Mongetui Jesús

Deu lalu Jesús, quiñe ülmen huentru José pingelu feipifi ta Pilato ñi elungeal Jesús tañi cuerpo. Fei tucufi lino pañu nielu cüme nümün-ngechi lahuen, ca elcünufi quiñe hue rüngan lolo meu. Fei fütra cura mu tacucünufi ti lolo. Pu loncolechi sacerdote feipifingün ta Pilato: “Jesús ñi pu inanieteu hueñepayafui tañi cuerpo, fei feipiafuingün ñi huiñomongetun”. Feimu Pilato feipi: “Cüme cerracünungepe ti rüngan ca elcünumün guardia”.

Cüla antü rupalu, quiñeque domo pemefingün ti rüngan lolo. Petu hunlu, pefingün ñi nülalen ti lolo, famentungei ti fütra cura. Ponhuitu ti lolo meu mülerquei quiñe cüme püllü, fei feipi: “Ngelai tamün llicayal. Feipimefimün pu discipulo ñi pemeafiel Galilea mu”.

María Magdalena lefcülen amui ñi nütramelafiel ta Pedro ca Juan. Feipifi: “Entungei Jesús tañi cuerpo”. Pedro ca Juan matu pemefingu ti rüngan lolo. Ngerquelai Jesús, fei amutuingu quisuque tañi ruca mu.

Fei hula, María huiñotui ti rüngan lolo meu. Ponhuitu mu mülerquei 2 cümeque püllü, fei feipifi engu: “Entungei tañi Ñidol. Quimlan cheu ñi elcünungetun”. Feichi mu huiñoquintulu, pefi quiñe huentru, fei raquiduami ñi cüdaumequen tiye mu. Feimu ramtufi: “¿Feipiafen cheu elcünufimi Jesús tañi cuerpo?”. Ti huentru feipieyu: “¡María!”. Feimeu müten, María quimtucui ñi ineingen. “¡Quimeltufe!” pifi, fei nehuentu nüniefi ta Jesús. Jesús feipieyu: “Feipimefinge tañi pu peñi tami pefiel”. María amufemi ñi feipiafiel pu discipulo: “¡Pefiñ ta Jesús!”.

Feichi antü 2 discipulo cüpalu Jerusalén mu amui ta Emaús huaria mu. Petu amulefulu engu, quiñe huentru trafyemefi ca compañfi engu, fei ramtufi: “¿Chem dungu nütramcamequeimu?”. “¿Rüf quimlaimi am?” pingei. “Deu rupauyei 3 antü ñi langümngen ta Jesús. Huelu feula quiñeque domo feipingün ñi mongelen”. Fei ti huentru ramtui: “¿Feyentuquelaimün am ñi feipin Chau Dios ñi pu huerquen? Cüme feipicünuingün ñi layal tati Cristo ca ñi huiñomongetual”. Fei eluhui ñi quimeltulelafiel ñi feipin Chau Dios ñi huirintucuel. Puulu engün ta Emaús, pu discipulo feipifingu: “Quiñentrür mülenagaiñ”. Petu imequelu engün, Jesús mañumtufi ta Chau Dios tati cofque mu. Fei quimtucuingün ñi Jesús ngen. Feimu müten peufaluhuelai.

Feichi 2 discipulo lefcülen amuingu ta Jerusalén. Puulu engu cheu ñi mülen pu apostol, feipifingu tañi rupan. Mülelu ponhuitu ti ruca mu, peufaluhui ta Jesús. Huelu pu apostol feyentulafuingün ñi Jesús ngen. Jesús feipi: “Peñmaen tañi cuhu, ngüneduamüñmaen. Huirintuculei ñi mongetuafel tati Cristo”.