Onineen̄ Icheche Ebi Ikilook Ata Etip Itap Me Urum Me Urum Ikitap Ubọk Inyi Eji Me Owuwa Oniin̄

1-2. Ike owa ke owuwa ene ekimun̄ ubọk eneen̄be ebi ikilook ata etip me urum me urum?

IRE okeek usen okanabe ge me lek ebi ikilook ata etip ni? Ire me usen ya ke okana ge me lek owuwa urum ebi ikimin erieen̄ Jioba. Kpolọlọ, obele ejit enenen me usen ya mije okanabe ge me lek owuwa urum ebi ikimin erieen̄ Jioba. (Itọn̄ 148:​1, 2, 12, 13) Mokọt ire ibe ke mitumu inyi owu me usen ya si ibe ke owu ire ge me lek sọntiik urum ge me lek esese esese urum ebi ikilook ata etip ikup me ntitiin̄ kwun̄. Jisọs inyi otutuuk ebi udun̄ kan̄ ikan ibe elook ata etip Ama Ubọọn̄ me “otutuuk linyọn̄.” Eji ekikọt irọ eyi bak me lek ubọk eneen̄be ebi ikilook ata etip me urum me urum.​—Mat 24:14.

² Ire oma ubọk eneen̄be ebi ikilook ata etip me urum me urum ni? Gwun̄ ute enenwaan̄ ge ekigwen Wendya itumu ibe: “Onineen̄ yi ikaan̄ mgbaan̄ enenen me lek ikwaan̄ ilolook ata etip n̄a. Irere ge me lek sọntiik urum ebi ikilook ata etip me ntitiin̄ n̄a itap ubọk inyi emi me owuwa oniin̄. Nkween̄ ubọk ekilook ata etip mè ikijeen̄ mkpọ ijaan̄ me ubọk ebi ofifi ife, ema mitap ubọk inyi emi nto inu emen ekwukwu me isi mè nkọt nrọ inu cha ntet, nkaan̄ si owuwa ata unene bak me lek onineen̄ yi.” Gwun̄ ute Rich ogwu okikpọ chieen̄ me lek sọntiik urum ebi ikilook ata etip ikupbe itumu ibe: “Nkimun̄ irek yi nkaan̄be kubọk irek osibi esese. Ebi ikikpọ chieen̄ me lek urum ebi ikilook ata etip ge ge ekitap ubọk inyi bọn ute ebi ikup me urum cha ibe ekup enye ekerọ inyi mgbaan̄je kiban̄ melek Jioba ikinye mè ekere si ata ebi usun̄ kan̄ ikerere ibe ke owuwa acha iraka me lek mgbọ ema ekaan̄be ntap-me-mun̄.” Gwun̄ ute enenwaan̄ ge ekigwen Dinah itumu ibe: “Eyi eneen̄be ebi ikilook ata etip me urum me urum inwọn enenen. Nkimun̄ ebi ikup me urum nkupbe kubọk ebi ototun̄ ukan̄ n̄a.”

3. Keke ke eji ebekween̄ me ibot usem yi?

³ Me ibot usem yi, eji mekween̄ ikwaan̄ ebi ikikpọ chieen̄ me lek urum ebi ikilook ata etip ge ge mè ebi ikitap ubọk inyi ema ekaan̄be mè ubọk ema ekisa itap ubọk inyi bọn ute ebi ikup me urum cha ge ge. Eji mekween̄ si ubọk eji ge ge ebesa ikitap ubọk inyi ebi ikup me urum kiji. Me ota kan̄, eji mekween̄ ubọk eji ebesa ikaan̄ oruru inan̄a me lek onineen̄ icheche ebi ikilook ata etip me urum me urum.

OGWU OKIKPỌ CHIEEN̄ ME LEK URUM EBI IKILOOK ATA ETIP MÈ OGWU OKITAP UBỌK INYI ỌMỌ

4. (a) Keke ore okpan okpan ikwaan̄ ogwu okikpọ chieen̄ me lek urum ebi ikilook ata etip? (b) Ike owa ke ogwu okikpọ chieen̄ me lek urum ebi ikilook ata etip okisa ikpọ chieen̄ me lek ebi ikup me urum kan̄? (Kpọ si okop obe “Mkpọ Obotap Ubọk Inyi Ogwu Okikpọ Chieen̄ Me Lek Urum Ebi Ikilook Ata Etip.”)

