Pablo yengei Roma mu

Ti 3 rupachi ñi amuldunguyahun Pablo tañi misionerongen mu, puhui ta Jerusalén. Üye mu presuntucungei. Petu presulelu Pablo, peufaluhui Jesús ca feipieyu: “Roma mu amuaimi tami amuldungual”. Fei, Pablo yengei Cesarea mu. Epu tripantu presulei üyeu. Quiñe rupa, petu ñi juiciantucueteu ti gobernador Festo, Pablo feipi: “Ayünien ñi juiciantucuaeteu ti lonco ülmen Roma mu”. Festo feipi: “Tüfa ta ayünieimi, fei ta juiciantucuaimu”. Feimu farcu mu yengei Pablo Roma mu. Compañeyu Lucas ca Aristarco.

Petu amulelu engün, cürüftucu mahuni lafquen mu fentren antü. Feimu epe com che llicalen feipingün: “Layaiñ mai”. Huelu Pablo feipi: “Pu peñi, quiñe cüme püllü feipieneu: ‘Ngelai tami llicayal. Puhuaimi Roma mu ca montuai com tati pu che farcu mu amulelu’. Feimu fentecünumün tamün llicalen, com montuaiñ”.

Rupalu 14 antü tañi chaftufiel ti cürüftucu mahun, ngüneduamingün ñi inafülcülen mapu meu. Fei ta quiñe huapi, isla, Malta pingelu. Troncüpuhui ti farcu, fei nengümhuelai ca trafocahui. Huelu pu 276 che mongelen puhuingün mapu meu, com che chumngen chumngen puhui. Pu Malta che cüme llohueyu ca cütraltuingün ñi eñumtual pu che.

Rupalu 3 cüyen, pu soltau yefingün ta Pablo cangelu farcu mu, fei ñi puhual ta Roma. Cüme llohueyu pu peñi ca pu lamngen. Pablo pefilu engün, mañumtufi ta Chau Dios, cafei rume nehuencontui. Pablo 2 tripantu presulefui. Femngelu rume, mülefui quiñe ruca mu tañi adquintunieteu quiñe soltau müten. Pu che huitranmaquefeyu ta Pablo, fei quimeltungequefuingün Chau Dios ñi ngünenietual mapu ca Jesús ñi dungu. Cafei Pablo huirintuculelquefui carta pu trahunche Asia Menor ca Judea mu mülelu. Felei llemai, Chau Jehová adniefi ta Pablo ñi amuldungual tati cümeque dungu fill mapu püle.