Elisabet niei quiñe pichiche

Deu rupauyei 400 tripantu ñi huiño deumangetun Jerusalén ñi cura malal. Feichi mu mülefui ti sacerdote Zacarías ca tañi domo Elisabet, püllelefuingu Jerusalén mu. Fentren tripantu rupauyei tañi niehun engu, huelu nielaingu pichiqueche. Quiñe antü, Zacarías petu lüpümmequefui incienso Chau Jehová ñi ruca mu, fei peufaluhui ti cüme püllü Gabriel pingelu. Zacarías rume llicai, huelu Gabriel feipifi: “Llicalayaimi, cüpaleyu cümeque dungu Chau Jehová mu. Tami domo Elisabet niepüñeñai, Juan pingeai ti pichiche. Chau Jehová dullifi ta Juan ñi femal quiñe falin cüdau”. Fei Zacarías ramtui: “Iñche ca tañi domo deu füchaleyu, fei ¿rüfngepei mai tami feipin?”. Gabriel feipi: “Chau Jehová mu cüpai tüfachi cüme dungu. Huelu feyentulaimi, feimu pepi dunguhuelayaimi choyüngele hula ti pichiche”.

Zacarías alüñmai ñi tripayal Chau Jehová ñi ruca mu. Tripapatulu, pu che ayüfuingün ñi quimal chem ñi rupan. Huelu Zacarías pepi dunguhuelai, re maichicünui ñi cuhu. Femngechi pu che ngüneduami Zacarías ñi pefiel quiñe afmatun dungu Chau Jehová mu cüpalu.

Fei hula, Elisabet niepüñeñi, fei niei quiñe pichi huentru, femtripai ñi feipin ti cüme püllü. Tañi pu hueni ca tañi pu familia pepafingün ti pichiche. Rume ayühuingün. Fei Elisabet feipi: “Juan pingei”. Huelu feipingün: “Tami pu che mu inei no rume nielai feichi üi. Tañi chau ñi üi niepe”. Huelu Zacarías huirintucui: “Juan pingei”. Feimeu müten, huiño dungutui Zacarías. Huall püle Judea mu quimniengei ti cüme dungu, fei ti pu che ramtuhuingün: “¿Chem chengeai tüfachi pichiche?”.

Fei Zacarías llohui Chau Jehová tañi nehuen ca feipi: “¡Püramyengepe ta Chau Jehová! Feipicünufi ta Abrahán ñi huercüafiel ti Mesías fei taiñ montulaeteu. Juan profetangeai ca quimeltuafi tati pu che ñi cüpayal ti Mesías”.

Cafei, Elisabet ñi pariente María pingelu, ca rupai afmatun dungu. Cüpalechi quimeltun peafiyiñ.