10-16 AGOSTO, 2026
ÜLCANTUN 122 ¡Amulepe taiñ nehuentuleal!
¿Chumaiñ taiñ püntütripanoal Jehová mu?
“Ñidol, ¿inei inayafuiñ? Eimi tami feipin hulquei rumel mongen” (JUAN 6:68).
¿CHEM QUIMAIÑ?
Püntütripalayaiñ Jehová mu chem huesaque dungu rupaliyiñ rume.
1, 2. ¿Chem rupai Jesús quimeltumequelu Capernaúm mu?
QUIÑE antü Jesús quimeltumequefi quiñe troquiñche Capernaúm huaria mu, feipi: “Inolmün ti Huentru ñi Fotüm ñi cuerpo ca pütoconolmün ñi mollfüñ, lloulayaimün mongen. Fei inei rume ifile tañi cuerpo ca pütocofile tañi mollfüñ, nieai rumel mongen. Fei iñche huiñomongeltuafiñ ti afchi antü meu” (Juan 6:53, 54). Fentren tañi pu discipulo ayülafi ti hueupin. Feipifingün ta Jesús: “Nüngaifali tüfachi hueupin. Pilaiñ taiñ allcütuafiel” (Juan 6:60).
2 Feimu fentren tañi pu discipulo püntütripaingün Jesús mu. ¿Feyentulaingün am Jesús tañi huercüeteu Chau Dios? Feyentufi llemai. Pefilu engün Jesús ñi femün afmatufalchi dungu, feipingün: “Rüfcünu llemai, tüfa ta Chau Ngünechen ñi huerquen, tati feipicünungelu ñi cüpayal mapu meu” (Juan 6:14). Huelu, adümnofilu Jesús ñi feipin, püntütripaingün.
3. ¿Chumingün pu apostol allcütufilu Jesús, ca chumngelu? (Ca inaduamnge ti adentun).
3 ¿Chumingün pu apostol? Inaniefingün müten ta Jesús. Jesús ramtueyu engün: ¿Eimün ca cüpa amutuimün? Fei Pedro feipi: “Ñidol, ¿inei inayafuiñ? Eimi tami feipin hulquei rumel mongen. Iñchiñ feyentuleiñ ca quimnieiñ eimi ta Chau Ngünechen ñi huercüel” (Juan 6:68, 69). Feichi Jesús feipilu ñi iñmangeal tañi cuerpo ca pütocongeal tañi mollfüñ, Pedro ca pu caquelu apostol cüme adümlafingün chi, huelu püntütripalaingün Jesús mu. ¿Chumngelu? Rüf feyentuleingün Jesús fei “tati Cristo, Chau Ngünechen ñi huercüel” (Luc. 9:20, 35).
Fentren discipulo elcünuingün ta Jesús, huelu pu apostol püntütripalaingün. (Inaduamnge parrafo 3).
4. ¿Chem dungu püntünentuafeiñmu Jehová mu?
4 Quiñe dungu taiñ rupan raquiduamelafeiñmu taiñ püntütripayal Jehová mu. Quiñeque ta tüfa: cacünungetuafui chumngechi taiñ adümfiel quiñe troquiñ Biblia ca chumngechi taiñ amuldunguquen. Ca rupayafuiñ quiñe huesa dungu, fei ramtuhuafuiñ: “¿Chumngelu Jehová catrütuquelafi?”. Quiñe poyen peñi huesa duamelafeiñmu. Cam quiñe yamfal peñi huesa femeteu troquihuafuiñ. Femngechi rupaliyiñ, ¿chumafuiñ?
5. ¿Chumngelu duamfali ñi nehuencüleal taiñ feyentun? ¿Chumngechi trürümafuimi ti fütra ruca tami feyentun mu? (Colosenses 1:23).
