Castigangei ti huesa ülmen domo

Jezreel mu mülerquefui 2 huentru: Ti lonco ülmen Acab ca Nabot. Acab adquintuquefui Nabot tañi anüm ofad, fei ayüfui ñi ngillañmayafiel. Huelu ti ley ñi elcünuel Chau Jehová feipilefui: “Ngelai ñi fendengeal ti mapu tami elcünueteu tami chau”. Feimu, Nabot pilai ñi fendeal, cüme femi. ¿Chumi cai Acab? Respetalafi ñi feipin Nabot. Rume huesa duamnagi, fei tripahuelai tañi pieza mu, iquelafui rume.

Ti huesa ülmen domo Jezabel fütayefi ta Acab, fei feipifi: “Eimi ta lonco ülmencüleimi Israel mu, chem rume tami ayünieel nieafuimi. Iñche ta eluayu feichi mapu”. Fei huercüfi quiñeque carta tati pu loncolelu feichi huaria mu. Feipifi: “Coila dalluntucuafimün Nabot ñi malisiafiel ta Chau Dios, fei curatungepe ñi langümngeal”. Pu loncolelu femingün com ñi feipieteu Jezabel. Fei Jezabel feipifi ta Acab: “Nabot lai. Feulaque nieafimi tañi mapu”.

Jezabel langümfi ta Nabot ca caquelu cümeque che, langümfi fentren che poyequefilu ta Chau Jehová. Cafei Jezabel poyequefui coilaque dios ca femquefui huesaque dungu. Huelu Chau Jehová com peniefui ñi huesa femquen. Fei, ¿chumfi ta Jezabel?

Pichin rupalu ñi lan Acab, tañi fotüm Jehoram lonco ülmen-ngerpui. Fei Chau Jehová huercüfi ta Jehú ñi castigayafiel ta Jezabel ca tañi familia.

Tañi carretela mu Jehú amui ta Jezreel, cheu ñi mülequefel Jezabel. Jehoram ca amui tañi carretela mu ñi trafyemeafiel ta Jehú. Pefilu, Jehoram ramtufi: “¿Com cümelcalei?”. Jehú huiñoldungui: “Femlai. Huesaque dungu femmequei tami ñuque Jezabel”. Feimu Jehoram eluhui ñi lefmahual, huelu petu ñi amutunon, Jehú ütrüftufi quiñe flecha, fei langümfi.

Jehú amui Jezabel tañi ülmen ruca mu. Jezabel quimniefui ñi cüpalen Jehú, feimu colotucünuhui ca adelcacünuhui tañi lonco, fei huente tañi ruca mu üngümniefi inaltu ventana mu. Aculu, Jezabel huesa pitufi. Fei Jehú nehuentu feipifi pu cüdaufe inafülcülelu Jezabel mu ñi ütrüfnacümafiel. Femngechi lai Jezabel.

Fei hula Jehú langümfi 70 fotüm ñi niefel Acab. Cafei catrütufi ñi poyengehuenoal Baal feichi mapu mu. ¿Inaduamimi? Chau Jehová com quimniei, fei yochi cüme castigayafi pu huesa femquelu.