Pu discipulo elungei Chau Dios ñi nehuen

Deu rupai 10 antü ñi huiñotun Jesús huenu mu. Ti 33 tripantu mu, pu che fillque mapu mu cüpalu acui Jerusalén mu ñi femngeal ti fiesta Pentecostés. Quiñe ruca mu trahulerquei 120 discipulo, fei rupai quiñe afmatun dungu. Com ti ruca mu allcüngei ñi raracün quiñe fütra cürüf reque. Fei Jesús tañi pu inanieteu elungeingün Chau Dios ñi nehuen. Pichique hueihuiñ cütral reque puhui quisuque engün tañi huente lonco meu, feimeu eluhuingün ñi dungual fillque quehun mu.

Pu che cañpüle cüpalu Jerusalén mu allcüi ti raracün, fei lefquentu amuingün ti ruca mu ñi quimal chem rupai. Tati pu inanieteu dungumequei pu che tañi quehun. Feimu allcütulu engün, afmatulehuei. Feipi engün: “¡Tüfei! ¿Galilea che no am com tüfachi pu che? ¿Chumngechi dunguqueingün quisuque taiñ quehun?”.

Pedro caque apostol engün huitrapürai pu che tañi adquiñ mu. Pedro feipifi engün: “Eimün langümfimün ta Jesús, huelu Chau Jehová mongeltueyu. Feula Jesús mülei huenu mu, Chau Dios tañi man püle. Fei Jesús elueiñmu Chau Dios tañi nehuen chumngechi ñi feipicünuel. Feimu cai eimün peimün ca allcütuimün com tüfachi afmatun dungu”.

Pu che rume afmatulehuei. Allcütulu Pedro ñi feipin, rume cutrantupiuquei engün, fei ramtuingün: “¿Chem mülei taiñ femal?”. Pedro feipi: “Nor raquiduamtumün. Jesucristo ñi üi meu fautizahuaimün. Femngechi eimün cafei elungeaimün Chau Dios ñi nehuen”. Feichi antü 3 mil che fautizahuingün. Cafei, fentren che Jerusalén mu eluhui ñi inayafiel Jesús. Fei, Chau Dios tañi nehuen mu, pu apostol adcünufi hueque trahunche. Femngechi quimeltufingün pu discipulo com tañi feipieteu Jesús.