Quelluntucuaiñ taiñ troquiñche ñi amuldungual

1, 2. Ñi coneltun pichique troquiñche ñi amuldungual, ¿chem feipiquei quiñeque peñi ca lamngen?

ÜITUNGELU eimi tami amuldungual ti trahunche engün, ¿rume ayüupelaimi? Fei llemai, feichi antü coneltuimi quiñe fütra familia mu poyequefilu Chau Jehová (Sal. 148:1, 2, 12, 13). Huelu ti trahunche adcünungequei doi pichique troquiñche tañi amuldungual. Coneltulu iñchiñ feichi troquiñche mu, quelluntucuqueiñ ñi doi cüme amuldungungeal ti cümeque dungu “huall mapu püle” (Mat. 24:14).

² Eimi, ¿ayüqueimi tami coneltulen quiñe feichi pichique troquiñche mu? Taiñ lamngen Wendya feipi: “Rume cümelcaqueneu ñi coneltulen. Pu lamngen quellueneu ñi doi adümuhual tañi amuldungual ca quimeltucheal. Cafei raquiduameleneu chumngechi doi cüdahuelafun ta Chau Jehová, ca diturpual tañi raquiduamel. Ca nierpun cümeque hueni”. Taiñ peñi Rich ca feipi: “Iñche loncolen quiñe pichi troquiñche mu ñi amuldungual, rume falintuquefiñ tüfachi cüdau. Quiñe dungu tañi femafel: fei ta quelluafiel pu hue fautizaulu ñi doi cüme hueniyenieafiel Chau Jehová”. Ca quiñe lamngen Dinah feipi: “¡Rume ayüquen tañi coneltulen quiñe pichi troquiñche mu! Iñche tañi familia ca müten”.

3. ¿Chem peaiñ tüfachi chillcatun mu?

³ Fillque pichi troquiñche trahunche mu mülei quiñe loncolelu ca quiñe peñi tañi quellueteu. ¿Chem cüdau femqueingün? ¿Chumngechi quelluquefingün pu peñi ca lamngen coneltulelu tañi pichi troquiñche? Ca, ¿chumafuiñ caque quiñeque iñchiñ taiñ quelluntucual? ¿Chumngechi cümelcaqueiñmu ñi femngechi adcünungequen ti trahunche? Tüfachi chillcatun mu peaiñ.

TI LONCOLEQUELU CA TAÑI QUELLUQUETEU

4. 1) ¿Chumquei pu loncolequelu quiñe troquiñche mu? 2) Pu loncolelu quiñe troquiñche mu, ¿chem ngülam inayafui? (Inaduamnge ti huichulechi dungu “Ñi quimal ti loncolequelu quiñe troquiñche mu”).

⁴ Pu loncolelu elfalcünuquefi inei loncoleai caque quiñeque troquiñche trahunche mu.b Feichi peñi mülei ñi quelluafiel pu peñi ca lamngen tañi troquiñche mu ñi doi cüme hueniyerpuafiel ta Chau Jehová ca doi cüme quimeltucheal. Ti loncolelu quiñe troquiñche mu, ¿chumngechi femquei tüfachi cüdau? Duamtuquefi pu coneltulelu tañi troquiñche mu (Prov. 27:23). Fei cüme quimniefi feichi pu peñi ca lamngen, femngechi piuqueyenquechi quelluquefi engün (Prov. 12:25; Is. 32:2; Sant. 2:15-17). Quelluquefi caque quiñeque peñi ca lamngen ñi cüdauconcüleal amuldungun mu. Eluuquei ñi amuldungual tañi troquiñche engu fill semana, doyelchi mai sabado ca domingo. Ca quiñentrür amuldunguquei com pu peñi ca lamngen tañi troquiñche mu, femngechi ñi yafültucuafiel ca quelluafiel caque quiñeque engün ñi doi cüme amuldungucheal. Pepi tripanole amuldungual, elfalcünuquefi ti peñi tañi quelluqueteu, cam cangelu peñi pepicaucülelu, ñi adnieafiel ti amuldungun. Pepicaquefi pu peñi fautizaulu ñi doi elungeal cüdau trahunche mu (1 Tim. 3:1). Rüf piuque mu saquiquefi engün, ngülamtuquefi Biblia mu ca pepicaquefi ñi siervo ministerial ca loncolelungerpual trahunche mu. Rume falin-ngei tüfachi cüdau ñi femquen pu loncolequelu pichique troquiñche mu, feimu cüme ngüneduamngequei inei ñi elfalcünungeal tüfachi falin cüdau.

