Cüme hueniyenieafiyiñ taiñ pu peñi ca lamngen

1. ¿Cheu peafuiñ cümeque hueni?

“JEHOVÁ tañi troquiñche quiñentrür fau trapümngeiñ. Caque tuhun nieiñ rume, huenihuen com iñchiñ tati”,a femngechi feipi ti ül Jewba tañi trokiñche weniyeniewiyiñ. Rume mañumcüleiñ taiñ nien cümeque hueni afaelchi antü meu (Sal. 119:63). Coneltuleiñ Chau Jehová tañi familia mu, fei quiñentrür püramyequefiyiñ ca hueluquentu piuqueyeuqueiñ.

2. ¿Chem ayünieiñ taiñ femal?

² Re quimlayafiyiñ müten taiñ pu peñi ca pu lamngen, doi mai ayünieiñ taiñ cüme hueniyeafiel. Fente taiñ piuqueyeniefiel Chau Jehová ca Jesús, doi quiñeucüleiñ (Juan 13:35). Quiñe cüme huenihuen quisutu acurumequelai, doi mai cüdaucüleaiñ taiñ cüme hueningeal. Com iñchiñ huelulcauqueiñ, feimu cüdautuafuiñ taiñ cüme hueniyenieafiel taiñ pu peñi ca pu lamngen.

3. ¿Chemu cüdautuafuiñ taiñ cüme hueniyehual?

³ Müte cüdautulaiñ taiñ cüme hueniyenieafiel quiñeque peñi ca lamngen. Trürcülei taiñ raquiduam ca chem taiñ ayüqueel. Huelu doi cüdautuafuiñ cüme hueniyeafiel caquelu peñi ca lamngen. Quiñeque mu quiñeucülelayafui taiñ raquiduam ca trürlayafui taiñ chumngen, taiñ femquen ca taiñ ayüqueel. Cafei quiñeque engün huesa cutrancüleafui cam hueñancüleafui tañi piuque, feimu cüdaungeafui taiñ cüme hueniyenieafiel. Feula inaduamaiñ chem quelluafeiñmu taiñ cüme hueniyenieafiel taiñ pu peñi ca lamngen. Peaiñ chumngechi inayentuafuiñ ta Chau Jehová ca Jesús tañi femün, femngechi taiñ cüme hueningeal.

INAYENTUAFIYIÑ JEHOVÁ TAIÑ CÜME HUENIYEHUAL

4. ¿Chumngechi doi cüme hueniyeafuiñ taiñ pu peñi ca pu lamngen?

⁴ Taiñ doi cüme hueniyenieafiel pu peñi ca pu lamngen, peñmayafiyiñ cümeque dungu ñi femquen engün. ¿Chem quelluafeiñmu taiñ doi cüme quimafiel? Elcünuaiñ tiempo taiñ quiñentrür müleal. Femngechi femi ti apostol Pablo, feimu feipifi ti Tesalónica trahunche: “Rume ayüfuiñ taiñ peutual, feimu rüf yafüluhuiyiñ taiñ femngechi femal” (1 Tes. 2:17). Fentren peñi ca lamngen rume quellueyu nütramcayal amuldungun mu, trahun mu ca fütraque trahun meu, femngechi doi cüme quimuuqueingün. Huelu yafcauliyiñ quiñeque peñi cam lamngen iñchiñ, ¿ca chem quelluaiñmu taiñ cümelcautual?

5. ¿Chem duamniei quiñe anümca ñi tonfünoal, ca chem duamnieiñ iñchiñ taiñ cüme hueniyehual? (Colosenses 3:12).