⁴ Ogwu okikpọ chieen̄ me lek urum ebi ikilook ata etip ire ogwu ugane ntitiin̄b ogwu otutuuk ebi ugane ntitiin̄ egobobe ibe ikitap ubọk inyi bọn ute ebi ikup me urum kan̄ ibe ekenama mgbaan̄je kiban̄ melek Jioba enye mè ekelook ata etip mè ekejeen̄ atikọ ejaan̄. Ike owa ke ikirọ eyi? Adasi, ikijeen̄ ata ulọk me lek otutuuk ebi ikup me urum kan̄ ge ge. (Urọk 27:23) Iriọọn̄ ebi bọn ute ikup me urum kan̄ ijaan̄, ikigọọk ema itumu ikọ mgbọ geelek ufuna iriọọn̄ ubọk ema ekupbe. Mije ikirọ ikeya, ikitap ubọk inyi ema ekweek eriaak me lek Jioba, ikijeen̄ ema ima me mgbọ ema ekaan̄be sasaak mè iyaka ire uga ufieejit, mè ikirọ si esese esese mkpọ isasa itap ubọk inyi ema. (Urọk 12:25; Asaya 32:2; Jemis 2:​15-17) Òso iba, ikitap ubọk inyi ebi bọn ute ikup me urum kan̄ ibe ekọt eketap lek ejaan̄ me lek ikwaan̄ ilolook ata etip. Ikijeen̄ ata akpat ukot sa me isasa me uyok uyok ejit ikisibi uko mgbọ geelek ogakge me ota nde melek ebi urum kan̄. Ikitap efuuk ikigọọk otutuuk ebi ikup me urum kan̄ ge ge ikije me ikwaan̄ uko inyi ikọt itap ema efuuk me owot mè itap ubọk inyi ema ekọt ekelook ata etip mè ekejeen̄ Baibul ejaan̄. Ire ikafet ibe isibi uko, moneen̄ ibe ogwu okitap ubọk inyi ọmọ mè iyaka ire ofifi gwun̄ ute ogwu omimin isoon̄ ikpọ chieen̄ me lek ikwaan̄ uko me usen ya. Òso ita, ikitap ubọk inyi bọn ute ebirieen̄ ibe ekọt emiin̄ esoon̄ isisi ikwaan̄ me ntitiin̄. (1 Tim 3:1) Ikitọn̄ ema me lek ata ikwaan̄ ema ekisi mè ata eru ema ekaan̄be. Ikinyi ema nteme onan̄a me Baibul inyi ema ekọt ekerọ unwene ogbegbe ibe erọ. Ikinyi ema kpokpo si ufuna ekọt emiin̄ esoon̄ mè ekana ebi ikitap ubọk inyi ebi ugane ntitiin̄ mè iyaka ire ekana ebi ugane ntitiin̄ si. Ikwaan̄ ebi ikikpọ chieen̄ me lek urum ebi ikilook ata etip ge ge ikup ufiak enenen, ọmọ orọ, ebi ugane ntitiin̄ ekisa me ugbalachieen̄ igobo ebi ugane ntitiin̄ ibekọt irọ ikwaan̄ yi ijaan̄.

