Quiñe cüme püllü cuñiutucufi ta Ezequías

Pu Asiria che ngünenierpuingün ti 10 troquiñche Israel. Feimu Senaquerib, lonco ülmencülelu Asiria mu, ayüniefui ñi nieafiel ti 2 troquiñche Judá. Fill huaria püle Judá mu, Senaquerib amulefui ñi ngünenieafiel caque quiñeque. Senaquerib doi ayüniefui ñi ngünenierpual Jerusalén, huelu quimnielafui Chau Jehová ñi cuñiutucuniefiel feichi huaria.

Ezequías lonco ülmencülefui Judá mu, fei cullifi ta Senaquerib fentren plata ñi lefcontunoafiel Jerusalén. Senaquerib llohui ti plata, huelu lefcontufingün müten. Pu Jerusalén che rume llicalefuingün pefilu ñi doi fülcülepan pu Asiria hueichafe. Feimu Ezequías feipi: “Llicalayaimün. Nehuen-ngeingün pu Asiria hueichafe, huelu Chau Jehová doi nehuentucuaiñmu”.

Senaquerib huercüfi quiñe huentru, rabsaque pingequefulu, fei ñi ayentuafiel pu Jerusalén che. Fei huecuntu huaria mu, feiti rabsaque nehuentu feipi: “Jehová quellulayaimünmeu. Ezequías ngünencadungumequei, famentuafimün tañi feipin. Chem dios no rume chumlayafui tamün cuñiutucuaeteu, iñchiñ huehuaiñ llemai”.

Ezequías ramtufi ta Chau Jehová chem ñi femal, fei huiñoldungungei: “Llicalayaimi tañi feipin feiti rabsaque. Senaquerib ngünenielayafi Jerusalén”. Senaquerib huercülelfi ta Ezequías quiñeque carta feipilelu: “Fentecünuumün. Jehová montul-layaimünmeu”. Feimu Ezequías llellipui: “Chau Jehová, fürenemuiñ, montulmuiñ. Femngechi quimngeai eimi tami rüfngechi Dios ngen, eimi müten”. Chau Jehová huiñoldungui: “Asiria ñi lonco ülmen conpulayai Jerusalén mu. Iñche cuñiutucuniean tañi huaria”.

Senaquerib rüf maneluucülefui pichiñma mu ñi ngünenierpuafiel Jerusalén. Pu Asiria hueichafe toltoucülefuingün huecuntu Jerusalén mu. Punlu, Chau Jehová huercüfi quiñe cüme püllü ñi hueichayal. ¡Langümfi 185 mil hueichafe! Pu doi nehuen-ngechi hueichafe langümngei, feimu Senaquerib huiñotui tañi mapu mu. Femngechi femtripai ñi feipicünuel Chau Jehová, montulfi ta Ezequías ca Jerusalén. ¿Eimi cai? Mülefulmi üyeu, ¿maneluupeafuimi mai Chau Jehová mu?