⁵ Yafcauliyiñ quiñeque peñi cam lamngen iñchiñ, ¿chem quelluafeiñmu taiñ hueniyenieafiel? Inayentuafiyiñ ta Chau Jehová: ñom piuquengeaiñ, ñochi duamngeaiñ, cüme piuquengeaiñ ca cutranpiuqueyecheaiñ (papeltunge Colosenses 3:12). Ñi tonfünoal anümca, duamniei ñi hutrucongeal. Ca femngechi ñi tonfünoal reque taiñ cümeque hueniyehun pu peñi ca lamngen engün, iñchiñ duamnieiñ taiñ inayentuafiel Jehová. Inaduamaiñ 3 dungu taiñ catrütuafeteu cüme hueniyenieafiel taiñ pu peñi ca pu lamngen. Cafei ngüneduamaiñ chumngechi inayentuafuiñ Jesús ñi ñom piuquengen, ñi nien paciencia, ñi cüme piuquengen ca tañi cutranpiuqueyechen.

QUIÑEUCÜLENOLE TAIÑ RAQUIDUAM

6. Quiñeucülenole taiñ raquiduam, ¿chumngechi catrütuafeiñmu taiñ cüme hueniyehual?

⁶ ¿Chemu cüdautuafuiñ taiñ hueniyehual? Quiñeucülenoliyiñ taiñ raquiduam, epuñpüle raquiduamafuiñ ñi rüfngen taiñ feipin. Raquiduamnge tüfa: epu peñi quiñeucülelai ñi raquiduam tañi cüme adcünuafiel ti amuldungun cüdau, epuñpüle raquiduamqueingu ñi cümen quisuque tañi feipin. Pichi dungu troquiafuiñ, huelu rume catrütuafeyu engu ñi cüme hueniyehual. Pichi dungu tati, huelu rume falintufile engu quisuque ñi raquiduam, cümelcautulayafuingu. Doi mai, ñochiquechi püntühuafuingu ca fente ñi huesa duamcülen hueniyehuelayafuingu.

7. Jesús, ¿chumngechi quimeltufi tañi pu discipulo ñi ñom piuquengeal?

⁷ Inayentuafiyiñ Jesús ñi ñom piuquengen. Jesús quimeltufi tañi pu discipulo ñi ñom piuquengeal tañi cümelcautual. Pu discipulo cüdautuquefuingün ñi femal tüfa, feimu Jesús quimeltufi ñi doicülelu troquiafiel caquelu che (Mat. 20:25-28). Feichi pun petu tañi lanon, cüchanamunfi engün, femngechi Jesús pengeli fente tañi ñom piuquengen, feichi cüdau pu esclavo müten femquefui (Juan 13:3-5, 12-16). Femngechi quimeltufi tañi cüme hueningeal engün. Doicülelu troquifile engün caquelu che, doi eluhuafuingün ñi cüme llohual ñi feipin caquelu che. Fei quiñeucülenole rume ñi raquiduam engün, catrütulayafeyu ñi cüme hueniyehual.

8. Quiñeucülenoliyiñ taiñ raquiduam, ¿chumngechi quelluaiñmu taiñ ñom piuquengeal? (Colosenses 3:13; ca inaduamnge ti adentun).

⁸ ¿Chumafuiñ taiñ cüme hueniyenieafiel taiñ pu hueni? Ñom piuquengeliyiñ, müte cüdautulayaiñ taiñ famentuafiel quiñeucülenofule rume taiñ raquiduam ca doi eluucüleaiñ taiñ perdonacheal (papeltunge Colosenses 3:13). Ñom piuquengeliyiñ, lladcüfemlayaiñ. Femngechi cüme yeucüleaiñ taiñ pu hueni iñchiñ (Sal. 4:4). Huesa piuliyiñ rume, loncontucuaiñ: com iñchiñ quiñeque mu huesa entuqueiñ taiñ feipin (Ecl. 7:21, 22). Ramtuhuaiñ: “¿Chem doi falin-ngei? ¿Ñi quimfalcünual ñi rüfngen tañi feipin, cam ñi cüme hueniyenieafiel tañi hueni?”. Doi cümeafui tami cüme llohuafiel ñi feipin tami hueni, fei tami ayühulafiel. Huiño raquiduamhuelayafimi feichi dungu tamu quiñeucülenon, femngechi cüme duamcüleaimi ca cüme feleaimi.