5. ¿Chemu cüdaungeafui loncoleal pichique troquiñche mu?

⁵ Fentren cüdau nieingün pu loncolequelu pichique troquiñche mu, feimu rume cüdautuafuingün ñi com femürpual. Femngechi rupai quiñe loncolelu Alemania mu, feipi: “Nien alün elfal cüdau trahunche mu ca tañi pichi troquiñche mu. Feimu cüdautuquen ñi doi cüme quelluafiel com pu amuldunguquelu tañi troquiñche mu”. Uganda mu, quiñe loncolelu nielu 70 tripantu feipi: “Pichin loncolelu ca siervo ministerial mülei tañi trahunche mu. Feimu fentren che coneltulei caque troquiñche mu ñi amuldungual. Ayüfun ñi doi cüme yafültucuafiel caque quiñeque peñi ca lamngen, huelu quiñeque mu rume cüdautuquen”. Ca quiñe loncolelu, Surinam mu, feipi: “Rume ayüquen tañi pepicayafiel pu peñi ca lamngen, huelu duamniefun nehuencüleal ca nieal tiempo, ca quiñeque mu rume alüñmaquei ñi cüme pepicaucüleal che. Fente cüdaungelu cai, quiñeque mu quiñepülecünuquefiñ”. ¿Chem quelluafeyu pu loncolelu?

6. Pichin che coneltule fillque troquiñche mu ñi amuldungual, ¿chemu doi cümei?

⁶ Ti pichique troquiñche cümeafui ñi coneltual pichin peñi ca lamngen, femngechi pu loncolelu doi cüme quimafiel ca quelluafiel engün tañi cüme hueniyenieafiel Chau Jehová. Huelu mülei fütraque trahunche nielu pichin loncolelu müten, fei cüdaungeafui ñi adcünungeal pichique troquiñche mu. Fei, ¿chumafui pu loncolelu? Elfalcünuafuingün quiñeque siervo ministerial ñi adnieafiel quiñe pichi troquiñche. Felei llemai, pichin peñi ca lamngen coneltule ti troquiñche mu, pu loncolequelu doi cüme enturpuafui ñi falin cüdau: tañi cüme quelluafiel pu peñi ca pu lamngen.

7. Nehue mülenole loncolelu taiñ trahunche, ¿chumafui pu loncolequelu quiñe troquiñche? (1 Pedro 5:2; ca inaduamnge ti adentun).

⁷ Nehue mülenole loncolelu trahunche mu, ¿chumafui pu loncolequelu pichique troquiñche mu? Rume duamfali ñi pepicayafiel ti peñi tañi quelluqueteu, femngechi ñi cuidayafiel pu peñi ca pu lamngen (papeltunge 1 Pedro 5:2). Loncolelmi quiñe troquiñche, elfalcünuafimi ti peñi quiñeque cüdau. Quiñeque mu feipiafimi ñi adcünual ti trahun ñi amuldungual ca ñi chumcünual ti amuldungun cüdau. Quiñentrür llellipuafuimu Chau Jehová ca nütramcayaimu ñi chum amulen ñi amuldungun pu coneltulelu troquiñche mu. Feipiafimi tati peñi tami compañaeteu yafültucumeafiel pu peñi ca pu lamngen. Petu tamu amunon, cüme quimeltuafimi chumngechi tamu femal. Ca pemefilu hula ti peñi cam lamngen, saquiafimi ca ngülamtuafuimi ti peñi tami quelluqueteu. Femngechi cüme pepicayafimi ñi loncolerpual quiñe troquiñche mu (2 Tim. 2:2). Cafei feipiafuimi adümuucülechi peñi ca lamngen ñi quelluntucual ñi pepicayafiel ti troquiñche. Pu precursor trür amuldunguafui pu müte adümuucülenolu engün, femngechi adümelafuingün ñi doi cüme nütramcacheal, huiño pemetuafiel pu che ca quimeltucheal. Com iñchiñ, ¿chumngechi quelluntucuafuiñ cai taiñ troquiñche? Peaiñ 3 dungu.

CHUMNGECHI QUELLUNTUCUAFUIÑ TAIÑ TROQUIÑCHE

8. ¿Chumafuiñ ñi quelluntucual taiñ troquiñche? (Romanos 1:12).

