Isaías ñi lifru tüngduamelqueiñmu

1, 2. Taiñ hueñancülen mu, ¿chumquei Chau Jehová?

RAQUIDUAMAIÑ quiñe pichi huentru mu cutrantupiuquelelu ca rume ngümamequei. Mülefui chi ñi elcünuafiel tañi pu hueni, feimu hueñancütumequefi. Cam huelulcahui chi, feimu huesa duamcülei tañi huelulcan mu. Femngechi rupan mu, ¿chumafeyu cai tañi ñuque? Pancoafeyu, cüme allcütuafeyu, ca piuqueyeyu piafeyu.

² Biblia mu Chau Jehová trürümuuquei quiñe ñuque reque piuqueyen mu tüngduamelquefilu tañi püñeñ. Feimu Isaías 66:13 feipi: “Quiñe ñuque reque tüngduamelquefilu tañi püñeñ, ca femngechi tüngduameluhuaiñ”. Huelu Chau Jehová doi piuqueyeiñmu quiñe chau, quiñe ñuque mu (Is. 49:15). Hueñancülen mu iñchiñ, Chau Jehová tüngduamelqueiñmu ca yafültucuqueiñmu tañi Biblia mu (Rom. 15:4).

3. ¿Chem ngüneduamaiñ feula?

³ Chau Jehová ñi feipin Isaías lifru mu rume yafültucuafeiñmu (Is. 40:1). Quisu ñi duam mu huirintucungei tüfachi lifru ñi yafültucuafiel pu Judá che huesa rupamequelu. Famülque mu ca mülei cüdaungechi dungu ca cuñihun-ngei ta mongen (2 Tim. 3:1). Feimu duamnieiñ taiñ yafültucungeal. Feula ngüneduamaiñ quiñeque troquiñ ti lifru Isaías mu taiñ yafültucuaeteu 3 dungu mu: 1) Calerumetule taiñ mongen. 2) Rume culpatuuliyiñ cuifique dungu meu. 3) Layeluuliyiñ.

CALERUMETULE TAIÑ MONGEN

4. Calerumetule taiñ mongen, ¿chumngechi duamcüleafuiñ?

⁴ Calerumetuafui taiñ mongen (Ecl. 9:11; 1 Cor. 7:31). Conturumeafeiñmu chi quiñe cutran. Cüdaungeafui chi nieal taiñ duamnieel. Pofolcarumeafui che taiñ pais mu. Cam, elungeafuiñ cangelu cüdau Jehová ñi troquiñche mu. Femngechi rupaliyiñ, fill raquiduamcüleafuiñ. Fei “¿chumpean mai?” piafuiñ chi. Ngüneduamaiñ ñi rupan peñi José, 17 tripantu cüdahui Betel mu, huelu feipingei ñi fentepual. Quisu feipi: “Quimlafun ñi chumal. Fentren tripantu mülefun Betel mu. Feimu cüdautun ñi nietual hue mongen. Feula chumpean am ramtuuquefun”. Femngechi rupaliyiñ, ¿chumngechi yafültucuafeiñmu Jehová ñi feipin Isaías lifru mu?

5. Chau Jehová, ¿chem feipicünueiñmu Isaías 42:16 mu? (Ca inaduamnge ti adentun).

⁵ (Papeltunge Isaías 42:16). Chau Jehová feipicünui ñi adnieafiel pu pelonolu quiñe rüpü mu ñi quimnoel engün ca ñi peloncünuafiel ti dumiñ. Raquiduamnge tami miyahun quiñe fütra mahuida mu, niei fentren anümca, com dumiñcülei, quimlafimi ti rüpü, lafcülelai ti mapu, pelonolu troquihuimi. Ca femngechi duamcüleafuiñ calerumetule taiñ mongen. Huelu chem rupale rume, Chau Jehová feipicünui taiñ afcadinieaeteu ca taiñ adnieaeteu. Quisu nüñmayaiñmu taiñ cuhu. Pelontuafi ca lafcünuafi ti rüpü. ¿Chumngechi femquei? Eluqueiñmu cümeque ngülam Biblia mu ca tañi troquiñche mu (Sal. 119:105; Is. 30:21). Cafei adcünuafui taiñ quelluaeteu pu peñi, pu lamngen cam caquelu che. Quimnoliyiñ chem rupayai cüpalechi antü mu maneluucüleafuiñ Chau Jehová taiñ piuqueyeteu, quimniei taiñ chum duamcülen ca eluucülei taiñ quelluaeteu (Is. 41:10; 1 Ped. 5:6, 7).

