“Awaji Ogwu Atikọ” Ikirọrọ Nkeek Kan̄ Iso

1. Igọọk me lek inu okup me ikpa Okwa Itọn̄ 31:​2-5, keke orọ eji ebetoon̄ ejit me lek Jioba? (Okwa Itọn̄ 31:​2-5)

EJI ekiluk me inyọn̄ eyi Setan okikpulu. Owuwa ebi ene ekikan̄ ataak, mè ikifiaan̄ ene, kpekigbe utoon̄-ejit si. Eyi mokọt irọ ibe iyọt eji me lek irọriọọn̄ ogwu ebekọt itoon̄ ejit me lek. Owuwa ebi ikinyam ewe kpekisa atikọ irọ mkpọ. Ebi ene ekimalek ikan̄ ataak ofolek mkpọ ema ekinyam, inyi ebi ene ekọt elep. Usini mgbọ si, ikerere ebi unene kiji kpekirọ use ema echieekbe iso. Ire, ire inu ukarajit irọriọọn̄ ibe ke eji mekọt itoon̄ ejit me lek Jioba, “Awaji ogwu atikọ.” (Fuk Okwa Itọn̄ 31:​2-5.) Jioba ikakikan̄ ataak. Inu geelek itumube ire atikọ. Eji mekọt ikaan̄ utoon̄-ejit ibe ke inu geelek itumube iborọrọ iso.

2. Keke ke eji ebekween̄ me ibot usem yi?

² Me ibot usem yi, eji medasi ikpa usini inu orọrọ eji ebekọt itoon̄ ejit me lek Jioba me otutuuk ejit kiji. Mè ikpa si ubọk Awaji ogwu atikọ obosa ifiat Yọk mè ebi melek kan̄ me inyọn̄ mkpikpak yi, mè inu Awaji okirọ mgbọ keyi isasa irọ nkeek kan̄ iso. Ibot usem yi motap ubọk inyi eji ekesa me unye-ejit ekpa atikọ ofolek Jioba enyi ebi ofifi ife.

INU ORỌRỌ EJI EBETOON̄ EJIT ME LEK AWAJI OGWU ATIKỌ

3. Keke orọ eji ebekọt ikaan̄ utoon̄-ejit onyenye me lek Jioba?

³ Eji mekọt itoon̄ ejit me lek Jioba bak me lek ọmọ ore Ogwu Orom. Ọmọ ore Ogwu Ororom inyọn̄ mè ijọn̄ mè ire ogwu ogbuuruk ere ugwem okinan̄a isibi. (Ibeb 1:1; Itọn̄ 36:9; Ichi 4:11) Irom inyọn̄ ijọn̄ yi me oniin̄ eyi inu geelek eji eweekbe isasa igat ugwem mokọtbe ifet, kubọk efet eji ekifuuk, mè mun̄ eji ekinwọ. Ọmọ ore ogwu obokup inye ikikaan̄ unye ntọ-ikọ me lek inu geelek okibọkọ irek me inyọn̄ mè ijọn̄. Eya orọ, kè eji esa me utoon̄-ejit eyaka otutuuk ugwem kiji enyi ogwu ororom eji okakaan̄ otutuuk iriọọn̄-inu mè otutuuk unye mè eriọọn̄ ibe ke mgbọ okup me isi monwọn.

4. Ike owa ke eji esa iriọọn̄ ibe ke Jioba ima eji?

⁴ Eji mekọt itoon̄ ejit me lek Jioba bak me lek ima eji. Jioba irom ebilene bak lek iweek ibe ema eluk mè enwọọn̄ ugwem kubọk kan̄. Jioba itumu nkeek kan̄ me lek usem chi: “Eji enerom ebilene me mbet kiji, mè ema ekup kubọk kiji.” (Ibeb 1:26) Inyi eji unye isasa igobo inu eji ebekirọ. Inyi eji si inyọn̄ ijọn̄ yi ojajaan̄. (Itọn̄ 115:16) Mè inyi adasi nte kiji mè nga kiji ikwaan̄ irọrọ ibe inyọn̄ ijọn̄ yi ikana paradais. (Ibeb 1:28; 2:15) Inyi ema owuwa ata inorie, uti, anam mè ofifi ofifi mkpọ si. Irọ eyi inyi ema mekọt ikibele ejit mè ikinwọọn̄ ugwem. Eyi ikijeen̄ ubọk Jioba osabe ima eji ire. Me atikọ, ‘imumechieen̄ kan̄ ikikukup ire mgbọ geelek.’​—Itọn̄ 103:17.