5. Keke obokọt irọ inyi ikwaan̄ ebi ikikpọ chieen̄ me lek urum ebi ikilook ata etip ikiyọt usini mgbọ?

⁵ Owuwa mkpọ omaan̄ echi obokọt irọ ibe itatap ubọk inyi ebi ikup me urum kan̄ ikiyọt usini mgbọ me lek ogwu okikpọ chieen̄ me lek urum ebi ikilook ata etip. Jörg, ogwu okikpọ chieen̄ me lek urum ebi ikilook ata etip ge me ntitiin̄ kan̄ me Germany ikaan̄ iraka ikwaan̄ ge me ntitiin̄ ike ofifi ebi ugane ntitiin̄ ekaan̄be si. Itumu ibe: “Ikọkọt ikineen̄ irọrọ owuwa ikwaan̄ eji ekaan̄be irọrọ ikakifet. Ọmọ orọ, ikiyọt emi me lek ikọkọt igwen mè iyaka ire isi ikpọ otutuuk ebi ikup me urum n̄a ike mweekbe.” Abel, ogwu ugane ntitiin̄ okup akọp acha jaaba ogwu onan̄a me Uganda itumu ibe: “Me ntitiin̄ n̄a, ebi irere ebi ugane ntitiin̄ mè ebi ikitap ubọk inyi ema kpewa. Ọmọ orọ, ebi ikup me urum ge ge me ntitiin̄ n̄a miwa enenen. Mije keya, nkakikọt itap ubọk inyi ebi ikup me urum n̄a ge ge ike mama ikekirọ.” Obed ogwu ugane ntitiin̄ ogwu onan̄a me Suriname itumu ibe: “Mma ikekikpukpo ebi ofifi ife. Ire, kpokpo iweek mgbọ mè efuuk. Usini mgbọ si, okpogwat lek imun̄ inu okijeen̄ ibe ke kpokpo okinyi ene okitet mun̄. Bak me lek eyi, owuwa mgbọ, nkimalek ikpọ chieen̄ ilọ me lek kpokpo. Keke obokọt itap ubọk inyi ebi ugane ntitiin̄ ikikpọ chieen̄ me lek urum ebi ikilook ata etip ge ge me mgbọ ema ekikwek isi me lek rumurumun̄ chi mè ofifi ofifi rumurumun̄ si?

6. Ire ebi ikup me urum ge ge kpewa, ike owa ke ibotap ubọk inyi ebi ikikpọ chieen̄ me lek urum cha ekọt ekpọ chieen̄ ejaan̄ me lek ebi ikup me urum kiban̄?

⁶ Ire ifet, kè ebi ikup me urum ge ge ekawa ufuna ebi ikikpọ chieen̄ me lek urum cha ekọt eriọọn̄ otutuuk ebi ikup me urum kiban̄ ejaan̄ mè etap ubọk enyi ema ekọt ekup me irek emen ekwukwu si. Me usini ntitiin̄, ebi ugane ntitiin̄ kpewa, keke ke eberọ me mbet irek okup ikeya? Ire ebi ugane ntitiin̄ eche owuwa ene itap me urum ge, ogwu okikpọ chieen̄ me lek urum ya ikpokọt iriọọn̄ ubọk ikpọ chieen̄ me lek otutuuk ebi ikup me urum kan̄. Kpan̄asi eberọ ikeya, ebi ugane ntitiin̄ mekọt ibe mè ogwu okitap ubọk inyi ebi ugane ntitiin̄ ikpọ chieen̄ me lek urum ge me mgbidim mgbọ. Ire ebi ikup me urum ge ge kpewa, ebi ikikpọ chieen̄ me lek urum chi mekọt irọ inu okukup ufiak ichit me lek ikwaan̄ kiban̄​—ikpọkpọ chieen̄ me lek bọn ute ibaan̄ mè irieen̄.

7. Me ntitiin̄ ere ekakaan̄ge owuwa ebi ugane ntitiin̄, ike owa ke ebi ikikpọ chieen̄ me lek urum ebi ikilook ata etip ebesa imun̄ ibe ke ema mikọt ikpọ chieen̄ ijaan̄ me lek otutuuk ebi ikup me urum kiban̄? (1 Pita 5:2) (Kpọ si ogugo.)

