa me ta bé kunde i boñ yom i nlémél me? Baa me ta bé ñôma? Baa me bi tehe bé Yésu Nwet wés? Baa ni ta bé nson wem ikété Nwet? 2 To ibale me ta bé ñôma inyu bôt bape, me yé yaga ñôma inyu nan! Inyule bé bon ni yé béndél i i nyigye le me yé yaga ñôma inyu Nwet.

3 Ndimbhe yem inyu bôt ba nwan me, yo ini le: 4 Di gwé kunde* i je ni nyo, hala bé? 5 Kiki bana baôma bape, ni lôknyañ i Nwet, lôñni Kéfa,* yak bés di gwé kunde i hiômna nwaa nu a nhémle,* hala bé? 6 Tole, baa ndik me ni Barnabas bon di gwé bé kunde i tjél sal inyu kôhna koga kel? 7 Imbe sônda i nsomb ni yomede i mam ma mbéda yo inyu gwel nson sônda? Njee a mbel wom u minkôô mi wai ndi a je bé matam mé? Tole njee a ntééda bémba ndi a yoñ bé ndék milik mi bémba?

8 Baa me mpot ndik i mam mana ni litehge li mut binam? Baa yak mbén Môsi i mpot bé i mam mana? 9 Inyule i yé ntilga ikété mbén Môsi le: “U nlama bé kañ nlôm nyaga nyo ngéda a ntét blé.” Baa nyaga yon Nyambe a ntôñ? 10 Baa inyu loñge yés bé nyen a nkal hala? I bi tilba yaga inyu loñge yés, inyule i mut a nsal hisi lôñni i mut a ntét blé ba nlama boñ hala ni botñem le ba nkôhna ngaba.

11 Ibale di bi bel mam ma mbuu ipôla nan, baa hala a yé soso jam ibale di mbumbul mahôla manan i pes minsôn? 12 Ibale bôt bape ba gwé kunde ini i ngii nan, bôô ni ngélé yañen ni bés? Ndi bés di bi gwélél bé i kunde* ini, ndi di nhônba i mam mana momasôna inyu boñ le di kéñ yaga bañ ñañ nlam inyu Kristô njel. 13 Baa ni nyi bé le i bôt ba ngwel minson mimpubhaga ba nje gwom bi témpel, ni le i bôt ba mbéna sal i juu li bisesema ba nkôhna ngaba mu gwom ba nsem i juu li bisesema? 14 Hala nyen yak Nwet a bi téé le i bôt ba ñañal ñañ nlam ba niñ ni njel ñañ nlam.

15 Ndi me bi gwélél bé bitelbene bini to ndék. Ni maliga, me ntila bé i mam mana inyu boñ le hala a bôña inyu yem, inyule i yé nseñ le me wo iloole mut a yilha manjom me gwé i kadba kiki yañga jam! 16 Inyule ibale me ñañal ñañ nlam, me mboñ bé hala inyu kadba, inyule hala a yé jam me yé nyégsaga i boñ. Ni maliga, ngoo ni me ibale me ñañal bé ñañ nlam! 17 Ibale me ngwés boñ hala, me nkôhna bibom; ndi to ibale me ngwés bé boñ hala, Nyambe a bi mal yaa ti me nson kindak. 18 Bibom gwem bi yé ni le kii? Bi yé le ngéda me ñañal ñañ nlam, me añal wo ibabé i kôhna nsaa, le ndi me bep bañ gwélél kunde* yem i añal ñañ nlam.

19 Inyule to hala kiki me ta bé nkol u mut nye ki nye, me nyilha memede nkol u bôt bobasôna inyu boñ le me yoña libim li bôt me nla yoña. 20 Inyu Lôk Yuda, me bi yila wengoñle man Lôk Yuda inyu yoña Lôk Yuda; inyu bôt ba yé isi mbén, me bi yila wengoñle me yé isi mbén, to hala kiki memede me ta bé isi mbén, inyu yoña i bôt ba yé isi mbén. 21 Inyu bôt ba gwé bé mbén, me bi yila wengoñle me gwé bé mbén; to hala kiki me ta bé ngi mbén i bisu bi Nyambe, ndi me yé isi mbén inyu Kristô, inyu yoña i bôt ba gwé bé mbén. 22 Inyu bôt ba mbomb, me bi yila mut a mbomb, inyu yoña i bôt ba mbomb. Me bi yila mam momasôna inyu mintén mi bôt nwominsôna, inyu boñ le me pam i tohol bahogi ni manjel momasôna. 23 Ndi me mboñ mam momasôna inyu ñañ nlam, le ndi me añle wo bôt bape.

24 Baa ni nyi bé le i bôt ba nyoñ ngaba i pééna ngwéé, bobasôna ba nke ngwéé ndi wada ndik nyen a nkôhna bibom? Kena ngwéé kayéle ni kôhna gwo. 25 Ndi hiki mut a nyoñ ngaba i pééna ngwéé* a nhôt nyuu ikété mam momasôna. I yé maliga le ba mboñ hala inyu kôhna ntut u u nla ôbi, ndi bés di mboñ hala inyu kôhna ntut u u ñôbi bé. 26 Jon, me nke bé ngwéé wengoñle me nyi bé homa me nke; me ñôm ki bikut gwem kayéle me bép bañ mbebi; 27 ndi me ntumb* nyuu yem, me ken-ga yo kiki nkol, i tiga le ngéda me mal tééne bape likalô, memede me bébél* Nyambe.