5. (a) Keke ke Jioba orọ me mgbọ Adam mè Îfu ekpakabe ibot? (b) Keke ore usini use Awaji ochieekbe echi orọrọ iso? (Kpọ okop obe “Awaji Ikitutumu Atikọ Mgbọ Geelek.”)

⁵ Eji mekọt itoon̄ ejit me lek Jioba bak me lek ikirọrọ use kan̄ iso. Jioba ogwu òrorom linyọn̄, “ìkarom ibe ire ukpọk ukpọk, ire, ìrom ibe eluluk me lek.” (Asaya 45:​18, 19) Me mgbọ Adam mè Îfu ekpakabe ibot, mkpa oyaka ida ema isi. Eya orọ, mokọt ikup kubọk Yọk irọ ibe nkeek Awaji ofolek inyọn̄ ijọn̄ yi mè ebilene ikayaka ibọkọ irek. Ire, Jioba ire ogwu okirọ otutuuk use kan̄ iso. (Asaya 46:​10, 11) Nkeek Jioba okaan̄be irọrọ ibe inyọn̄ ijọn̄ yi ijot me lek ebilene ikanwene. Eya orọ Jioba otelebe Adam mè Îfu ibe ekaan̄ nsabọn. Iraria si Gwun̄ kan̄ ibe inikwu me ibot kiji inyi eji mekọt ikaan̄ ikpọchieen̄ ugwem ikakaan̄ge itata.​—Jọn 3:16.

INU JIOBA OKIRỌ ISASA IRỌ NKEEK KAN̄ ISO

6. Keke ke Jioba otumu ibe ke mobọkọ irek eyi Adam mè Îfu ekpakabe ibot isan̄a?

⁶ Ogwu orọrọ ibe Adam mè Îfu ekpaka ibot enyi Awaji ire “ikpele ijijinu ya ore ijijinu mgbọ ukot ikaan̄ ya eyi ekigwen Yọk, mè ègwen si Setan.”a (Ichi 12:9; Ibeb 3:​4, 5; Jọn 8:44) Bak me lek inu Setan orọbe, Jioba itumu ibe ke mejijaka ọmọ me mgbọ okinu me isi. (Ibeb 3:15) Mege ire mgbọ ya, owuwa ebi ene mekigọọk Setan mè ikirọ ijo inu. Ire, usini ene mekup inye ikigbe utoon̄-ejit inyi Jioba.

7. Ebi owa ekigọọk akpat ukot Yọk, keke oborọ ema?

⁷ Ire ebi osat ikpakpaka ibot inyi Jioba mè owuwa ebilene si ekigọọk akpat ukot kè Setan me chereyi. Bak lek ife chi ekikup ikeme, mè iyaka ire ikijit nkeek Awaji, ema egobo ikakana bọn kè Setan. Ire, Jioba itumu ifieek mgbọ ibofiat Setan mè otutuuk ebi ikigọọk ọmọ.​—Dan 2:44; Rom 16:20.

