Ñi pengelngeel Juan

Ti apostol Juan presulefui Patmos mu, fei Jesús pengelelfi 16 dungu tañi quimal chem ñi rupayal. Feichi mu, Juan pei cüpalechi antü mu yamniengetuai Chau Jehová tañi üi, ngünenietuafi ti mapu ca femngeai tañi ayünieel, chumngechi ñi femngequen huenu mu.

Juan pengelelngei cheu ñi anülen Chau Jehová huenu mu, afmatufali. Hualloñmalei 24 loncolelu. Lig tacun tucutuucülei ca oro corona. Chau Jehová tañi huancu mu tripai llüfqueñ ca allcüngei tralcan. Pu 24 loncolelu pochongnagqueingün ca püramyefingün ta Chau Jehová. Cangelu dungu ñi pengelngeel Juan feita quiñe fütra troquiñche caque tuhun-ngelu, fillque quehun dunguquelu, püramyequefingün Chau Jehová. Jesús, tati Cordero pingequelu, adniefi pu che cheu ñi mülen ti co hulquelu mongen. Juan ca pengelngei elungelu Jesús ñi ngünenieal huenu mu pu 24 loncolelu engün. Ti inan dungu ñi pengelngeel Juan feita Jesús ñi quehuamequen tati fütra filu ca pu huesaque püllü engün. Feiti fütra filu fei tati Huecüfü. Jesús huemünentufi engün huenu mu ca ütrüfnacümfi mapu meu.

Cafei, Juan pefi tati Cordero ca pu 144 mil che huitralelu Sion huincul mu, ayüfali ñi pefiel. Quiñe cüme püllü müpüyauquei huall mapu püle, fei nehuentu feipimequefi pu che: “Yamniefimün Chau Dios ca püramyefimün”.

Ca dungu ñi pefiel Juan fei tati Armagedón hueichan. Feichi mu, Jesús ca tañi pu hueichafe hueufingün pu huesaque che. Fei Juan pefi ti huenu ca ti mapu, com ñi cüme felen ca quiñeucülen. Huecüfü ca tañi pu inanieteu ngehuetulaingün. Mapu meu ca huenu meu com püramyefingün Chau Jehová tañi üi ca poyeniefingün Chau Jehová müten. Femngechi fentepui com ñi pengelngeel Juan.