Chau Jehová cuñiutucufi ta Jehosafat

Jehosafat ngüneniequefui Judá, fei apümcafi Baal ñi pu altar ca coilaque adentun. Jehosafat ayüfui ñi quimeltucheal Chau Jehová ñi dungu. Feimu huercüfi pu principe ca pu Leví che ñi quimeltucheal fill püle Judá mu.

Caquelu troquiñche püllelelu Judá mu quimniefuingün Chau Jehová ñi quelluquefiel tañi pu che, feimu llicalefuingün ñi lefcontuafiel Judá. Doyelchi mai, eluquefuingün regalo ta Jehosafat. Huelu pu Ammón che, Moab che ca caquelu troquiñche Seír mapu mu mülelu lefcontufingün ta Judá. Jehosafat quimtucui ñi duamnieel Chau Jehová tañi quellu. Feimu trahulfi com pu huentru, domo ca pichiqueche Jerusalén mu. Fei tañi adquiñ mu engün, llellipui: “Chau Jehová, nienoliyiñ tami quellu, pepi hueulayaiñ. Fürenemuiñ, feipimuiñ chem taiñ femal”.

Chau Jehová allcütufi ta Jehosafat ca feipifi: “Llicaquilmün, iñche quelluhuaiñ. Adcünuhuaimün, fei üngümcülemün, adquintulemün müten chumngechi montuluhuaiñ”. ¿Chumi Chau Jehová ñi montulafiel engün?

Ca antü mu, Jehosafat dullifi quiñeque ülcantufe ñi huneleal pu hueichafe mu. Tripaingün Jerusalén mu ñi hueichameal Tecoa mapu mu.

Pu ülcantufe ayüucülefuingün, fei nehuentu ülcantulelfingün ta Chau Jehová. Fei Chau Jehová hueluraquiduamelfi pu Ammón che ca pu Moab che, fei com engün hueluquentu langümuhuingün. Huelu Chau Jehová cuñiutucufi pu Judá che, pu hueichafe ca pu sacerdote. Com pu troquiñche püllelelu quimürpuingün chem ñi rupan, fei quimtucuingün ñi incaquefiel tañi pu che. Chau Jehová duamnielai ñi quellungeal, quisu chumafui rume ñi cuñiutucuafiel tañi pu che.