Jehoiadá llicalai

Jezabel tañi domo püñeñ, Atalía pingefui. Rume huesa piuquengefui, tañi ñuque reque. Atalía fütayefi ti lonco ülmencülelu Judá mu. Lalu tañi füta, lonco ülmen-ngerpui tañi huentru püñeñ. Lalu tañi püñeñ, Atalía ngünenierpui Judá. Atalía langümfi inei rume, fei ñi müntuñmangenoal tañi lonco ülmencülen. ¡Langümfi tañi pu nieto cafei! Feimu com pu che rume llicaquefui.

Ti hunen lonco sacerdote Jehoiadá ca tañi domo, Jehoseba pingelu, quimniefui ñi rume huesa femmequen Atalía. Feimu cuñiutucufingu ti pichiche Jehoás, Atalía tañi nieto, ellcalen tremümfingu Chau Dios tañi ruca mu. Quimngefule tañi femün, langümngerpuafuingu. Cuñihun-ngelu rume, femingu müten.

Jehoás nielu 7 tripantu, Jehoiadá trahulfi com pu loncolechi hueichafe ca pu Leví che. Fei feipifi engün: “Catrütuafimün inei rume ñi conpunoal Chau Dios ñi ruca mu”. Jehoiadá lonco ülmencünufi ta Jehoás. Feimeu, pu Judá che nehuentu huiraringün: “¡Cümelcalepe taiñ lonco ülmen!”.

Allcülu Atalía ñi huaqueñcülen tati pu che, lefcülen amui Chau Dios tañi ruca mu. Pefilu ti hue lonco ülmen, nehuentu feipi: “¡Caiñetungen! ¡Caiñetungen!”. Pu loncolechi hueichafe entufingün ta Atalía, fei langümfingün. ¡Atalía rume huesalcafi Judá troquiñche! Huelu feula cai, ¿chem am ta rupai?

Jehoiadá quellufi Judá troquiñche, feipicünuingün ñi poyeafiel Chau Jehová müten. Jehoiadá tañi duam mu, apümngei Baal tañi ruca ca ti pu coilaque dios. Cafei, elfalcünufi pu sacerdote ca Leví che ñi cüdahual Chau Jehová tañi ruca mu, fei ñi huiño poyengetual Chau Jehová chumngechi ñi femngequefel cuifi. Ca elfalcünufi pu cuidaquefilu puerta ñi conpunoal inei rume lifngenolu Chau Jehová ñi adquiñ mu. Jehoiadá ca pu loncolechi hueichafe yefingün ta Jehoás ülmen ruca mu, fei ñi anüleal cheu ñi anüquen pu lonco ülmen. Ngehuetulai Atalía ca poyengehuetulai Baal. Feimu pu Judá che rume ayühuingün, inei no rume catrütuhuelaeyu engün tañi poyeafiel ta Chau Jehová. ¿Chem pimi? ¿Llican chengelafui Jehoiadá? Tañi llican chengenon mu quellufi fentren che, ¿inaduamimi?