1 Korintô

2 I ngéda me bi lo i bééni, a lôk kéé, me bi lo bé ni bibuk tole ni pék inyu hélés bé ngéda me bé añle bé jimb lipubi li Nyambe. 2 Inyule ngéda me bé ipôla nan, me bi yoñ makidik le me nyéñ bé yi jam lipe jo ki jo inyu nan, handugi Yésu Kristô, ni le ba bi nol nye i kék. 3 Ndi ngéda me bi lo i bééni, me bé bomb, me konok woñi, me sehlaga ngandak; 4 yak bibañga gwem ni likalô jem bi bé bé lôñni bibuk bi pék inyu lop bôt, ndi ni mbuu mpubi lôñni lipémba me bi unda bé, 5 le hémle nan i nigbene bañ i pék i bôt ba binam, ndi i ngui i Nyambe.

6 Nano di mpot pék ipôla bôt ba yé minhôôlak, ndi i ta bé pék i nkoñ ’isi,* to pék i baane ba nkoñ ’isi unu, ba ba nlama yila yañga. 7 Ndi di mpôdôl pék i Nyambe i i sôli ikété jimb lipubi. Nyambe a bi bôk a téé i pék ini inyu lipém jés, hiai to hiada ngi héga. 8 I pék ini yon ñane to wada ikété baane ba nkoñ ’isi unu* a bi pam bé i bana; inyule ibale ba bana yo, ki ba bi nol* bé Nwet nu lipém. 9 Ndik kiki i yé ntilga le: “I mam Nyambe a bi kôôbana i bôt ba ngwés nye, jis li bi tehe bé mo, to ôô u bi nok bé mo, mut binam a bi hégda bé to mo mu ñem wé.” 10 Inyule bés bon Nyambe a bi yeelene mo ni njel mbuu mpubi wé; inyule mbuu mpubi u nwan mam momasôna, yak ndip mam i Nyambe.

11 Njee ikété bôt ba binam a nla yi mam ma mut, handugi mbuu* u mut nu nyemede? Nlélém jam ki, mut to wada a nla bé yi mam ma Nyambe, handugi mbuu u Nyambe. 12 Di bi kôhna bé mbuu u nkoñ ’isi, ndi mbuu u nlôl yak Nyambe, inyu boñ le di yi i mam Nyambe a bi kébél bés nkéblak. 13 Di mpot bé i mam ma ni bibañga bi pék bôt ba binam ba niiga, ndi ni bibañga mbuu u niiga, hala kiki di ntoñol* mam ma mbuu ni bibañga bi mbuu.

14 Ndi mut minsôn a neebe bé* mam ma mbuu u Nyambe, inyule ma yé bijôñ inyu yé, a nla bé to nok mo inyule ba nwan mo ni litehge li mbuu. 15 Ndi mut mbuu a nwan mam momasôna, ndi nyemede, mut to wada a nwan bé nye. 16 Inyule “njee a bi pam i yi mahoñol ma Yéhôva,* le a niiga nye?” Ndi bés di gwé mahoñol ma Kristô.