9. Alüñmale ñi quiñeucülenon taiñ raquiduam, ¿chumngechi quelluaiñmu taiñ ñom piuquengeal? (Proverbios 17:9).

⁹ Quiñeque mu, quiñeucülelayafuiñ taiñ raquiduam, fei alüñma rupayafui. Femngechi rupafuliyiñ, rume quelluaiñmu ñom piuquengeal. Notucaulayaiñ taiñ incañpeafiel taiñ feipin (papeltunge Proverbios 17:9; 1 Cor. 6:7). Doi cümeafui taiñ cüme hueniyeucüleal. Fentren taiñ pu peñi ca pu lamngen femqueingün, cüme nütramcauqueingün, fei tañi cümelcautual (Sal. 34:14). Feipiafuiñ: “Rume falintuniefiñ tayu hueniyehun, nütramcayayu tayu cümelcautual”. Eluhuaiñ taiñ feipial: “Iñche ta ca nien ta culpa. Huesa duameleyu, perdonaen”. Cafei, perdonaen pingeliyiñ, ñom chengeaiñ, fei com piuque mu perdonayafiyiñ (Luc. 17:3, 4). Loncontucuaiñ: ayünielaiñ quimfalcünual ñi rüfngen taiñ feipin, doi mai ayünieiñ taiñ cümelcautual, fei taiñ cüme hueniyenieafiel taiñ hueni (Prov. 18:24).

TRÜRCÜLENOLE TAIÑ CHUMNGEN

10. ¿Chemu cüdautuafuiñ taiñ cüme hueniyenieafiel quiñeque che?

¹⁰ ¿Chemu cüdautuafuiñ taiñ hueniyehual? Trürcülenole taiñ chumngen, doi cüdautuafuiñ taiñ huenicantuafiel caquelu che, ca taiñ doi cüme hueniyenieafiel. Tañi chumngechi chengen mu quiñeque che huesa duamelafeiñmu ca nüngayelafeiñmu. Tañi rupan cuifi mu, quiñeque che femngechi chengei. Quiñeque doi nütramcaqueingün, caquelu femquelaingün, cam caquerumeiñ müten. Femngechi felei ta dungu: quiñeque doi ayüqueingün ñi müleal fentren che engün, caquelu doi ayüquei ñi quisuleal.

11. Jesús, ¿chumi ñi hueniyeafiel caque rume che?

¹¹ Inayentuafiyiñ Jesús tañi nien ta paciencia. Jesús tañi pu hueni caquerumefui. Ti apostol Santiago ca Juan diñmatufingu ñi doicüleal. Quiñe rupa feipifingu ta Jesús ñi eluaeteu falin che troquingeal huenu mu (Mar. 10:35-37). Huelu Jesús elcünui tañi falin chengen huenu mu ca ti falin cüdau ñi nieel, fei ñi cüpayal mapu mu (Filip. 2:5-8). Tati pu apostol ca Jesús trürlafui tañi chumngen. Femfule rume engu, Jesús nieleyu paciencia. Ca femngechi femi caquelu tañi pu hueni mu.

12. ¿Chem quellueyu ta Jesús ñi nielafiel paciencia tañi pu hueni?

¹² Jesús quimniefui ñi huelulcahuafel tañi pu hueni. Jesús quimniefui fentren tañi pu discipulo doyümquefui ñi falin che troquingeal, chumngechi femi Santiago ca Juan (Mar. 9:34). Jesús quimniefui chemu ñi femngechi chengen engün. Cheu ñi tremümngen Jesús ca ñi pu discipulo, pu che rume falintuquefui chem cüdau ñi nieel ca chumngechi ñi troquingequen, feimu nielfi ta paciencia. Pu discipulo fentren tripantu quimelngei ñi femngechi raquiduamal, feimu Jesús quimniefui ñi matu famentunoafiel feichi mallmahun ñi nieel tañi piuque mu (Mar. 10:42-45).