⁸ Trür amuldunguaiñ taiñ troquiñche iñchiñ. Femngechi “hueluquentu yafültucuhuaiñ” (papeltunge Romanos 1:12). Amuldunguliyiñ taiñ troquiñche iñchiñ, doi tüngcüleaiñ ñi nütramcayafiel pu che, cafei llicalayaiñ taiñ amual quiñeque lof cuñihun-ngelu. Huelu taiñ cüdau ñi duam mu pepi tripanoliyiñ taiñ troquiñche mu, ¿chumafuiñ? Nütramcalelafuiñ taiñ jefe ñi cacünutual taiñ horario. Fei eluafeiñmu permiso (Neh. 2:4-6). Cutran cam füchan mu pepi amuldungunoliyiñ taiñ troquiñche iñchiñ, ¿chumafuiñ? Nütramcayafuiñ ti loncolequelu. Fei adcünuafui taiñ amuldungual ti troquiñche engün zoom mu, carta cam telefono. Cafei huechengelmi, huelu cüdautuqueimi tami amuldungual, ¿chumafuimi cai? Fill semana feipiafuimi quiñe peñi cam lamngen tami troquiñche mu tamu trür amuldungual. Cümeafui tami raquiduamal chem doi fali tami mongen mu ca chumngechi doi cüme adcünual tami tiempo (Rom. 12:11; Col. 4:5). Eluuliyiñ taiñ amuldungual taiñ troquiñche iñchiñ, com yafültucuhuaiñ. Feimu llellipuafiyiñ Chau Jehová taiñ eluaeteu nehuen taiñ com piuque mu cüdahual (Filip. 2:13).

9. ¿Chumafuiñ ñi familia reque feleal taiñ troquiñche? (Romanos 12:13).

⁹ Quelluntucuaiñ ñi quiñeucüleal taiñ troquiñche. Poyechefengeliyiñ, familia reque feleai taiñ troquiñche (papeltunge Romanos 12:13). Eluhuafuiñ ñi trahuluhual taiñ ruca mu ñi amuldungual taiñ troquiñche. Cafei hueupipale quiñe peñi, mangelafuiñ ñi iyal ca cüme rupaleal taiñ troquiñche iñchiñ. Amutule rume ti hueupife, iñchiñ ca trahuluuhuafuiñ taiñ cüme rupaleal. Femngechi femngequei quiñeque trahunche mu, ca adcünungequei chem troquiñche ñi mangelafiel ti hueupipayalu. Quiñe precursora especial Sara pingelu feipi: “Fill raquiduamelqueneu llohual che tañi ruca mu, feimu rume cüdaungenochi iyael femquen. Re iyael mu müten raquiduamquelan, doi falintuquefiñ ñi quimafiel tañi pu lamngen”. Quelluntuculiyiñ ñi familia reque feleal taiñ troquiñche, doi fülmaucüleaiñ Chau Jehová mu ca taiñ pu peñi ca lamngen mu (Neh. 8:10; Hch. 20:35).

10. Taiñ doi cüme amuldungucheal ca quimeltucheal, ¿chumafuiñ? (Proverbios 1:5; 27:17; ca inaduamnge ti adentun).

¹⁰ Eluhuaiñ taiñ quellungeal. Amulepe taiñ doi cüme amuldunguafiel ca quimeltuafiel pu che, femngechi ayüucüleaiñ ñi amuldungual taiñ troquiñche iñchiñ. ¿Chem mu doi cüme adümuhuafuimi? Quelluafen feipiafuimi quiñe precursor cam quiñe peñi, lamngen doi adümuucülelu (papeltunge Proverbios 1:5; 27:17). Ca feipiafuimi ti loncolelu troquiñche mu chem dungu tami doi cüme adümal, fei ca quelluafeimu. Tüfa ñi femün quiñe lamngen yehuen chengelu, feipi: “Feipifiñ quiñe precursora tañi quelluaeteu ñi huiño pemeafiel che. Feichi precursora rume piuqueyechequei, fillque rupa trür amuldunguyu. Quellueneu ñi quimelelafiel Biblia quiñe che. Ayüucülen tañi quellun mu, feula ayüumaleneu ti amuldungun cüdau”. Felei llemai, fentren dungu femafuiñ ñi quelluntucual taiñ pichi troquiñche.

TAIÑ CONELTULEN QUIÑE TROQUIÑCHE MU, ¿CHUMNGECHI QUELLUQUEIÑMU?

11, 12. ¿Chumngechi cümelcaqueiñmu coneltual quiñe troquiñche mu? ¿Chem rupai taiñ lamngen Wendy?

