Chau Jehová ñom piuque mu pefi ta Jonás

Asiria mapu mu mülefui Nínive huaria. Üye mu pu che femquefui huesaque dungu. Feimu Chau Jehová huercüfi ta Jonás ñi norümtuafiel pu Nínive che. Huelu cañpüle amui Jonás, farcu mu amui ta Tarsis.

Farcu mu amulelu engün, fütra cürüftucu mahuni. Pu che rume llicaingün, ca llellipufingün tañi pu dios, ca ramtuhuingün: “¿Chumngelu anta femngechi rupamequeiñ?”. Feimu Jonás feipi: “Iñche ta culpan. Femlan Chau Dios tañi feipieteu, lefmahun. Ütrüftucumuchi co meu, femngechi tüngnagai ti lafquen”. Pu cüdauquelu farcu mu ayülafui ñi femal. Huelu fente ñi feipifeipiyeteu Jonás, femingün. Fei tüngnagi ti lafquen.

“Feulaque layan” pi Jonás. Petu ñi ñamconün lafquen mu, llellipufi Chau Jehová. Fei Chau Jehová ñi duam mu, quiñe fütra challhua lümüeyu, huelu langümlaeyu. Ponhuitu challhua mu Jonás llellipufi Chau Jehová: “Rumel feman com tami feipin”. Chau Jehová ñi duam mu, 3 antü rupai Jonás ponhuitu challhua mu, fei hula rapinentueyu ti challhua mapu meu.

Chau Jehová montulfi ta Jonás, huelu ca huiño huercüfi Nínive mapu mu. Feulaque Jonás amui. Puulu üyeu, feipifi tati pu che: “Chau Jehová apümafi tüfachi huaria puule 40 antü”. Huelu afmatufali ñi femün pu Nínive che, allcütufingün ñi feipin Jonás, fei norümtuingün tañi huesa femmequen. Ti lonco ülmen Nínive mu feipifi tañi troquiñche: “Llellipuafimün Chau Dios ca repentiutuaimün, femngechi langümngelayafuiñ chi”. Chau Jehová pefi tañi nor raquiduamtun engün, feimu montulfi.

Jonás pefilu ñi apümngenon ti huaria, rume huesa duami. Pichiñma mu raquiduamaiñ: Chau Jehová ñom piuque mu troquifi ta Jonás ca cutranpiuqueyefi. Huelu Jonás cutranpiuqueyelafi pu Nínive che. Doi mai, anücünuhui miñche quiñe anümca mu ñi llaufeñtual, maltrangcülei ñi ange. Huelu tonfüi ti anümca, fei Jonás rume lladcüi. Chau Jehová feipieyu: “Doi falintuniefimi feiti anümca, huelu falintulafimi pu Nínive che. Iñche cutranpiuqueyefiñ engün, feimu montulfiñ”. Chau Dios, ¿chem quimeltufi ta Jonás tüfa mu? Trürümngefule chem anümca mu rume, doi falin-ngefui pu Nínive che.