“Tati pu yall quiñe regalo Jehová mu cüpalu”

¿ELUNGEIMI chi quiñe regalo tami rume falintufiel? Elueimu chi quiñe che eimi tami rume piuqueyefiel. ¿Chumafuimi feiti regalo? Rume cüme cuidayafuimi llemai.

Biblia feipi: “Tati pu yall quiñe regalo Jehová mu cüpalu” (Sal. 127:3). Fei tati pu chau testigongelu pefingün tañi pichiqueche quiñe falin regalo tañi elueteu Jehová. Feimu eluuqueingün tañi cuñiutucuafiel, cuidayafiel tañi cümelcaleal ca tañi hueniyeafiel Jehová engün.

Famülque mu, quiñeque pu chau ca femngechi pequelafi tañi pichiqueche (Is. 49:15; 2 Tim. 3:1-3). Huelu mülei caquelu pu chau cuidaquefi tañi yall, huelu cüdautuquei, chaftuquefi alün dungu. ¿Chem dungu chaftuquei pu chau? ¿Chem ayüquei Jehová ñi femal pu chau? ¿Chem femafui pu chau ñi cüme tremümafiel ñi pichiqueche?

CÜDAUNGECHI DUNGU ÑI CHAFTUQUEEL

• Pu familia ñi raquiduamqueel ca caquelu che. Quiñeque troquiñ mapu tati pu chau nielu doi alün pichiqueche, doi respetaqueyu pu che. Feimu quiñeque familia ca caquelu che feipiquefi pu chau ñi nieal doi fentren yall, cüdaungefule rume ñi tremümngeal.

• Ti curehuen raquiduamcüleingu ñi rupayal füchale engün. Quiñeque mapu mu, fillalei pu che, rume mülei cutran ca ngelai reque doctor ca pital, feimu fentren pichiqueche laquei. Tüfachi dungu mu quiñeque curehuen niequei fentren pichiqueche, femngechi quiñeque tañi mongelerpual. Ca quiñeque curehuen eluuquei tañi nieal fentren yall, femngechi quisu engün füchalele nieai inei tañi cuidayaeteu, doyelchi mai tati gobierno quellunofile tati füchaqueche.

• Cüdaungei feipial tunten yall tañi nieal. Quiñeque mapu mu müte ngelai anticonceptivo. Cañpüle mülei, huelu müte cümelaingün, feimu quiñeque llicaquei tañi cutranelafeteu. Caquelu mapu mu alün plata fali tati anticonceptivo, feimu pepi ngillaquelai che.a

¿CHEM AYÜNIEI JEHOVÁ ÑI FEMAL PU CHAU?

Mülei ñi eluafiel tañi pu yall chem tañi duamnieel. Jehová ayüquei tati pu chau ñi eluafiel tañi pu yall iyael, tacun ca cheu tañi müleal petu tremcülelu engün. Jehová ca ayüquei tati pu chau ñi quimeltuafiel tañi pu yall, feimu pu chau cristianongelu huercüquelafi tañi pu yall ñi mülepual internado mu. Doi mai quisu engün tremümquefingün tañi pu pichiqueche, femngechi quimeltuafingün ñi cüme pepiluhual fillque dungu mu. Tati pu chau elcünuqueingün tiempo tañi müleal caque quiñeque tañi pu yall engün, femngechi peaingün ñi piuqueyengen ca ñi cuidangequen. Jehová feipiquelai tati pu chau ñi ricungeal tañi cüme tremümafiel tañi pu pichiqueche. Raquiduamnge: Jehová, ¿chem curehuen dullifi ñi tremümafiel tañi piuqueyen Fotüm? José ca María, fei engu pofrengefuingu, huelu rume cüdaufengefuingu (Mat. 13:55, 56; Luc. 2:24).

Biblia feipi: “Tuchi eluquenofilu chem ñi duamnieel quisu tañi pu che, doyelchi mai tati pu che ñi ruca mu mülelu, quiñepülecünuquefi tañi feyentun. Doi huesalcalei tati feyentuquenolu mu” (1 Tim. 5:8).

Jehová cüme quimniei ti pu chau duamnieafui ñi cuidangeal füchale engün. Puule feichi antü, pu yall quelluafi tañi pu chau ñi yamniefiel mu (Éx. 20:12; 1 Tim. 5:4). Huelu Jehová ayüquelai ti pu chau ñi rume raquiduamal chumngechi ñi cuidayaeteu tañi pu yall, doi mai ñi raquiduamal engün chumngechi ñi cüme tremümafiel (2 Cor. 12:14).

