“Cüpape tami ngünenietual mapu”

Chau Jehová feipicünui: “Ngehuelayai ngüman, cutran, cutrantun ca lan no rume. Liftuñmayafiñ pu che ñi cülleñu. Acordahuelayaingün cuifi huesaque dungu”.

Chau Jehová elufi Adán engu Eva ñi müleal ayüfalchi lof mu, Edén pingelu, ñi ayüucüleal ca cüme duamcüleal engu. Üye mu poyeafuingün tañi Huenu Chau ca fentren pichiqueche nierpuafuingu, fei ñi apolngeal ti mapu. Adán engu Eva inalaingu Chau Jehová tañi feipin, huelu Chau Jehová amulei ñi femtriparpual tañi ayünieel. Tüfachi lifru mu ngüneduamiyiñ Chau Dios femquei tañi feipicünuel. Ngünenietule ti mapu, com rume cümelcaletuai. Femngechi femtripayai chem ñi feipicünungeel Abrahán.

Pichiñma mu, ngehuetulayai Huecüfü, huesaque püllü ca huesaque che no rume. Com che poyenieafi Chau Jehová. Cutranhuelayaiñ ca lahuelayaiñ. Doi mai, fill antü cülfüncülen huitrayaiñ, doi nehuencontuaiñ, ayüucüleaiñ taiñ mongeleal. Com ayüfalngetuai ti mapu. Com che nieai cüme iyael ca cüme ruca. Ngehuelayai huesaque che quehuatufengelu, com che cüme piuquengeai. Llicahuelayafiyiñ auca culliñ, fei engün cafei llicanielayaiñmu.

Chau Jehová huiñomongeltufile pu che, rume ayühuai taiñ piuque. Cüme llohuafiyiñ pu cuifiqueche, quiñeque tüfa: Abel, Noé, Abrahán, Sara, Moisés, Rut, Ester ca David. Com engün quelluaiñmu cüme elcünutual ti mapu ñi ayüfalngetual tati. Fentreleai cümeque dungu taiñ femal fill antü.

Chau Jehová ayüniei eimi tami müleal ayüfalngetule mapu. Feichi mu quimürpuaiñ fentren dungu Chau Dios mu taiñ raquiduamquenofel rume. Feimu, feula eluhuaiñ taiñ doi cüme hueniyeafiel Chau Jehová fill antü, fentecünulayaiñ taiñ femal.