5 Taiñ püntütripanoal Jehová mu rupaliyiñ huesaque dungu mu, duamnieiñ ñi rüf nehuencüleal taiñ feyentun. Raquiduamnge tüfa: cheu ñi rupaquen fütraque nüyün, duamfali ñi cüme anücünungeal fütraque ruca, femngechi ñi tranarupanoal. Ca femngechi, rupaliyiñ cüdaungechi dungu, duamnieiñ ñi nehuencüleal taiñ feyentun taiñ püntütripanoal Jehová mu. Felei llemai, doi foliluucülepe taiñ feyentun, femngechi serfinieafiyiñ Jehová chem dungu mu rume rupaliyiñ (1 Cor. 15:58; papeltunge Colosenses 1:23).
6. ¿Chem quellueyu pu apostol ñi inanieafiel Jesús?
6 Feichi püntütripalu fentren che, ¿chem quellueyu pu apostol ñi inanieafiel Jesús? Pu apostol quimnieingün ñi poyeafiel Jehová müten, quisu am com deumalu. Quimnieingün Jesús Chau Jehová ñi Fotüm ngen, ca quimnieingün allcütufile Jesús ñi feipin, nieaingün rumel mongen. Ca quimnieingün Jesús ayühulquefi tañi Chau. Iñchiñ cai, ¿chem quelluaiñmu taiñ püntütripanoal Jehová mu rupaliyiñ huesaque dungu? Peaiñ 3 dungu taiñ quelluaeteu: 1) Jehová tati com deumafilu. 2) Biblia fei ta Jehová tañi Dungu. 3) Jehová cüme adniefi tañi troquiñche. Rüf maneluucüleliyiñ tüfachi 3 quimeltun, serfinieafiyiñ Jehová chem dungu mu rume rupamequeliyiñ.
JEHOVÁ, TATI COM DEUMALU
7. 1) Ñi feipin Apocalipsis 4:11, ¿chem quimeltuqueiñmu Jehová mu? 2) Rupamequeliyiñ huesaque dungu mu, ¿chem raquiduamafuiñ?
7 (Papeltunge Apocalipsis 4:11). Tüfachi texto feipi Jehová tañi com deumalu, feimu mülei taiñ püramyeafiel quisu müten. Raquiduamliyiñ ñi fente nehuen-ngen Chau Jehová, doi maneluuqueiñ taiñ quelluaeteu chem rupaliyiñ rume. Huelu Satanás apolfi mapu coilaque dungu mu, femngechi pu che ñi feyentunoal ñi mülen Chau Dios. Quiñeque cientifico feipiquei ñi mülenon quiñe dios taiñ deumaeteu. Cümei taiñ maneluucüleal ñi mülen Chau Dios ca taiñ poyequeteu, femngechi acurumele huesaque dungu, epu rume raquiduamlayaiñ ñi mülen Chau Dios ca taiñ quelluaeteu (Heb. 11:6).
8, 9. Ramtuhulmi ñi mülepen mai Dios, ¿chumaimi? (Ca inaduamnge ti adentun).
8 Ramtuhulmi ñi mülepen mai Dios, ¿chumaimi? Eluunge tami quintuafiel fillque publicacion, fei ngüneduamaimi chemu maneluuqueiñ Jehová ñi deumafiel com dungu. Mülei fentren quimeltun tami quelluaeteu. Peafuimi ti folleto ¿Es la vida obra de un Creador?, ti lifru ¡Rumel ayüucüleaimi! quimeltun 6 ca 7. Cafei peafuimi ti troquiñ “¿Deumangepei mai?” jw.org mu. Jessica, quiñe lamngen mülelu Estados Unidos mu, feipi: “Deu papeltulu iñche quiñeque taiñ publicacion, feimu ngüneduamün quisutu huefpalai ti mongen, doi mai ñi mülen quiñe com deumalu fütra quimün-ngelu. Deu quimniefun, huelu feula quiñe rumeletui tañi raquiduam”. Fentren pu peñi ca lamngen ca quellueyu ti revista ¡Tami quimafel! numero 3, tripalu 2021 tripantu “¿Deumangepei mai com ñi mülen?” pingelu. ¿Deu papeltupelafimi? Huelu cümeafui tami huiño papeltuafiel.
