Gabriel pemefi María

Nazaret huaria, Galilea mapu mu mülefui quiñe üllcha domo María pingelu. Parienteyefi ta Elisabet. María epe puucülefui ñi niehual José ti carpintero engu. Elisabet deu yeniei 6 cüyen tañi niepüñeñcülen, fei ti cüme püllü Gabriel peufaluhui María mu ca feipifi: “Mari mari, María. Chau Jehová rume füreneeimu”. María adümlafi chem ñi feipingen, feimu Gabriel feipieyu: “Niepüñeñaimi, choyüaimi quiñe pichiche. Jesús üituculelafimi. Reyngerpuai, ca tañi lonco ülmencülen aflayai”.

María feipi: “¿Chumngechi rupayafui tüfa? Iñche petu fütangelan”. Gabriel feipi: “Chau Jehová com pepiluhun-ngei. Fei ñi nehuen mu nieaimi quiñe pichiche. Elisabet ca niepüñeñcülei”. María feipi: “Iñche cüdahuelquefiñ ta Chau Jehová. Femtripape tami feipiel”.

María pemefi ta Elisabet tañi huaria mu, huincul püle mülelu. Chalifilu müten, ti pichiche nengümuhui Elisabet ñi pütra mu. Fei, Chau Jehová ñi nehuen mu Elisabet feipifi: “María, Chau Jehová füreneeimu. Rume ayühuleneu ñi pepaeteu tati Mesías ñi ñuque”. María feipi: “Com tañi piuque mu püramyefiñ ta Chau Jehová”. Fei María mülenagi 3 cüyen Elisabet ñi ruca mu. Fei hula, huiñotui Nazaret mu.

José quimlu ñi niepüñeñcülen María, pilai ñi nieafiel. Fei quiñe cüme püllü peufaluhui peuma mu, ca feipifi: “Ngelai tami llicayal, niehuaimu müten. María chem huesa dungu no rume femlai”. Fei José niehui María engu, ca yefi tañi ruca mu.