6. Calerumetule taiñ mongen, ¿chem maneluucüleiñ?

⁶ ¿Acordaimi cai ti peñi José taiñ nütramcapeel parrafo 4 mu? Quisu ca tañi domo tripaingu Betel mu, fei ngüneduamingu chumngechi tañi piuqueyenquechi quellueteu Jehová. Quisu feipi: “Afcadinieyumu Chau Jehová. Adcünufi pu peñi ca pu lamngen tayu quelluaeteu ca elueyumu com tayu duamnieel tayu mongeluhual ca cüme duamcüleal. Petu femquei”. Calerumetule taiñ mongen, pepilnoalu troquihuafuiñ. Huelu maneluucüleafuiñ Chau Jehová mu, quisu adnieaiñmu ca tüngduamelaiñmu (Is. 54:10; 58:11). Peñi José ca feipi: “Rume ayüfiñ ñi chem pin quiñe taiñ ülcantun. Feipi: ‘¿Chem rupayai ta hule? Quimnielan. Huelu iñche mu müleai Chau Ngünechen, fei quisulelayan chumcaunorume’.a Quiñeque mu rupalayafui taiñ ayünieel, huelu maneluucüleafuiñ Chau Jehová taiñ quellunieaeteu”.

RUME CULPATUULIYIÑ CUIFIQUE DUNGU MEU

7. ¿Chum duamafuiñ taiñ cuifique huelulcan mu?

⁷ Fütra culpaliyiñ, huelu entudunguliyiñ, pu loncolelu piuqueyenquechi quelluaiñmu. Fei yafüluhuaiñ taiñ huiño culpanoal (Prov. 28:13; Sant. 5:14-16; 1 Juan 1:9). Huelu petu culpatumequehuafuiñ. Raquiduamafuiñ: “Chau Jehová turpu perdonalayaeneu” (2 Cor. 2:7). Fentren iñchiñ femngechi raquiduamürpuafuiñ. Cuifique huelulcan rume fanenagquei iñchiñ mu, cüdautuafuiñ taiñ furicünuafiel. Feimu ti lonco ülmen David feipi: “Tañi culpan ñi duam mu tüngcülelan”. Ca feipi: “Pepi nengümuulan, nehuen-ngehuelan” (Sal. 38:3, 8). Femngechi duamcüleliyiñ, rume quelluafeiñmu Isaías ñi lifru.

8, 9. Isaías 1:18, ¿chem quimeltuqueiñmu Chau Jehová ñi perdonachequen mu?

⁸ (Papeltunge Isaías 1:18). Jehová femngechi adentucünufi chumngechi tañi perdonachequen. Feipi quelüleafui rume taiñ culpan, quisu ligcünutuafi pire reque. Quiñe lig tacun pichi quelülehuele, rume cüdaungeafui ñi ligcünungetual. Huelu taiñ perdonaeteu Chau Jehová, com ligcünuquefi reque taiñ culpan, ngoimanentuquefi.

⁹ Huiño nütramcayaiñ David mu. Quisu coni ñihuampeñ dungu mu ca langümchen mu. Huelu Chau Jehová rulpacünuñmaeyu ñi culpan, ca fei hula feipi ñi serfiqueteu com piuque mu (2 Sam. 11:3, 4, 14, 15; 12:13; 1 Rey. 9:4, 5). Chau Jehová raquiduamlu David mu, peñmalafi ñi cuifi huesaque femün, doi mai tañi nor piuquengen. Ca femngechi nor raquiduamtuliyiñ taiñ culpan mu, Chau Jehová perdonayaiñmu ca quelluaiñmu taiñ culpatuunoal ca taiñ cüdahuelnieafiel com piuque mu. Huelu petu culpatuuliyiñ cuifique dungu meu, ¿chem quelluafeiñmu? Inaduamaiñ cangelu versiculo Isaías lifru mu.

10. ¿Chumngechi yafültucuqueiñmu Isaías 38:17?

¹⁰ (Papeltunge Isaías 38:17). Tüfachi texto feipilelu “furinentucünuñmaen com tañi culpan”, ca feipiafui “tami adquiñ mu nentuimi com tañi culpan”. Tüfachi texto quimeltueiñmu Chau Jehová alü camapu ütrüfentuquefi reque taiñ culpan tañi pehuenoafiel. Ñi feipilen tüfachi versiculo ca feipingeafui “turpu culpanolu troquien”. Taiñ perdonaeteu Chau Jehová feipicaqueiñmu reque: “Turpu culpalaimi”. Deu perdonaeliyiñmu Chau Jehová, castigalayaiñmu ca feipimequelayaiñmu chem mu taiñ huelulcan. Quisu feipicünueiñmu: “Raquiduamtucuniehuelayafiñ tami culpan” (Is. 43:25). ¡Müna cüme dungu! ¿Felei no am? Chau Jehová fei tati juzgachequelu, huelu eluuquei ñi ngoimanentual taiñ huelulcan. Feimu ca femaiñ iñchiñ, fei huesa duamlayaiñ cuifique huelulcan meu.

11. ¿Chem falintuquei Jehová? (Ca inaduamnge ti adentun).