9 Elcünuafuimi tiempo tami chillcatual ñi mülepen mai Chau Dios. Femngechi doi feyentuaimi ñi mülen ca doi cüme quimafimi ñi chumngen ta Chau Jehová (Rom. 1:20). Tami quimürpuel cafei quelluafuimi caquelu müte feyentulenolu ñi mülen Chau Dios. Felei llemai, Jehová cüme pengelcünui ñi deumafiel com dungu.
Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida
Deu papeltufilmi ti folleto ¿Es la vida obra de un Creador?, ca huiño papeltuafuimi. (Inaduamnge parrafo 8).
JEHOVÁ MU CÜPAI BIBLIA
10. ¿Chumngelu fente falintuquefiyiñ tati Biblia? (2 Timoteo 3:16, 17).
10 (Papeltunge 2 Timoteo 3:16, 17). Biblia mu tripalei Dios ñi dungu com pu che ñi quimal. Ca falinque ramtun huiñoldunguquei, quiñeque tüfa: ¿cheu tuhui ti mongen?, ¿chumal elngeiñ mapu mu?, ¿chem duamquei Dios taiñ femal? Jehová mu cüpai Biblia, feimu rume falintuquefiyiñ. Ayüqueiñ taiñ cüme ngüneduamafiel ca inayafiel taiñ mongen mu.
11. Eimi, ¿chemu maneluuqueimi Biblia Chau Dios mu cüpai?
11 ¿Chemu feyentuqueiñ Biblia, ñi cüpan Chau Dios mu? Ngüneduamaiñ quiñeque dungu. Biblia nütramcalu chem ñi rupan cuifi mu, rüfngei ñi feipin (Luc. 3:1, 2). Ca cüme feipi chumngechi ñi adcünungen fillque dungu mapu mu, huenu mu ca lafquen mu (Job 26:7). Huecüfü ayüfulu rume ñi apümcayafiel Biblia, huelu doi alün rupa entuhuiringei ca rulpadungungei caquelu lifru mu. Cuarenta huentru huirintucufingün ca fentreñmai ñi huirintucungen, mil 600 tripantu. Femlu rume, huelulcalelai ca com nüucülei ñi feipin Biblia. Cafei cuifi mu huirintucungei, huelu tañi ngülam rume fentren che quellufi, fantepu mu ca femquei (Prov. 13:20; 15:21; Mat. 7:12). Ca fentren dungu feipicünungelu Biblia mu deu femtriparpui (Jos. 23:14). Feimu llemai, maneluuqueiñ Biblia Chau Dios mu cüpai.
12. Ramtuuliyiñ Biblia ñi rüf cüpan Chau Dios mu, ¿chumaiñ?
12 Biblia, ¿cüpapei mai Chau Dios mu? Ramtuuliyiñ, ¿chumaiñ? Llellipuaiñ ca feipiafiyiñ Jehová taiñ quelluaeteu. Fei doi cüme ngüneduamaiñ taiñ publicacion mu. Inaduamaiñ ñi feipin taiñ peñi Jordan. Pichicalu müten, tañi pu chau quimeleyu Jehová ñi dungu. Fei feipi: “Com feyentufemquelan tañi feipingeel. Ngüneduamquen ñi rüfngepen mai. Quiñeque rupa, epu rume raquiduamlu iñche, fei quintuquen taiñ publicacion mu, femngechi tañi huiñoldungual tañi ramtuqueel”. Doi maneluuliyiñ Jehová ñi elcünuel Biblia, doi nehuencüleai taiñ feyentun (1 Cor. 3:12, 13).
JEHOVÁ ADNIEFI TAÑI PU CHE
13. Ramtuuliyiñ inei engün Jehová tañi troquiñche, ¿chumaiñ?
13 Quimnieiñ Jehová niei tañi troquiñche: pu Dunguquelu Ineingen Jehová. Huelu ramtuuliyiñ ñi rüfngepen mai tüfa, matu raquiduamaiñ: “¿Inei engün am rüf inaniefingün Biblia ñi huercün dungu? ¿Chem troquiñche Biblia mu entuquei com tañi feyentun? ¿Inei engün am femquei Jehová ñi ayüqueel fachantü?” (Mat. 7:20, 21; 2 Tim. 4:3, 4).