13. Nieliyiñ paciencia, ¿chumngechi quelluaiñmu taiñ cüme hueniyeucüleal? (Efesios 4:2).

¹³ ¿Chumafuiñ taiñ cüme hueniyenieafiel taiñ pu hueni? Nielelafiyiñ paciencia taiñ pu hueni, ca cüme llohuafiyiñ tañi chumngechi chengen engün, nüngayefeliyiñmu rume quiñeque mu (Prov. 14:29). Com iñchiñ caquerumei taiñ chumngechi chengen, huesa dungu no. Huelu quiñeque dungu taiñ femquen nüngayelafui cangelu che. Feimu mañumquefiyiñ caquelu taiñ nielaeteu paciencia (papeltunge Efesios 4:2). Cafei feipilayafiyiñ taiñ pu hueni ñi cacünutual tañi chumngen. Falintuafiyiñ ñi chumquen pu yehuen chengelu tañi nütramcayafiel caquelu che, cüdautufule rume. Cafei nielelafiyiñ paciencia pu rume dunguquelu. Doi cüme hueniyelayafiyiñ itrocom che, huelu loncontucuaiñ: caquerumeafuiñ taiñ chumngechi chengen, huelu quiñentrür cüme cüdahuelafuiñ ta Chau Jehová.

14. Nieliyiñ paciencia, ¿chem inaduamaiñ taiñ pu peñi ca lamngen mu?

¹⁴ Nieliyiñ paciencia, quelluaiñmu taiñ ngüneduamafiel ñi cüme femquen taiñ pu peñi, pu lamngen. Femngechi trürnofuliyiñ rume, catrütulayaiñmu taiñ cüme hueniyehual. Raquiduamaiñ ñi femün Santiago ca Juan. Ayüfuingu ñi falin chengerpual Chau Dios tañi Gobierno mu. Huelu tañi femün mu engu pengelingu tañi rüf maneluucülen Jehová ñi Gobierno mu. Jesús inaduamfi tañi feyentulen engu, feimu falintufi. Iñchiñ inaduamfiliyiñ tañi cüme femquen taiñ pu peñi ca lamngen, inayentuafiyiñ Jesús ca tañi Chau Jehová.

15. Taiñ hueniyenieafiel caquerumechi peñi ca lamngen, ¿inei quelluafeiñmu?

¹⁵ Caquerumefuliyiñ rume taiñ pu peñi ca pu lamngen iñchiñ, ¿chem doi quelluaiñmu taiñ hueniyeafiel? Taiñ llellipuafiel Jehová taiñ quelluaeteu. Raquiduamafuiñ chem dungu mu nüngayelafeiñmu quiñe peñi cam lamngen, fei petu ñi rupanon, llellipuafiyiñ Jehová taiñ quelluaeteu taiñ tüngcüleal. Chau Jehová deumaeiñmu, feimu cüme quimniei taiñ caquerumen. Llellipuliyiñ, maneluhuaiñ quisu quimnieteu iñchiñ ca quelluaiñmu taiñ nieal paciencia. Huelu rume cüdautufuliyiñ taiñ nieal ta paciencia, llellipuafiyiñ taiñ eluaeteu tañi nehuen, fei taiñ ngünehual (Luc. 11:13; Gál. 5:22, 23).

TAIÑ PU HUENI CUTRANCAULE

16. ¿Chumafui pu peñi ca lamngen cutrancaucülelu?