Mülei ñi quimeltuafiel tañi pichiqueche Jehová mu. Pu chau ca mülei ñi quimeltuafiel tañi pu yall ñi piuqueyeafiel ca ñi serfiafiel Jehová. Tüfa ti doi falin dungu pu chau ñi femafel Jehová tañi adquiñ mu (Deut. 6:6, 7).

Biblia feipi: “Norümtuafimün ca ngülamtuafimün chumngechi ayüniei ta Chau Jehová” (Efes. 6:4).

JEHOVÁ AYÜNIEI TAMU CÜME CHAUNGEAL

Cüme raquiduamaimu tunten yall nieaimu. Ayülmu tamu nieal pichiqueche, cüme ngüneduamaimu tamu mongen. ¿Niepeaimu mai plata tamu eluafiel iyael, tacun ca educacion tamu pichiqueche? Müte nienolmu plata, cüme nütramcayaimu tunten pichiqueche tamu nieal ñi tremümafiel chumngechi ayüquei Jehová. Quiñeque mu, femtripalayafui taiñ feipicünuufel, Jehová quimniei tüfa (Ecl. 9:11). Huelu Jehová quelluaimu tamu cüme tremümafiel tamu pichiqueche.

Biblia feipi: “Chem ñi adcünuel tati cüme cüdauquelu, cüme tripayai llemai, huelu tati matucaufe fillalerpuai” (Prov. 21:5).

“Inei rume eimün meu ayüle ñi deumarucayal, hune nentucuentayai, fei ngüneduamai ñi niepen mai plata ñi huechunentual ti cüdau, ¿felei no am?” (Luc. 14:28).

Jehová hunentucunieafimu. Tamu familia mu, doyümnieafimün tamün serfiafiel Jehová. Deu nielmu pichiqueche, quimeltuafimu caque quiñeque engün tañi piuqueyeafiel Jehová. Quelluafimu ñi cüme allcütual ti trahun mu ca ñi entual quimeltun. Fill semana trür chillcatuafimün Biblia ca quelluafimün ñi amuldungual engün. Feipilayafimu tamu hunenque yall cam ca familia ñi femal tüfachi falinque cüdau tamu pichiqueche mu. Cüdaungei ñi cüme tremümngeal pu pichiqueche, huelu eluule engün tañi serfiafiel Jehová, rume ayühulaimu.

Biblia feipi: “Rume ayühueleneu quimfiel tañi pu yall ñi miyahun ti rüf dungu meu” (3 Juan 4).b

Maneluumu Jehová mu. Deu nielmu pichiqueche cam raquiduamcülelmu tamu nieal, loncontucunieaimu: chem tamu feipieteu Jehová doi fali chem huimtun rume niefule pu che cheu tamu mülen.

Dullilmu tamu nieal pichin pichiqueche, maneluhuaimu Jehová tamu cuidayaeteu tamu füchalerpun mu. Quiñeque che feipiafeimu: “Nienon mu pichiqueche, nielayaimu inei tamu cuidayaeteu füchalen mu”. Huelu femngechi raquiduamcülelayaimu. Jehová feipicünui tamu cuidayaeteu, quisu com femtripaquei tañi feipicünuel (Jos. 23:14).

Biblia feipi: “Maneluunge Jehová meu com tami piuque mu, ca eimi tami raquiduam mu recüluuquinolnge. Com tami rüpü meu raquiduamanieafimi, ca quisu norümaimu cheu tami miyahual” (Prov. 3:5, 6).

“Cuifi huechengequefun, fei feula füchalehuen, huelu turpu pequelafiñ ñi quisucünungen ti norngelu, ca tañi pu yall ñi mongetuyauquen cofque” (Sal. 37:25).

“Doyümnieafimün tamün cüdauyenieafiel ta Chau Ngünechen, quisu ngünenietuai ta mapu. Ca doyümnieafimün quisu tañi nor huercün dungu. Femngechi llohuaimün mai com tamün duamnieel” (Mat. 6:33).

Pu pichiqueche quiñe falin regalo Jehová mu cüpalu. Pu chau cüme cuidafiel mu tañi pu yall, rume ayühulquefingün Jehová. Eluquefingün tañi pu yall chem tañi duamnieel, quelluquefingün ñi ayüucüleal ca ñi cüme hueniyeafiel Jehová. Cüme raquiduamqueingün tunten yall tañi nieal ca inaquefingün Jehová tañi feipin ñi cüme tremümafiel tañi pu pichiqueche, chem huimtun müleafui rume cheu tañi mülen. Femün mu, pengelqueingün tañi rume piuqueyefiel tañi pu yall ca pequefingün chumngechi pequefi Jehová, quiñe falin regalo.