Meli hueche poyefingün Chau Jehová

Nabucodonosor elfalcünufi ta Aspenaz ñi loncoleal Judá ñi pu principe presuyengepalu Babilonia mu. Cafei, mülefui ñi dullial pu doi cüme felechi huechequeche doi adümuucülelu. Pu dullielchi huechequeche elungeingün ñi doi cüme quimeltungeal 3 tripantu mu, fei ñi elungeal falinque cüdau Babilonia mu. Feimu mülefui ñi quim papeltual, quim huirial ca quim dungual acadio quehun. Cafei elungeingün trür femngechi ñi iyal ülmen iyael. Daniel, Hananías, Misael ca Azarías dullingeingün feichi troquiñ huechequeche mu. Huelu Aspenaz Babilonia üi tuculelfi: Beltsasar, Sadrac, Mesac ca Abednego. Com feichi dungu ñi quimeltungeal engün püntülafeyu Chau Jehová mu. ¿Chem pimi? ¿Fempeafui mai?

Tüfachi 4 hueche ayüniefuingün inayal Chau Jehová ñi feipin. Chau Jehová tañi ley feipifui ñi ingenoafel quiñeque iyael ñi iqueel pu ülmen che. Feimu feipifingün ta Aspenaz: “Fürenemuiñ, ilayaiñ tüfachi iyael”. Huelu Aspenaz feipi: “Inolmün cümeque iyael, ti lonco ülmen quimtucuai tamün yafüngehuenon, fei langümaeneu”.

Daniel raquiduami, fei feipi: “Fürenemuiñ, elumuiñ co, fillque tucucan ca pishcu 10 antü mu. Fei ngüneduamaimi taiñ chumlen, trürümuaiñ caquelu huechequeche mu”. Ti guardia cümelu troquifi.

Rupalu 10 antü, Daniel ca tañi 3 hueni doi cüme adngeingün. Chau Jehová rume ayühui pefilu ñi inafiel engün ñi feipin, ca elufi quimün ta Daniel ñi adümafiel afmatun dungu.

Rupalu 3 tripantu, Aspenaz pengelelfi ta Nabucodonosor pu huechequeche. Ti lonco ülmen trürümfi pu hueche, huelu Daniel, Hananías, Misael ca Azarías doi niefui adümuhun. Feimu dullifi engün ñi cüdahuelaeteu. Fentrenque rupa, ti lonco ülmen ramtufi engün falinque dungu. Chau Jehová ñi duam mu, doi niefuingün quimün, trürlafuingün caquelu quimche ca calcu cüdahuelquefilu ti lonco ülmen.

Daniel, Hananías, Misael ca Azarías entungeingün tañi mapu mu, huelu loncontucuniefuingün ñi coneltulen Chau Jehová tañi troquiñche mu. ¿Eimi cai? Quisulelmi, ngenole tami chau, tami ñuque, ¿fempeaimi mai ñi feipin Chau Jehová?