Chau Jehová huercüfi ta Jeremías

Chau Jehová huercüfi ta Jeremías ñi amuldungual Judá mapu mu, ngülamtumefi tati pu che ñi fentecünual tañi huesa femmequen engün. Huelu Jeremías feipifi ta Chau Jehová: “Iñche rume hueche huentrungen, quimlan chumngechi entual tañi feipin pu che tañi adquiñ meu”. Chau Jehová feipieyu: “Ngelai tami llicayal, iñche quelluayu, feipiayu chem tami amuldungual”.

Chau Jehová feipifi ta Jeremías: “Trahulafimi pu loncolelu. Fei engün tañi adquiñ mu trafolafimi quiñe metahue, fei feipiafimi engün: ‘Ca femngechi femngeai ta Jerusalén’”. Pu loncolelu ayülafingün ñi femün Jeremías. Pasjur pingechi sacerdote hulelcafi ta Jeremías, fei traricünufi tañi namun ca cuhu quiñeque trafla meu, femngechi presucünufi. Com quiñe pun pepi nengümuulai. Hunlu hula, Pasjur neicümeyu. Fei Jeremías feipi: “Yafüngehuelan, ¡calli! Amuldunguhuelayan”. Huelu, ¿rüf femngechi fempei mai? Femlai. Jeremías doi cüme raquiduamtui, feipi: “Cütral reque felei iñche mu Chau Jehová tañi dungu. Feimu, amulean ñi amuldunguchequen” pi. Jeremías fentecünulai ñi ngülamtuchequen.

Fentren tripantu rupai, fei ca quiñe huentru lonco ülmen-ngerpui Judá mu. Pu sacerdote ca pu coilaque huerquen üdefingün ta Jeremías. Feimu feipifingün pu principe: “Mülei ñi langümngeal feiti huentru”. Huelu Jeremías feipi: “Chau Jehová feipiqueneu chem tañi amuldungual. Feimu langümngeli, culpaconaimün tamün langümfiel quiñe huentru culpalenolu”. Allcütulu tüfa pu principe feipingün: “Tüfachi huentru ngelai ñi langümngeal”.

Jeremías amulei ñi amuldunguyahun. Fütra lladcüingün pu principe, feimu feipifingün tati lonco ülmen ñi langümafiel. “Chem rume femafimün” pieyu ti lonco ülmen. Fei Jeremías ütrüftucungei quiñe alüconchi pozoco mu apolelu fotra mu, fei ñochiquechi ñamconfui Jeremías.

Mülefui quiñe huentru nielu autoridad, Ébed-Mélec pingefui, fei feipifi ti lonco ülmen: “Pu principe tucufingün ta Jeremías quiñe pozoco mu. Entunofiliyiñ, layai”. Feimu ti lonco ülmen feipifi ta Ébed-Mélec ñi quelluaeteu 30 huentru, fei ñi entungeal Jeremías. ¿Inaduamimi? Jeremías fentecünulai ñi amuldunguchequen chem huesa dungu rupafulu rume. Eimi, ¿ca femngechi ayüniepelaimi tami femal?