Fill püle puhuingün pu cristiano

Pu apostol inafingün chem ñi huercüeteu Jesús ñi huldungulelafiel pu che tati cümeque dungu huall mapu mu. Ti 47 tripantu mu, pu cristiano Antioquía mu huercüfingün ta Pablo ca Bernabé ñi amuldungumeafiel caquelu huaria Asia Menor mu. Quiñeque tüfa Derbe, Listra ca Iconio. Ayühunquechi femingu ti cüdau.

Pablo ca Bernabé amuldungufi com pu che: pu ricu, pu pofre, huechequeche ca füchaqueche. Fentren engün eluhuingün ñi inayafiel ta Cristo. Cafei amuldungufingu ti gobernadorcülelu Chipre mu, Sergio Paulo pingelu, huelu quiñe calcu huentru ayüfui ñi catrütuaeteu engu. Pablo feipifi ti calcu huentru: “Chau Jehová castigayaimu”. Feimeu müten, ti calcu huentru traumaletui. Ti gobernador Sergio Paulo pefilu ñi rupan, feyentui.

Pablo ca Bernabé fill püle amuldunguquefuingu: rüpü mu ca fill ruca püle, feria ca fillque ngillatuhue ruca mu. Quiñe rupa, Listra mu, tremoltufingu quiñe cüntro huentru. Pu che pefilu feichi afmatun dungu, dios troquifingün ta Pablo engu Bernabé, fei cüpa poyefingün. Huelu Pablo ca Bernabé catrütueyu engün, fei feipingu: “¡Chau Dios müten mülei ñi poyengeal! Iñchiu ta huentru müten”. Fei acuingün quiñeque judio feipifilu pu che ñi caiñetuafiel ta Pablo. Feimu pu che curatufi, lalu troquifilu hula, fentecünuingün. Fei, huingüdentufingün huecun huaria mu. ¡Huelu Pablo petu mongelecafui! Müchai müten, quiñeque cristiano quellupaeyu engün ca yetueyu. Fei hula, Pablo huiñotui Antioquía mu.

Conchi 49 tripantu mu, Pablo ca tripai ñi amuldungumeal Asia Menor püle. Fei hula amuldungumefi tati pu che Europa mu. Amui ta Atenas, Éfeso, Filipos, Tesalónica ca caquelu lof mu. Feichi mu compañnieyu Silas, Lucas ca quiñe hueche huentru Timoteo pingelu. Quiñentrür cüdahuingün tañi adcünual hueque trahunche ca quellufingün ñi nehuencüleal engün. Pablo ca amui Corinto mu, epe 2 tripantu mülenagi fei mu ñi nehuentucuafiel ti trahunche. Amuldunguquefui, quimeltuchequefui ca huirintuculelfi carta fentren trahunche. Cafei deumaquefui tolto ruca ñi mongeluhual. Fei Pablo huiñotui Antioquía mu.

Ti 52 tripantu mu, Pablo ca tripai ñi amuldunguyahual Asia Menor mu ca caquelu lof mu. Norte püle puhui ta Filipos, fei hula puhui Corinto mu. Fentren tripantu mülepui Éfeso mu, fei ñi quimeltucheal, tremoltucheal ca quelluafiel ti trahunche. Cafei, fill antü quimeltuchequefui cheu ñi hueupingequem quiñe colegio mu. Fentren che allcütuingün, fei cüme elcünutuingün ñi mongen. Fentren lof mu Pablo amuldunguyahui Chau Dios ñi cümeque dungu, fei amui ta Jerusalén.