¹⁶ ¿Chemu cüdautuafuiñ taiñ hueniyehual? Taiñ pu peñi ca lamngen cutrancülele cam hueñancülele engün, huesa duamelafeiñmu tañi feipin ca femün mu. Ayüafuingün tañi quisuleal engün, chem mu rume lladcüfemafuingün, ca femafuingün taiñ raquiduamquenofel (Job 6:2, 3). Huesa troquiafuiñ ñi femün engün, huelu iñchiñ quimlaiñ chi chem dungu ñi rupamequen taiñ pu peñi ca lamngen.

17. Jesús ñi femfiel ta Bartimeo, ¿chem quimeltueiñmu?

¹⁷ Inayentuafiyiñ Jesús ñi cüme piuquengen ca cutranpiuqueyechen. Jesús cutranpiuqueyefi pu cutrancaucülelu quimnofiel mu rume ca piuqueyenquechi quellufi. Peaiñ chumngechi troquifi quiñe huentru traumalelu, Bartimeo pingelu. Feitachi huentru allcülu Jesús ñi miyahun ta fei mu, huirarmequefui tañi peaeteu Jesús. Quiñeque che feipieyu tañi ñücüfcüleal. Huelu fei ayüniefui Jesús ñi tremoltuaeteu, feimu doi huirari. Quiñeque che ayülafui chi tañi huirarmequen feitachi huentru. Huelu Jesús cutranpiuqueyefi, feimu quellufi (Mat. 20:34; Mar. 10:46-52). Jesús piuqueyenquechi dungufi, saquifi tañi feyentun mu ca tremoltufi.

18. ¿Chum duamelafiyiñ taiñ pu hueni cutrancaumequelu? (1 Tesalonicenses 5:14).

¹⁸ ¿Chumafuiñ taiñ cüme hueniyenieafiel taiñ pu hueni? Duamtucheaimi ca cutranpiuqueyecheaimi. Femngechi poyenquechi yafültucuafimi pu peñi, pu lamngen cutrancaucülelu (papeltunge 1 Tesalonicenses 5:14). Tati rüfngechi hueni eluucülei ñi quellual “mülen mu hueñancün” (Prov. 17:17). Felei, quiñe cüme hueni ca inaye hueñancüquei huesa rupalu tañi hueni. Ca femquei com tañi pepi femün ñi quelluafiel tañi hueni ca yafültucufi ñi doi cüme duamcüleal.

19. Cutranpiuqueyecheliyiñ ca cüme piuquengeliyiñ, ¿chem femafuiñ? (Ca inaduamnge ti adentun).

¹⁹ Cüme piuquengeliyiñ ca cutranpiuqueyecheliyiñ, ¿chem femaiñ? Iñchiñ catrütulayafuiñ ñi cutrancaunoal taiñ hueni, huelu eluhuaiñ taiñ adümafiel ñi chum duamcülen ca chem ñi rupamequen (Mat. 7:12; 1 Ped. 3:8). Taiñ hueni entule tañi feipin, cüme allcütuafiyiñ. Duamfalngele, feipiafuiñ quiñe dungu taiñ yafültucuafiel (Prov. 12:25). Raquiduamlayaiñ taiñ com adümfiel ñi rupamequen, huelulcahuafuiñ chi (Prov. 18:13). Nielafiyiñ paciencia taiñ hueni. Fei ca culpan chengei, feimu raquiduamlayaiñ ñi huelulcaunoal (Efes. 4:32).

20. ¿Chem chengeaiñ taiñ cüme hueningeal?

²⁰ Rume falintuquefiyiñ taiñ pu hueni nieel Jehová tañi troquiñche mu. Huelu com culpafe chengeiñ ca rupaqueiñ huesaque dungu meu, feimu feipiqueiñ ca femqueiñ quiñeque dungu taiñ femnoafel. Feimu falintuquefiyiñ taiñ pu peñi ca lamngen tañi ñom chengen mu, tañi nien mu paciencia, ñi cüme piuquengen, ñi cutranpiuqueyequeteu iñchiñ ca taiñ hueniyenieteu. Felei, com iñchiñ ayünieiñ ca femngechi hueningeal.