⁷ Ire ebi ugane ntitiin̄ ikup me ntitiin̄ kan̄ kpewa, ogwu okikpọ chieen̄ me lek urum ebi ikilook ata etip mokpukpo gwun̄ ute enerieen̄ ogwu okitap ubọk inyi ọmọ me urum ya. Sa me ikeya, gwun̄ ute ya mokọt itap ubọk ikikpọ chieen̄ me lek ebi arọọn̄ Awaji ikup me urum kiban̄. (Fuk Pita Eyi Adasi 5:2.) Kinyi ogwu okitap ubọk inyi owu usini ikwaan̄ iborọ isasa itap ubọk inyi ebi ikup me urum kinyi. Kubọk inu njeen̄, usini mgbọ, omokọt itumu inyi ọmọ ibe isun̄ chinichini ekikaan̄ sabum esibi uko mè ineen̄ ubọk ebesa isi ikwaan̄. Igbaan̄ ibeek uriaak mè ikpa si ubọk enyi ebetap ubọk inyi ge ge me urum kinyi inyi ekọt ekelook ata etip ejaan̄ mè ekup eriaak me lek Jioba. Kisa ogwu okitap ubọk inyi owu gbaalek osibosi ikpọ mè itap efuuk me owot ebi ikup me urum kwun̄. Sabum enyi ebesi ikpọ ene, igbaan̄ ikpa ubọk enyi ebesa itap ene ya efuuk me owot, enyi esika, tọn̄ ogọt me lek ere irọbe ijaan̄ mè tumu nyi ọmọ ubọk iborọ ijaan̄ igbaalek ire ikup ufiak. Bak me lek kpokpo okinyi ọmọ, ogwu okitap ubọk inyi owu mokọt ikana ogwu okikpọ chieen̄ me lek urum ebi ikilook ata etip ge me mgbọ okup me isi. (2 Tim 2:2) Omokọt itumu inyi ebi imimiin̄ inin̄ ene me irek emen ekwukwu me urum kwun̄ ibe etap ubọk ekpukpo ebi ofifi ife inyi ekọt ekelook ata etip ejaan̄. Ebi ikigbọ oniin̄ ojot mgbọ mè ebi ofifi ife irọriọọn̄ ubọk ekilook ata etip ijaan̄ mekọt igọọk ebi ayaya mè ebi kpemalek iriọọn̄ ubọk ekilook ata etip ije me ikwaan̄ uko. Bọn ute ebi ilolook ata etip me owuwa acha mekọt itap ubọk inyi ebi iweweek ntap-ubọk inyi ekọt ekebene ukpatu me uko, ekekaan̄ ebi ebeje ichak mè ekesun̄ nkween̄mkpọ Baibul. Mgbọ keyi, eji mekpa mkpọ ita echi eji ge ge ebekọt ikirọ isasa ikitap ubọk inyi ebi ikup me urum kiji.

INU EJI GE GE EBEKỌT IRỌ ISASA IKITAP UBỌK INYI EBI IKUP ME URUM KIJI

8. Ike owa ke eji ge ge ebekọt isa ikitap ubọk inyi ebi ikup me urum kiji? (Ebi Rom 1:12)

⁸ Kigọọk ebi urum kwun̄ look ata etip. Omokọt ikitap efuuk me owot ebi ikup me urum kwun̄ mè ikikaan̄ ntap-efuuk-me-owot si me ubọk kiban̄ ire okigọọk ema ije me uko. (Fuk Ebi Rom 1:12.) Ire enyi ekigbaan̄ isi ikwaan̄ kubọk urum, ukpook ikpomalek itet ebi ikup me urum ya esibebene usem melek ene, ema kpebetet ukpook si esikilook ata etip me usini ere. Ire okakọt ikigọọk ebi urum kwun̄ isibi uko bak me lek ikwaan̄ okebesi, ire omokọt ibeek ogwu nte-uwu me ere ikwaan̄ kwun̄ ibe inwene mgbọ mè ubọk okisi ikwaan̄ ni? Ogwu okisi ikwaan̄ inyi mokọt irọ inu odobe. (Neyem 2:​4-6) Ire okakọt ikisibi uko melek ebi urum kwun̄ bak me lek orukan̄ mè iyaka ire acha ukan, gọọk ogwu okikpọ chieen̄ me lek urum ya kpa usem. Mokọt itap ubọk inyi owu okọt okosa internet, fun mè iyaka ire ikpa olook ata etip melek ebi ofifi ife ikup me urum kwun̄. Ire owu ire ogwu ijija okakaan̄ unye akpalek, ogwu ikiyọt me lek isisibi uko mgbọ geelek ni? Ire ikeya, kineen̄ melek ebi ikup me urum kwun̄ inyi okọt okogọọk ema ge ge oje me uko me nde geelek. Omokọt irọ unwene si me lek inu echi omọnọbe kubọk inu echi okukup ufiak ichit mè iyaka ire inwene ubọk okisa mgbọ kwun̄ irọ mkpọ. (Rom 12:11; Kọl 4:5) Ire otap efuuk ikigọọk ebi urum kwun̄ isibi uko mgbọ geelek, otutuuk kinyi mekikaan̄ oruru. Kibeek Jioba me uriaak ibe itap ubọk inyi owu. Iin̄, Jioba monyi owu ulọk mè efuuk isasa ikibieen̄ ebi urum kwun̄ inye.​—Filip 2:13.

