Apümngei Jerusalén

Pu Judá che fentren rupa quiñepülecünufingün ta Chau Jehová, fei eluhuingün ñi poyeafiel coilaque dios. Chau Jehová ayüfui ñi norümtuafiel engün, feimu feipifi tañi pu huerquen ñi quelluafiel pu Judá che. Huelu allcütulaingün, doi mai ayentueyu engün. ¿Chumi cai Chau Jehová ñi poyengehuenoal coilaque dios?

Babilonia ñi lonco ülmen, Nabucodonosor pingelu, fill püle hueichayauquefui ñi ngünenierpuafiel doi fentren mapu. Ti hunen rupa ñi lefcontufiel Jerusalén, presuntucufi ti lonco ülmen Joaquín, pu principe, pu hueichafe ca pu cüdaufe, fei yefi engün ta Babilonia. Cafei müntuñmafi itrofillem Chau Jehová ñi ruca mu mülelu. Fei hula, Nabucodonosor lonco ülmencünufi ta Sedequías Judá mu.

Sedequías inaquefui ñi feipieteu Nabucodonosor. Huelu pu coilaque huerquen ca tati pu che caque tuhun-ngelu feipiquefeyu ñi caiñetuafiel ta Babilonia. Fei Jeremías ngülamtufi ta Sedequías: “Caiñetufilmi Babilonia, layai ta che, conpuai filla ca cutran Judá mu”.

Feipingelu rume, rupalu 8 tripantu, Sedequías quiñehui Egipto engu, fei ñi caiñetuafiel Babilonia. Feimu Nabucodonosor ca huiño lefcontufi Jerusalén. Tañi pu hueichafe umañpuingün huallontu Jerusalén. Fei Jeremías feipifi ta Sedequías: “Chau Jehová feipi: ‘Eluunge tami huehuaeteu Babilonia, femngechi montuaimi eimi ca tati huaria. Femnolmi, lüpümngeai Jerusalén ca presuyengeaimi’”. Sedequías feipi: “¡Hueungelayan!”.

Rupalu 18 cüyen, pu Babilonia hueichafe quiñe püle conpuingün Jerusalén tañi cura malal mu. Fei, lüpümfingün ti huaria ca Chau Jehová tañi ruca, cafei langümfingün ca presuyefingün fentren che.

Sedequías lefmahui, huelu pu Babilonia hueichafe inantucufingün, fei Jericó mu presuntucufingün ca yefingün cheu ñi mülen Nabucodonosor. Ti lonco ülmen obligafi Sedequías ñi adquintual chumngechi ñi langümngen tañi pu fotüm. Fei hula, traumalngei ca carceltucungei. Üye mu, lai Sedequías. Huelu Chau Jehová feipicünufi pu Judá che: “Rupayai 70 tripantu, fei huiñotuaimün Jerusalén mu”.

Pu huechequeche presuyengelu Babilonia mu, ¿chumingün? ¿Püntütripapeingün mai Chau Jehová mu?