Quiñe soltau quimürpui ti rüf dungu

Filipos mu mülerquefui quiñe üllcha, contunieyu quiñe huesa püllü, fei pelontuchequefui. Feimu pu ngen üllcha hueuquefui fentren plata. Ti üllcha fentren antü mu inafi Pablo engu Silas fill püle Filipos mu. Ti huesa püllü ñi duam mu, ti üllcha huirarquefui: “Tüfachi 2 huentru cüdahuelquefi ta Fütra Chau Dios”. Fei Pablo nehuentu feipieyu: “¡Jesús tañi üi mu tripange tati üllcha mu!”. Fei ti huesa püllü tripatui.

Pu ngen üllcha ngüneduamlu ñi hueuhuenoal plata, rume lladcüingün. Huingüdyefingün Pablo engu Silas cheu ñi mülen pu gobernante ñidolcülelu huaria mu, fei feipifingün: “¡Tüfachi pu huentru inaquelai ti ley, ca pofolcamequeingün com huaria che!”. Fei condenangeingu ñi huimacangeal ca presungeal engu. Ti soltau loncolelu carcel mu yefi Pablo ca Silas ponhuitu doi dumiñcülelu mu. Cafei, traricünuñmafi tañi namun engu rangi 2 fütraque trafla mu, tüfa ta cepo pingequefui.

Pablo engu Silas ülcantuingu ñi püramyeafiel Chau Jehová, caquelu presu allcütuleingün. Pun meu, ruparumei quiñe fütra nüyün, mütroucafi ti carcel. Fei nülatripai puerta ca cepo, cafei llancünagi ti cadena. Ti soltau lefconpui carcel mu. Pefilu ñi nülalen com puerta, “lefmaupelaingün pu presu” pi ti soltau, fei nüi quiñe fütra cuchillo tañi langümuhual.

Feimeu müten Pablo nehuentu feipi: “¡Felenge! ¡Com mülecaiñ tati!”. Fei ti soltau lefcülen amui cheu ñi mülen Pablo engu Silas ca lucutunagi. Fei ramtufi: “¿Chumafun tañi montual?”. Huiñoldungungei: “Eimi ca tami pu che feyentumün Jesús mu”. Feimu Pablo engu Silas quimeltufingu Chau Jehová tañi dungu. Ti soltau ca com tañi pu che fautizahuingün.