9. Kpa ubọk ke eji ebesa ikirọ inyi ima okup me eden̄ ebi ikup me urum kiji ikimin igbaalek? (Ebi Rom 12:13)

⁹ Mọnọ ema kubọk ebi ototun̄ ukan̄ kwun̄. Ire eji ekichili ubọk mè ikibọkọ ebi ikup me urum kiji itap, morọ inyi ima mè ubelejit ikikup me eden̄ ebi ikup me urum kiji. (Fuk Ebi Rom 12:13.) Omokọt isa uwu kwun̄ irọ ere ebi urum kwun̄ ebekititiin̄ usen geelek ebesibi uko. Me usini ntitiin̄, ekineen̄ ibe urum ebi ikilook ata etip ge ge ekekpọ chieen̄ me lek ogwu onan̄a me ofifi ntitiin̄ ininyi usem me ntitiin̄ kiban̄. Isikem mgbọ ebi urum ge ebekpọ chieen̄ me lek ogwu onan̄a me ofifi ntitiin̄ ininyi usem me ntitiin̄ kiban̄, ikerere ibe ke ogwu ichen ya ikakọt igọọk ema igbaan̄ ikup, ema ekigbaan̄ irie inorie mè ikitap ge ge efuuk me owot. Ofolek ichichili ubọk mè ibọbọkọ ebi urum kan̄ itap, gwun̄ ute Sarah ogwu okigbọ oniin̄ ojot mgbọ osibi esese itumu ibe: “Nkimalek ikaan̄ sasaak nsigwen ebi ene ibe enu me uwu n̄a, ọmọ orọ, isasa irọ ibe sasaak ya igele, nkakineen̄ owuwa inu. Nkito chieen̄ si me lek irọriọọn̄ ebi ngwenbe cha ijaan̄, kpan̄asi mbakikaan̄ sasaak itetem owuwa inorie.” Eji esitap efuuk ikijeen̄ ebi ikup me urum kiji ima, ikibọkọ ema itap mè ikimọnọ ema kubọk ebi ototun̄ ukan̄ kiji, eji mekitaba lek iriaak me lek Jioba mè ge ge si.​—Neyem 8:10; Ikwaan̄ 20:35.

10. Keke ke eji eberọ ire eji eweek irere ata ebi ikilook ata etip mè ikijeen̄ atikọ ijaan̄? (Urọk 1:5; 27:17) (Kpọ si ogugo.)

