Jesús huiñomongeltufi Lázaro

Jesús niefui 3 cümeque hueni Betania mu. Lázaro ca tañi 2 deya Marta engu María. Jesús camapulefui, feimu Marta ca María feipifalfi: “Rume cutrancülei Lázaro. Matu cüpange”. Huelu Jesús amufemlai. Epu antü rupai, fei feipifi tañi pu apostol: “Amuaiñ Betania mu. Lázaro umaucülei, iñche trepelmeafiñ”. Pu apostol feipingün: “Huelu umautulele, cümelcaletuai”. Feimu Jesús cüme feipifi engün: “Lázaro lai”.

Puulu Jesús ta Betania, rupauyefui 4 antü ñi lan ta Lázaro. Fentren che amui ñi pemeafiel ta Marta engu María. Marta quimlu ñi acun Jesús, lefcülen amui ñi trafyemeafiel. Hueñancülen feipifi: “Ñidol, mülefulmi tüfa meu, ñi lamngen mongelecayafui”. Jesús feipi: “Marta, tami lamngen huiñomongetuai. ¿Felei?”. Marta feipi: “Felei, afchi antü mu huiñomongetuai tati”. Jesús feipieyu: “Iñche tati huiñomongeltuchequelu ca tati hulquelu mongen”.

Marta cafcü dungumefi ta María: “Acui Jesús”. Fei María lefcülen amui cheu ñi mülen Jesús, tati pu che inaeyu. Puulu, lucutunagi tañi namun püle, af ngümalai. Fei ngümalen feipifi: “Ñidol, mülefulmi tüfa meu, ñi lamngen lalayafui”. Jesús ngüneduami ñi cutrantupiuquelen, fei ca inaye ngümai. Pu che pefilu ñi ngümamequen Jesús, feipingün: “Quimfali ñi fente piuqueyeniefiel ta Lázaro”. Ca quiñeque che ramtuhuingün: “¿Chumngelu chi quellulafi tañi hueni?”. ¿Chumafui cai Jesús?

Jesús amui ti rüngan lolo mu, cheu ñi elngen Lázaro, quiñe fütra cura mu taculerquei. Fei feipi: “Entufimün ti cura”. Marta feipi: “¿Deu nümülepelai? Deu rupai 4 antü”. Feingelu rume, entungei ti cura ca Jesús llellipui: “Chau, eimi allcütuen, fei mañumeyu. Eimi rumel allcütuqueen, huelu nehuentu feipin tüfa, femngechi pu che feyentuai tami huercüfiel ta iñche”. Feimeu ca nehuentu feipi: “¡Lázaro, tripapatunge!”. Afmatufali chem ñi rupan hula: Lázaro tripatui, tañi cuerpo petu trarilefui pañu mu, chumngechi ñi elngequefel pu la. Fei Jesús feipi: “¡Entufimün ti pañu, fei amutupe!”.

Fentren che, pefilu ñi huiñomongetun Lázaro, feyentuingün Jesús mu. Huelu quiñeque che feipimefi pu fariseo. Fei, pu fariseo raquiduamingün chumngechi ñi langümafiel ta Lázaro ca Jesús. Quiñe apostol, Judas Iscariote pingelu, ellca feipimefi pu fariseo: “Hultucufili ta Jesús eimün meu, ¿chem elumuan?”. “Eluhuaiñ 30 moneda platangelu” pingei. Feimeu müten, Judas raquiduammequefui chumngechi hultucuafiel ta Jesús.