¹¹ Doi fülmaucüleaiñ Jehová mu. Pichique troquiñche meu, yafültucungequei ca ngüneduamngequei ñi chumlen pu cuñifall, pu lantu domo ca pu füchalelu, Jehová rume piuqueyefi feitachi pu che (1 Tes. 2:8; Sant. 1:27). Ca com iñchiñ quellungequeiñ doi cüme amuldungucheal ca quimeltucheal. Ca pu peñi fautizaucülelu pepicangequei ñi doi cüme cüdahual trahunche mu (1 Tim. 3:10).

¹² Inaduamaiñ ñi feipin taiñ lamngen Wendy, üitungelu parrafo 2 mu, feipi: “Tañi Chau ayüquelafui taiñ testigongeal, feimu tañi ñuque müte tripaquelafui amuldungual tañi troquiñche engu fin de semana mu. Huelu iñche elungequefun ñi tripayal. Quiñe cushe papai precursorangelu rume duamtueneu, fei trür amuldunguquefuyu. Falinque ngülam elueneu ñi amuldungual ca quelluconal trahunche mu. Ti loncolequelu tañi troquiñche mu elueneu fentren cümeque ngülam Biblia mu, piuquentucuniefiñ tañi feipin, fantepu quellunieneu”.

13. Taiñ coneltulen quiñe troquiñche mu, ¿chumngechi quelluqueiñmu taiñ nieal hueni? (Ca inaduamnge ti adentun ).

¹³ Nieafuiñ cümeque hueni taiñ quelluaeteu. Amuldungun mu taiñ troquiñche iñchiñ, doi cüme hueniyehuafuiñ (Filip. 1:27). Pichin-ngelu cai ti troquiñche, pu yehuen chengelu doi eluhuafui tañi hueniyeafiel ta caquelu (2 Cor. 6:13). Taiñ troquiñche compañqueiñmu cutrancüleliyiñ, hueñancüleliyiñ ca layeluuliyiñ (1 Tes. 5:14). Doi püllelepale ti fütra cutrancahun, doi duamfali taiñ nieal cümeque hueni (Mat. 24:21). Quimlu iñchiñ taiñ piuqueyenieteu ca quelluqueteu taiñ pu peñi ca lamngen, nehuentucuqueiñmu taiñ chaftuafiel chem dungu rume (Prov. 17:17).

14. Rupale huesaque dungu, ¿chumngechi quelluaiñmu taiñ troquiñche?

¹⁴ Quelluqueiñmu rupan mu huesaque dungu. Quiñeque mu contuafeiñmeu huesaque cutran, lüfconafui taiñ ruca, rupayafui nüyün, mangiñmayafui taiñ lof ca caiñetungeafuiñ taiñ testigongen mu. Femngechi rupafuliyiñ, ti loncolelu taiñ troquiñche mu pepicaucüleai taiñ quelluaeteu. Ramtuafi caque quiñeque peñi ca lamngen coneltulelu tañi troquiñche mu, fei ñi quimal tañi chumlen engün. Cafei ramtuafi chem ñi duamnieel engün: iyael, co, tacun, cheu ñi umayal cam ñi quelluaeteu quiñe doctor. Femngechi quelluquefi ñi elungeal chem ñi duamnieel engün. Petu ñi rupanon chem huesa dungu no rume, pu loncolequelu quiñe troquiñche mu ca tati Comité de Servicio nütramcaqueingün, fei ñi quimal inei doi duamnieafui quellu, femngechi adcünuqueingün chumngechi ñi quellungeal. Tami troquiñche piuqueyenquechi quelluaimu rupalmi huesaque dungu mu, ¡cüme dungu llemai!

15. ¿Chumqueiñ com pu coneltulu Chau Jehová tañi familia mu?

¹⁵ Coneltuleiñ quiñe fütra familia mu poyequefilu Chau Jehová. Huenu mu mülei fentren cümeque püllü. Mapu mu doi 9 millon che poyequefiyiñ Chau Jehová, fei fill tripantu doi fentren che concülepai (Zac. 8:23; Apoc. 5:11). Mapu meu ca huenu meu quiñeucüleiñ ñi amuldungual ti cümeque dungu (Apoc. 14:6, 7). Feimu llemai, quelluntucunieafiyiñ taiñ troquiñche, femngechi com piuque mu poyeafiyiñ ta Chau Jehová (Sal. 111:1).