¹⁰ Be etap ubọk enyi owu. Eji esikana ebi ikilook ata etip mè ikijeen̄ mkpọ ijaan̄, mokilọk eji isisibi uko mgbọ geelek. Eji mekinwọọn̄ igọgọọk ebi urum kiji isibi uko si. Ire ikaan̄ inu oboma ibe etap ubọk enyi owu okọt okorọ ojaan̄ ni? Omokọt itumu inyi ene ge me urum kwun̄ ibe itap ubọk inyi owu. (Fuk Urọk 1:5; 27:17.) Rọ inyi ogwu okikpọ chieen̄ me lek urum kwun̄ iriọọn̄ mkpọ osilek. Mokọt itap ubọk inyi okọt orọ inu okaan̄be me ejit otet. Omokọt iweek ntap-ubọk me ubọk ebi ofifi ife si. Gwun̄ ute enenwaan̄ ge ekigwen Heather, ogwu okitet esip itumu ibe: “Ntumu inyi gwun̄ ute enenwaan̄ ge okigbọ oniin̄ ojot mgbọ ibe itap ubọk inyi emi nkọt nkeyaka nsi lek ebi nchichinibe me uko. Gwun̄ ute ya igọọk emi ije me uko owuwa mgbọ mè isa me ima mè ata ejit itap ubọk inyi emi. Itap ubọk inyi emi nkọt mbene nkegọọk ene ge nkween̄ Baibul. Mbele ejit enenen ibe ke ndo ntap-ubọk gwun̄ ute ya mije, mkpọk ibene ikinwọọn̄ isisibi uko mgbọ keyi.” Isibi utoon̄ ibe ke owuwa mkpọ omaan̄ echi eji ge ge ebekọt ikirọ isasa ibieen̄ ebi urum kiji inye.

UBỌK EJI EKIKAAN̄ ORURU INAN̄A ME LEK UBỌK ENEEN̄BE EBI IKILOOK ATA ETIP ME URUM ME URUM

11-12. Kpasi oruru echi emen ekwukwu ke obokọt ikaan̄ me lek ubọk eneen̄be ebi ikilook ata etip me urum me urum? Kpa-nu mkpọ ene ge ojebe itibi.

¹¹ Ikukup me urum ebi ikilook ata etip ge ikitap ubọk inyi eji ekup eriaak me lek Jioba. Eji ge ge mekọt ikaan̄ oruru echi emen ekwukwu inan̄a me lek ubọk eneen̄be ebi ikilook ata etip me urum me urum. Kubọk inu njeen̄, ogwu okikpọ chieen̄ me lek urum kwun̄ mokọt itap ubọk ikikpọ chieen̄ me lek mè ikitap efuuk me owot ebi nwakpa, ebi kpà-nte mè ebi ininin̄ ugane​—ebi Jioba omabe enenen. (1 Tes 2:8; Jemis 1:27) Eji mikibọkọ kpokpo me esese esese agọọk me ikwaan̄ ilolook ata etip Ama Ubọọn̄ mè ijejeen̄ atikọ. Bọn ute ebirieen̄ ebi ikakaan̄ ntap-me-mun̄ mè ikijeen̄ ata akpat ukot mekọt ibọkọ kpokpo inyi ekọt emin esoon̄ mè ekaan̄ ikwaan̄ egbaalek me ntitiin̄.​—1 Tim 3:10.

¹² Kpọ-nu ubọk Wendy ogwu etumube mkpọ ofolek me paragraf oraraka osabe ikaan̄ oruru inan̄a me lek. “Bak me lek nte n̄a okikeke ikeme atikọ, ikamalek ikifet inyi nga n̄a isisibi uko melek ebi urum kan̄ me ota nde. Ire, nkisisi. Gwun̄ ute enenwaan̄ ge oninin̄ ugane mè ire si ogwu okigbọ oniin̄ ojot mgbọ itap ubọk inyi emi enenen. Itap ubọk inyi emi nkọt nkaan̄ uka echi okitap ubọk inyi emi me ikwaan̄ uko mè ntitiin̄ si. Nkeek si owuwa mgbọ ogwu okikpọ chieen̄ me lek urum kiji osabe me ima inyi emi nteme Baibul echi okitap ubọk inyi emi mege ire chereyi.”

13. Kpasi ofifi oruru ke eji ekikaan̄ inan̄a me lek ubọk eneen̄be ebi ikilook ata etip me urum me urum? (Kpọ si ogugo okup me ikpa yi.)

