PU PAPELTUQUELU ÑI RAMTUQUEEL

¿Chem epu eldungu feipilei Gálatas 4:24?

Ti apostol Pablo nütramcai Abrahán ñi niefiel Sara ca Agar engu, fei huirintucui: “Tüfachi dungu adentun reque felei. Tüfachi epu domo adentulei epu eldungu” (Gál. 4:22-24). Cuifi mu, feipiquefuiñ feichi epu eldungu fei ta Moisés ñi ley ca tati hue eldungu. Huelu cüme ngüneduamfiel mu tüfachi dungu, duamnieiñ cacünutual taiñ feipin. Pablo nütramcaquefui Moisés ñi ley ca Abrahán ñi feipicünungeelchi eldungu, nütramcaquelafui tati hue eldungu mu.a Peafiyiñ.

Agar esclavangefui, Pablo trürümfi Sinaí huincul mu (Gál. 4:25). Tüfachi huincul mu femngei Moisés ñi ley, feichi 1513 tripantu mu petu ñi mülepanon Jesús (Éx. 19:5, 6). Feimu Agar adentulefui Moisés ñi ley. Chem che no rume cüme inaquelafui ti ley dungu, feimu ti ley dungu acordalelquefui pu judio ñi esclavoyeteu ti culpan. Tüfachi eldungu ca quelluafui pu Israel che ñi quimafiel ineingeai ti Mesías, ¿chumngelu feipiqueiñ? Tati Mesías müten inanieafui com ñi feipin ti ley dungu. Ti Mesías hultuculu tañi mongen, elufi pu che culpafengelu ñi lifrengetual ti culpan ca ti lan dungu mu (Gál. 3:19, 24, 25). Jesús deu huechunentulu chem ñi ayünieel Chau Dios, falihuelai Moisés ñi ley (Rom. 10:4).

Pablo trürümfi Agar, Sara mu. Sara “ti lifrelechi domo choyüfi tañi püñeñ Chau Ngünechen ñi feipicünun mu” (Gál. 4:23). Tüfa ta Abrahán ñi feipicünungeelchi eldungu (Gál. 3:29; 4:28, 30). Chau Jehová eldungucünufi ta Abrahán: “Tami allcütufiel iñche tañi dungun, com troquiñche mapu meu cümelcangeai tami cüpanche ñi duam mu” (Gén. 22:18).

Chau Jehová ñi feipicünulelfiel Abrahán pengeli ti cüpanche tripayai Abrahán mu, femngechi Chau Jehová doi quimfalcünui ñi feipicünuel Edén mu (Gén. 3:15). Pablo feipi feichi cüpanche fei ta Jesucristo, huelu ca coneltulei pu ‘inaniefilu ta Cristo’, tüfa pu 144 mil dullin che. Fei engün ngünenieai Cristo engu (Gál. 3:16, 29; Apoc. 14:1-3). Chau Dios tañi eldungucünufiel ta Abrahán, fentren cümeque dungu llohuaingün pu inaniefilu ca pu feyentufilu ta Jesús.

Pablo nütramcai “tüfachi dungu adentun reque felei”, huelu ¿chem quimeltui? Pablo pengeli pu judio amulele engün ñi inayafiel ti ley dungu, esclavo reque feleaingün Agar reque. Huelu pu judio lloufile engün Abrahán ñi cüpanche, feita Jesucristo, lifreletuaingün Sara reque. ¿Chem dungu mu lifreleafuingün? Ti culpan ca ti lan dungu mu (Juan 8:32-34). Pu judio llounofile engün Jesús, pengelaingün ñi adümnofiel chumngelu ñi mülen Moisés ñi ley. Tüfachi eldungu elungei ñi quelluafiel engün ñi quimal ineingen tati Cristo.

Pu Galacia trahunche mu, fentren cristiano judio tuhun-ngelaingün ca turpu inaquelafingün Moisés ñi ley. Quiñeque judio cristiano ayüquefuingün pu cristiano judio tuhun-ngenolu ñi inanieafiel Moisés tañi ley, quiñe tüfa ñi circuncidangeal pu huentru. Pablo tañi carta mu feipifi engün duamfalngelai ñi esclavongeal tañi inaniefiel mu Moisés tañi ley, fei engün deu lifreletuingün lloufilu cai ta Cristo (Gál. 5:1, 10-14).