Lukas

21 Ndi kiki a mpa mis, a tehe mingwañ mi bôt mi nleñ makébla map ikété minkuu mi makébla. 2 I mbus, a tehe hiyeyeba hi yik muda hiada hi nleñ bon ba batjañtjañ iba ba ba bééna yaga bé bañga nseñ.* 3 Ha nyen a bi kal le: “Me nkal bé maliga le, i hiyeyeba hi yik muda hini hi nha iloo bobasôna. 4 Inyule bana bobasôna ba nti makébla inyu ngandak yap nkus, ndi nye a nyôñôl ikété ndék a gwé,* a ti kii yosôna a ban-ga inyu niñ.”

5 I mbus, ngéda bahogi ba bé pôdôl témpel, ba toñlak lelaa ba bi lémés yo ni ngok ilam lôñni makébla bôt ba bi ti Nyambe, 6 a kal le: “I maoñ mana ni ntehe nano, dilo d’a lo le ngok ini yosôna y’a léña yaga ’isi, to yada y’a yégle bé i kéhi i ngii ipe.” 7 Ha nyen ba bi bat nye mbadga, ba kal le: “A Lét, i mam mana m’a tagbe yaga imbe ngéda? Kii y’a ba ki yimbne i ñunda le i mam mana ma yé bebee?” 8 A kal le: “Yoña yihe le ba yumus bañ bé inyule ngandak y’a lo, i gwéélak jôl jem, i kalak le: ‘Men me yé nye,’ ni le: ‘Ntéak ngéda u yé bebee.’ Ni noñ bañ bo. 9 Jam lipe ki, ngéda n’a nok mbimba i gwét ni yubda,* ni lôôha bañ kon woñi. Inyule i mam mana ma nlama ndugi bôña, ndi lisuk l’a lo bé ha nlélém ngéda u.”

10 I mbus, a kal bo le: “Loñ y’a telep ikolba loñ, yak ane i kolba ane. 11 Nyeñg disi keñi y’a ba, yak njal keñi ni dimala b’a ba bahoma bahoma; mam ma nkônha woñi m’a ba, yak biyimbne bikeñi bi lôlak i ngii.

12 “Ndi ilole mam mana momasôna ma mbôña, bôt b’a gwel bé,* ba tééñga bé, ba ken-ga bé i mandap ma bibégés ni i mandap ma mok. B’a kena bé i bisu bi bikiñe ni bi bangomin bakeñi inyule ni yé banigil bem. 13 Hala a’ yible bé njel i bok mbôgi. 14 Jon yoña makidik mu miñem minan le n’a kôôba bé bibuk binan i bisu bi ngéda inyu yi lelaa n’a pot i minkaa, 15 inyule m’a ti bé bibuk ni pék le baoo banan bobasôna mpôdnaga b’a la bé kolba to pééna. 16 Handugi hala, yak bagwal, ni lôknyuñ, ni mahaa, ni mawanda b’a gwélha bé,* ba nôlha ki bahogi ipôla nan, 17 bôt bobasôna b’a oo ki bé inyule ni yé banigil bem. 18 Ndi to hiôñ hiada hi miño minan hi’a nimil bé. 19 Hônba nan yon y’a sôñ biniñ binan.*

20 “Ndi ngéda n’a tehe mintôñ mi gwét mi nkéña Yérusalem, wee yina le tjiba yé i nkôôge bebee. 21 Ha nyen bôt ba yé i Yudéa ba bôdôl ke ngwéé dikôa, ba ba yé ikété Yérusalem ba nyodi, yak ba ba yé i minkoñ ba jôp bañ mu, 22 inyule mu dilo di nyen mbagi sép i nlama tina,* kayéle i mam momasôna ma yé ntilga ma yon. 23 Ngoo ni bôda ba mém, ni ba ba nyuñus bon mu dilo di! Inyule njiiha keñi y’a ba i loñ, yak hiun inyu litén lini. 24 Ndi b’a nol bo ni malo ma pansoñ, ba kena ki bo i minkôm i biloñ gwobisôna. Biloñ bipe* gw’a tidbe Yérusalem letee ntéak ngéda u biloñ bipe* u yon.

25 “Jam lipe ki, biyimbne gw’a ba i hiañgaa, i sôñ lôñni i tjôdôt; yak nduña keñi y’a ba hana ’isi inyule bôt b’a yi bé lelaa ba pamba inyu mbimba i tuye ni liyôgbe jé. 26 Bôt b’a kwo lihiô* inyu woñi ni inyule ba mba ba mbem mam m’a lo hana ’isi; inyule mimpémba mi mam mi ngii nw’a nyeñg. 27 Ha nyen b’a tehe Man mut a yé i lo ikété ond lôñni lipémba ni lipém likeñi. 28 Ndi ngéda mam mana ma mbôdôl bôña, telbana bitétéé, ni pa miño inyule tohi nan i ntiige bebee.”

29 Ha nyen a bi yoñ hihéga, a kal bo le: “Béñgnana e faigé ni bie bipe gwobisôna. 30 I ngéda bi yé i num tjai di mondo,* ndi ni tehe hala, bébomede ni nyi le sép i yé bebee. 31 Nlélém jam inyu nan, i ngéda ni ntehe i mam mana ma yé i bôña, yina le Ane Nyambe i yé bebee. 32 Me nkal bé maliga le, i hiai hini hi’a tagbe bé kekikel letee mam momasôna ma yon. 33 Ngii ni ’isi b’a tagbe, ndi bibañga gwem gw’a tagbe bé kekikel.

34 “Ndi bébomede yoña yihe le miñem minan mi ét bañ inyu ngandak je, ni ngandak nyôba, ni nduña i niñ, tiga le i kel i i puhe bé kunda yada 35 kiki hiandi. Inyule y’a lo inyu bôt bobasôna ba nyééne hana nkoñ ’isi wonsôna. 36 Jon yéna péé, ni yemhege ngéda yosôna le ndi ni pam i pei i mam mana momasôna ma nlama lo, ni telep ki i bisu bi Man mut.”

37 Ndi a bé niiga i témpel njamuha, a pamak juu inyu yééne i hikôa ba nsébél le Hikôa Ôlivé. 38 Yak litén jolisôna li bé lo ipañ yé kegla tutu inyu emble nye i témpel.