¹³ Ebi unene imama eji mè ikibieen̄ eji inye. Ike eji ekigọọk ebi ikup me urum kiji ikije me uko, ikeya ke eji melek kiban̄ ebekire ata ebi unene. (Filip 1:27) Mije otu ifuk ebi ikup me urum kiji ge ge ekawabe, irọrọ unene melek ebi ofifi ife mofet me lek ebi ikitet esip mè iyaka ire ebi ikikaan̄ ukpook esikup me eden̄ owuwa ene. (2 Kọr 6:13) Eji mekọt ikaan̄ utoon̄-ejit ibe ke ebi unene kiji chi metap ubọk inyi eji me mgbọ oyọyọt, kubọk mgbọ lek kiji ikanyege, mgbọ eji ekikaan̄ uga sasaak mè iyaka ire me mgbọ eji ekifieek ejit bak me lek eji echepbe ogwu ima kiji me mkpa. (1 Tes 5:14) Kpunu cheche ibe ke eji mechubọk iweek ata ebi unene enenen me mgbọ okinu me isi. (Mat 24:21) Mije eji ekaan̄be ebi bọn ute imama eji mè ikitap ubọk inyi eji, ikọkọt ime ufialek eji ekichichini mofet me lek kiji.​—Urọk 17:17.

14. Ike owa ke eji ekikaan̄ oruru inan̄a me lek urum kiji me mgbọ mfiat mè iyaka ire mgbọ mkpọ eji ekakeekbe orọbe eji?

¹⁴ Ntap-ubọk me mgbọ mfiat orọn̄be itet eji. Ebi bọn ute ikup me urum kiji ge ge mikitap ubọk inyi eji me mgbọ ufialek, kubọk me mgbọ orukan̄ okitobo ene okichon ikana ere, mgbọ mfiat orọn̄be, mgbọ mkpọ oboweek ibe esa owu esi uwu ugwun̄ orọbe, mè ofifi ofifi irek si. Mbet inu okup ikechi isirọ, ebi ikikpọ chieen̄ me lek urum ebi ikilook ata etip ge ge mikibem lek itatap ubọk inyi eji si ebi bọn ute ikup me urum kiji mikisa me ima ikitap ubọk inyi eji. Kubọk inu njeen̄, mfiat isirọn̄ itet eji, ogwu okikpọ chieen̄ me lek urum kiji mogwen mè iyaka ire isi lek otutuuk ebi ikup me urum kan̄ inyi ọmọ ikọt iriọọn̄ inu ema eweekbe eyi mokọtbe igọbọ ugwun̄, inorie, mun̄, uwu, ofọnti mè iyaka ire ofifi inu okukup ufiak. Ogwu okikpọ chieen̄ me lek urum kiji isiriọọn̄ inu eji eweekbe, mgbọ ya ke ibokọt itap ubọk inyi eji. Isọkọ me lek si, ebi ikikpọ chieen̄ me lek urum ebi ikilook ata etip ge ge ekigbaan̄ ikpa mè ineen̄ melek ebi Congregation Service Committee ubọk ebekọt isa itap ubọk inyi ebi ufiak kiban̄ osibibe esese me mbet irek yi. Ebi bọn ute ikup me urum kwun̄ mechubọk itap ubọk inyi owu me mgbọ mfiat mè iyaka ire inu okakeekbe orọn̄be itet owu!

15. Keke ke otutuuk ebi ikitọbọ ebum inyi Jioba eweek?

¹⁵ Jioba ikaan̄ owuwa ebi ikitọbọ ebum inyi ọmọ me emen inyọn̄ mè inyọn̄ ijọn̄. Me emen inyọn̄ gaalek, mkpọ oraraka efie efie ebi osat ekigbe utoon̄-ejit inyi Jioba. Me inyọn̄ ijọn̄ yi, ebi usun̄ Jioba miwa iraka efie ene onaan̄ge, otu ifuk yi ikitatap isọkọ si. (Jek 8:23; Ichi 5:11) Otutuuk ebi ikitọbọ ebum inyi Jioba me emen inyọn̄ mè inyọn̄ ijọn̄ miweek ibe otutuuk ene enọ ata etip Ama Ubọọn̄! (Ichi 14:​6, 7) Kè eji ekup enye ekekaan̄ oruru enan̄a me lek ubọk eneen̄be ebi ikilook ata etip me urum me urum​—onineen̄ eyi okitap ubọk inyi eji ekọt ekesa otutuuk ejit kiji eketọn̄ Jioba.​—Itọn̄ 111:1.