14. ¿Chumngechi coneltulei pu testigo ñi femtripamequen Mateo 24:14?
14 Petu ñi acunon Jehová tañi antü, fei ayüniei ñi amuldungungeal ti cümeque dungu com mapu meu. Feimu ramtuhuaiñ: “¿Inei engün am femmequei?” (Mat. 24:14). Quimfali tati, Jehová adniefi pu testigo ñi femal tüfachi cüdau. Pu testigo müten amuldunguqueiñ ti cümeque dungu doi 240 troquiñ mapu mu. Doi 100 tripantu mu femqueiñ tüfachi cüdau. Jehová tañi pu che rumel hunentucuquefiyiñ taiñ amuldungual ca quimeltucheal (Mat. 28:19, 20).
15. Pu loncolelu, ¿chumngechi coneltulei ñi yamniengeal Jehová tañi üi? (Mateo 6:9; Isaías 43:10).
15 (Papeltunge Mateo 6:9; Isaías 43:10). Iñchiñ mu rume falin-ngei yenieal Jehová tañi üi ca taiñ Dunguquelu Ineingen Jehová pingequen. Alün che quimquelai Jehová tañi üi, huelu pu testigo huiño huirintucutui Jehová tañi üi Biblia mu. Doi cuifique huirintucun mülei doi 7 mil rupa Chau Dios ñi üi Biblia mu.
16. Pu testigo, ¿chumngechi inafingün ñi feipin Juan 13:34, 35? (Ca inaduamnge ti adentun).
16 (Papeltunge Juan 13:34, 35). Fachantü pu che cüme llouquelai ca quiñeucülelai, huelu Jehová tañi pu che quiñeucülei ca piuqueyeuquei. Caquerumei taiñ tuhun ca chumngechi taiñ tremümngen, huelu eluucüleiñ taiñ cüme yeucüleal ca hueluconque piuqueyehual. Amun mu ca trahunche mu, ¿ca ngüneduampelaimi ñi cüme yeucülen ca ñi piuqueyeuquen pu peñi ca lamngen? Tüfa pengeli Jehová adnieiñmu ñi femürpual tañi ayüqueel. Loncontucunieliyiñ tüfa, quelluaiñmu pülleconcüleal Jehová mu chem dungu rupale rume.
Jehová tañi duam mu müten, tañi pu che hueluquentu piuqueyeuquei ca quiñeucülequei huall mapu mu. (Inaduamnge parrafo 16).a
CHUMCAUNORUME PÜNTÜULAYAIÑ JEHOVÁ MU
17, 18. 1) ¿Chem cüdaungechi dungu rupayafuiñ? 2) Chem rupale rume, ¿chumaiñ?
17 Petu ñi acunon Jehová ñi antü, chaftuafuiñ cüdaungechi dungu (2 Tim. 3:1, 13). Ca quiñeque dungu fill raquiduamelafeiñmu. Müte adümlayafuiñ chi quiñeque dungu ñi feipiel Jehová ñi adcünuelchi pu che. Cam quiñe peñi cam lamngen huesa duameleneu piafuiñ. Fei quimlayafuiñ chumngechi cüme elcünungetual ti dungu.
18 Rupaliyiñ rume cüdaungechi dungu taiñ mongen mu, afcadileaiñ Jehová mu. ¿Chem quelluafeiñmu? Loncontucuaiñ feitachi 3 dungu taiñ ngüneduampeel. 1) Jehová deumafi com dungu. 2) Jehová mu cüpai ti Biblia. Ca 3) Chau Jehová tañi troquiñche fei tati pu testigo. Pedro feipifi ta Jesús: “¿Inei inayafuiñ? Eimi tami feipin hulquei rumel mongen”. Iñchiñ ca femngechi püntütripalayaiñ Jehová mu chem rupale rume.
ÜLCANTUN 123 Cüme llounieafiyiñ Chau Dios ñi Ngünenien
a ¿CHEM PENGELI TI ADENTUN? Quiñe ñuque tañi pichi malen engu amulei bus mu, adquintulei pu testigo ñi amuldungumequen, fei rume ayühuingu.