Jesús dullifi ta Saulo

Saulo Roma chengefui, Tarso mu cüpai. Fariseongefui, cüme quimniefui pu judio tañi ley ca üdeniefui pu cristiano. Feimu contuyahulquefui ñi ruca mu, huingüdentufi ti pu huentru, pu domo, fei ñi presuafiel engün. Curatungelu ti discipulo Esteban ñi langümngeal, Saulo re adquintulei müten.

Saulo presuquefui pu cristiano Jerusalén mu, huelu ayüniefui caque mapu mu ñi puhual tañi femmequen. Feimu feipifi tati hunen lonco sacerdote: “Cüpa amun ta Damasco ñi caiñetuafiel pu cristiano”. “Felei, amunge” pingei. Saulo püllelelu Damasco mu, alofrumei quiñe pelon, fei tranapui mapu mu ca allcüi ñi feipingen: “Saulo, ¿chumngelu caiñetumequeen?”. Saulo ramtui: “¿Inei am ta eimi?”. Fei huiñoldungungei: “Iñche ta Jesús. Damasco mu conpunge, üyeu feipingeaimi tami chumal”. Feichi mu, Saulo traumalehuei, fei nüñmangei ñi cuhu ñi yengeal ta Damasco.

Damasco mu mülefui quiñe cüme cristiano, Ananías pingelu. Jesús feipifi ta Ananías: “Norngelu pingechi rüpü mu amunge. Fei Judas ñi ruca mu quintuaimi quiñe huentru Saulo pingelu”. Ananías feipieyu: “Ñidol, allcüquefiñ fentren dungu tüfachi huentru mu, presumequefi tami pu discipulo”. Huelu Jesús feipifi: “Pemeafimi. Iñche ta dullifiñ tüfachi huentru ñi huldungual Chau Dios ñi dungu fentren che ca tuhun-ngelu”.

Ananías pemefi ta Saulo, fei feipifi: “Peñi, Jesús huercüeneu tami huiño pelotual”. Feimeu müten, Saulo pelotui. Quimürpui fentren dungu Jesús mu, fei cristianongetui. Fautizahui, fei eluhui ñi amuldungucheal caquelu cristiano engün Chau Dios ñi ngillatuhue ruca mu. ¿Müna afmatulehuepelai pu judio? Feula Saulo ürque amuldungumequetui. “¿Tüfa no am ti huentru caiñetuquefulu Jesús ñi pu discipulo?” pingün pu judio.

Saulo amuldungufi pu Damasco che 3 tripantu mu. Pu judio üdeeyu engün, feimu raquiduamingün chumngechi ñi langümafiel. Huelu pu cristiano quimingün chem ñi femngeal Saulo, feimu quellufingün ñi lefmahual. Quiñe cülco mu tucucünufingün, fei ñi nacümngeal ti fütra malal mu.

Saulo amui ta Jerusalén, fei ayüniefui ñi peafiel pu peñi ca pu lamngen. Huelu llicanieyu engün. Feimu, quiñe discipulo cüme piuquengelu, Bernabé pingelu, yefi cheu ñi mülen pu apostol. Cüme nütramcalelfi engün chumngechi ñi cüme elcünutun ñi mongen Saulo. Saulo eluhui ñi trahuluhual pu cristiano engün Jerusalén mu ca com piuque mu amuldungui Chau Dios ñi cümeque dungu. Rupalu ta tiempo, Pablo pingetui.