Chem no rume catrütulaeyu engün

Quiñe cüntro huentru fill antü elcünungequefui Chau Dios ñi ruca meu, fei ñi pediafiel plata rupalu ti che. Nagantü mu, pefi ta Pedro ca Juan petu ñi conpumequen Chau Dios ñi ruca mu, fei feipifi engu: “Füreneen, eluen quiñe moneda”. Pedro feipieyu: “Eluafeyu doi cümelu plata mu. Jesús tañi üi meu, ¡huitrapüratunge ca trecatunge!”. Pedro quellueyu ñi huitratual, fei trecatui. Tati pu che rume ayühuingün pefilu tüfachi afmatun dungu ñi rupan, fei feyentuingün.

Huelu pu sacerdote ca pu saduceo lladcüingün, rume illcuingün. Presuyefingün pu apostol ñi juiciantucuaeteu ti Sanedrín, tüfa tati troquiñche juzgaquefilu pu judio. Fei pu apostol ramtungeingün: “¿Inei elueimünmeu nehuen tamün tremoltuafiel tüfachi huentru?”. Pedro feipi: “Jesús elueiñmu tati, feiti huentru tamün langümfiel”. Pu loncolechi religioso nehuentu feipingün: “¡Fentecünumün tamün huldungumequen Jesús mu!”. Pu apostol feipingün: “Mülei taiñ huldunguleal. Fentecünulayaiñ”.

Pedro ca Juan lifrecünungeingu, fei müchai müten nütramelfingu pu discipulo chem ñi rupan engu. Quiñentrür llellipufingün ta Chau Jehová: “Fürenemuiñ, quellumuiñ taiñ llicanoal, fei taiñ huldunguleal eimi mu”. Chau Jehová eluniefi ñi nehuen ñi amuldungucheal ca tremoltucheal. Fei doi fentren che feyenturpui. Fente ñi ütrireteu pu saduceo, presueyu engün. Huelu, pun meu, Chau Jehová ñi cüme püllü nülafi ti carcel ñi conhue, nentufi ti pu apostol ca feipifi: “Huiño amumün Chau Dios ñi ruca mu tamün amuldungual”.

Hunlu, ti Sanedrín feipingei: “¡Cüme cerrantuculerquei ti carcel, huelu pu huentru tamün presufiel ngerquelai! ¡Amuldungumequeingu Chau Dios ñi ruca mu!”. Fei ca huiño presuyengeingün pu apostol tati Sanedrín mu. Ti hunen lonco sacerdote feipi: “¡Cüme feipicünuhuiyiñ tamün quimeltuhuenoal Jesús mu!”. Pedro feipi: “Hunelu mülei taiñ femal Chau Dios ñi feipin, pu huentru ñi feipin no”.

Pu loncolechi religioso lladcüingün, rume huesa illcuingün, cüpa langümfingün pu apostol. Huelu quiñe fariseo, Gamaliel pingelu, huitrapürai, fei feipi: “¡Cuñiutuculemün! ¿Chau Dios quelluntucuniepelafi tüfachi huentru? ¿Ayüniepeimün mai chaftuafiel ta Chau Dios?”. Ti Sanedrín inafi tañi feipin. Lifrecünufingün pu apostol. Huelu petu tañi femnon, cüpafcafingün, fei ca huiño feipifingün ñi dunguhuenoal Jesús mu. Femngelu rume, pu apostol llicalaingün, amuleingün ñi quimeltuchequen Chau Dios ñi ruca mu ca fill ruca püle.