¹¹ Huiño culpatuuliyiñ cuifique huelulcan meu, loncontucuaiñ taiñ piuqueyeteu Chau Jehová, quisu perdonaeiñmu ca ngoimanentui taiñ huesa femün. Chau Jehová femquelai tati pu che reque. Yehuequelai taiñ cuifique culpan meu ca illcutuniehuequelaiñmu (Is. 57:16). Chau Jehová falintuquelai huesaque dungu taiñ femün cuifi meu. Doi mai falintuquefi taiñ femmequen ca chem taiñ femal (Is. 55:7). ¡Afmatufali Chau Jehová ñi perdonachequen ca ñi piuqueyechen! Taiñ cuifique culpan müntuñmayafeiñmu taiñ ayühun ca catrütuafeiñmu taiñ llounoal cüpalechi cümelcan. Huelu eluulayaiñ ñi femngechi rupayal.

LAYELUULIYIÑ

12. ¿Chumngechi duamcüleafuiñ layeluhun mu?

¹² Layeluhun mu rume cutrantupiuquei che, turpu rupanoalu ti hueñancün troquihuafuingün. Ramtuhuafuiñ chi: “¿Chumngelu Chau Dios eli ñi layal tañi poyen che?”. Femngechi rupai taiñ peñi Miguel, tañi chau ca tañi ñuque laingu lüfconlu tañi ruca. Quisu feipi: “Rume cutrantupiuquelefun. Illcutufiñ ta Chau Jehová ñi lan mu engu. Quisu ñi duam mu lalaingu, huelu montul-lafingu”. Eimi, ¿ca femngechi duamcüleimi? Fei peafiyiñ chumngechi tami yafültucuafeteu Isaías ñi lifru.

13. ¿Chem feipicünueiñmu Chau Jehová Isaías 25:8 mu?

¹³ (Papeltunge Isaías 25:8). Chau Jehová feipicünui ñi apümcayafiel ti lan dungu, turpu ngehuetulayai. Amupe tami raquiduam hue mapu mu. Lahuelayai che, feimu ngümahuelayaimi layeluhun mu (Is. 35:10). Ngehuelayai eltun, cutrantupiuquehuelayaimi. Turpu ñamümlayafimi tami piuqueyen che, tremoleaingün ca rumel afcadinieaimu. Peuma no tati, tüfachi maneluhun rüfngei, Chau Jehová feipicünulu cai (Apoc. 21:4, 5).

14. ¿Chum duamelqueimu ñi müleal huiñomongetun? (Isaías 26:19, ca inaduamnge ti adentun).

¹⁴ (Papeltunge Isaías 26:19). Chau Jehová apümafi ti lan dungu, huelu cafei huiñomongeltuafi pu layelu. Chau Jehová quisu tañi pu che troquiniefi tati pu layelu. Feimu feipi: “Tañi pu la huiño huitratuaingün”. Raquiduamtucuniefi engün, ca puuchi antü meu huiñomongeltuafi engün. Illhuen mongelquefi ancülechi anümca, ca femngechi Chau Jehová huiñomongeltuafi taiñ pu che lalu, quisu mu cüpalu cai ti mongen. ¡Rume ayühun-ngeai taiñ huiño pancotuafiel engün! (Ca ngüneduamafuimi Marcos 5:42).

15. ¿Chumngechi quelluqueiñmu taiñ raquiduamal ti huiñomongetun meu?

¹⁵ Chau Jehová ngoimamentuquelafi tati pu layelu, ca huiñmongeltuafi engün. Tüfa tüngduamelqueiñmu hueñancülefuliyiñ rume. Miguel, taiñ nütramcapeel parrafo 12 mu, feipi chumngechi ñi yafültucuqueteu tüfachi maneluhun: “Isaías 26:19 quimeltueneu Chau Jehová quisu tañi pu che troquiniefi tañi chau ca tañi ñuque. Rume piuqueyefi engu. Feimu raquiduamtucuniefi puule hula ti antü ñi huiñomongeltuafiel engu. Raquiduamal tüfa tüngduamelqueneu ca yafültucuqueneu”. Iñchiñ ca femngechi femafuiñ, raquiduamaiñ feichi antü ñi huiñomongetual taiñ pu che lalu. Tüfa quelluaiñmu hueñancüleliyiñ rume.

16. Hueñancülelmi, ¿chem texto yafültucuqueimu?

¹⁶ Tüfachi troquiñ mu ngüneduampeiñ chumngechi Isaías ñi lifru tüngduamelqueiñmu calerumetule taiñ mongen, rume culpatuuliyiñ cuifique dungu mu ca layeluuliyiñ. ¡Mañumfali Chau Jehová taiñ yafültucuqueteu Biblia mu! (Sal. 94:19). Hueñancülelmi, ¿chem texto yafültucuqueimu? Cümeafui tami loncontucunieafiel feichi texto, huirintucuafuimi quiñe papel meu cam elcünuafuimi cheu tami peafiel. Eluunge tami yafültucuaeteu Chau Jehová ñi dungu.