Josías piuqueyeniefi Chau Dios tañi ley

Nielu 8 tripantu, Josías lonco ülmencülerpui Judá mu. Feichi mu, pu che conquefuingün calcu dungu mu ca poyequefuingün coilaque dios. Nierpulu 16 tripantu, Josías eluhui ñi quimal chumngechi rüf poyengeal ta Chau Jehová. Nierpulu 20 tripantu, teifücafi com pu coilaque dios ñi adentun ca ñi altar. Fei nierpulu 26 tripantu, Josías pepicafi com dungu ñi cüme elcünutuafiel Chau Jehová ñi ruca.

Chau Jehová ñi ruca mu, ti hunen lonco sacerdote Hilquías pei ti lifru nielu Chau Jehová ñi ley, ¿tüfa huirintucupelai Moisés? Ti secretario, Safán pingelu, amui ñi papeltulelafiel Josías. Allcütulu ti papeltun, Josías quimtucui tati pu che ñi quiñepülecünufiel Chau Jehová fentren tripantu mu. Feimu, Josías feipifi ta Hilquías: “Chau Jehová rume huesa duamcülei iñchiñ mu. Ramtuafimi, fei taiñ quimal chem chumal”. Chau Jehová adniefi tañi huerquen domo, Huldá pingelu, ñi huiñoldunguafiel ta Josías: “Pu Judá che famentueneu. Cutrancayafiñ engün, huelu femlayan tüfa petu tañi mongelen Josías fente ñi ñom piuquengen mu”.

Allcütulu tüfa Josías, amui Chau Dios ñi ruca mu ca trahulfi pu Judá che. Fei nehuentu papeltulelfi engün Moisés tañi ley. Josías ca com tati pu che feipicünuingün ñi inayal Chau Dios tañi feipin com piuque mu.

Fentren tripantu rupauyefui ñi fiestañmangehuenon ti Pascua Judá mu. Papeltulu ti ley, Josías quimtucui fill tripantu ñi fiestañmangeafel ti Pascua. Feimu feipifi tati pu che: “Chau Jehová tañi duam mu fiestañmayaiñ ti Pascua”. Josías feipi ñi pepicangeal fentren chalintucun ca quiñe troquiñ ülcantufe Chau Dios tañi ruca mu. Feimu fiestañmaingün ti Pascua. Fei hula, 7 antü mu ti Fiesta ti Fayümngenochi Cofque pingelu. Lalu Samuel pengehuelai fente ayüfalngechi Pascua. Josías rüf piuqueyeniefui Chau Dios tañi ley. ¿Eimi cai? ¿Ca femngechi ayüquepeimi mai quimürpual Chau Jehová mu?