8. Keke ke Jisọs orọ me acha 1914? (Kpọ si ogugo chi.)

⁸ Keke orọ eji etoon̄be ejit inye ibe ke Jioba mofiat Setan mè otutuuk ebi ikigọọk ọmọ? Me acha 1914, Jisọs itim akọn̄ ikeme Setan mè ebi osat kan̄ mè ilap ema ito me linyọn̄ yi. (Ichi 12:​7-9) Ikerere ibe ke akọn̄ ya ibọkọ irek me emen inyọn̄, ikaan̄ mgbaan̄ me lek ebi ikup me inyọn̄ ijọn̄ yi. Baibul ibe: “Ikpele ujaralek îra inu inyi enyi, linyọn̄ mè okwaan̄, mije, Yọk îra isibi inu me lek kinyi! Unaan̄-ejit òjot me emen kan̄ ìkare sọntiik, mije, îriọọn̄ ibe ke mgbọ kan̄ ìsik sọntiik mgbidim gaalek.” (Ichi 12:12) Karake acha 1914, Setan igwugwuun̄ chieen̄ kan̄ me inyọn̄ ijọn̄ yi, eya orọ linyọn̄ yi okpọkpọ ikisak igbaalek. Me atikọ, ‘ikpele ujaralek îra inu inyi linyọn̄ yi’! Sọnja mgbọ, Jisọs motim ikpan̄ Setan mè isan̄a ọmọ kubọk ogwu mkpulu linyọn̄ yi mè ifiat si otutuuk ebi ikigọọk ọmọ. (Ichi 6:2) Jisọs morọ ibe isibi utoon̄ inyi otutuuk ene ibe ke Setan ire ogwu mkpikpak okikan̄ ataak itoon̄ Jioba. (Itọn̄ 45:​4-6) Otutuuk ene meneniriọọn̄ ibe ke Jioba ore Awaji ogwu atikọ!​—Ijik 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

AWAJI OGWU ATIKỌ OKITITIIN̄ EBI IMAMA ATIKỌ

9. Ebi owa ke Jioba okititiin̄ me chereyi?

⁹ Jioba okigbaan̄ ‘otutuuk inu geelek òkup me emen inyọn̄ mè echi òkup me linyọn̄ ititiin̄ itap me ubọk kè Karais.’ (Efes 1:10) ‘Inu geelek òkup me emen inyọn̄’ ikitọ ubọk ifo lek ebi ekenbe aran̄, orere, ebi Jioba ogobobe ibe egọọk Karais ekpulu me emen inyọn̄. ‘Inu echi òkup me linyọn̄’ ikitọ ubọk ifo lek ebi ibeluk ugwem ire mgbọ geelek me inyọn̄ ijọn̄ yi. Otutuuk ebi ikitọbọ ebum inyi Jioba ire ebi ikitap lek me itutumu ataak kè Setan isibi, mè itatap ubọk inyi ebi ikakaan̄ ata ejit eneriọọn̄ atikọ ofolek Jioba.

10. Ike owa ke Jioba okisa inyan̄a ebi ene isan̄a me lek ataak uwu uriaak? (Ichichili 14:​6, 7

¹⁰ Jioba ikititiin̄ ebi imama atikọ inan̄a me lek ikwaan̄ ilolook ata etip, orere, ikwaan̄ ilolook etip eyi omimin ichit me linyọn̄ yi. (Fuk Ichichili 14:​6, 7.) Jioba ikisa ebi usun̄ kan̄ ikpa ata etip kan̄ inyi ebi ofifi ife. Ebi osat Awaji si ekigọọk itap ubọk irọ inyi ebi imama atikọ ekọt enu ntitiin̄ Jioba. Ebi eyi Awaji esikilook ata etip, ema ekikpọk mbum ataak echi Setan okisa uwu uriaak ataak ikan̄ itoon̄ Jioba. (Ichi 18:​2, 4) Sọnja mgbọ, mefiat otutuuk ataak uwu uriaak isan̄a kpai, otutuuk ebi imama Awaji ogwu atikọ menyi ọmọ umin eyi ochuchubọk igbe ọmọ.​—Ichi 17:16.

11. Ike owa ke eji ebekọt isa iriọọn̄ ebi ikiweek itọtọbọ ebum inyi Jioba me atikọ?

¹¹ Jioba ikisa ebi ife geelek inan̄a me otutuuk linyọn̄ yi inu me emen ntitiin̄ kan̄. (Ichi 7:​9, 10) Ema esinọ mkpọ ofolek Jioba, mè imun̄ ibe ke inu ema ekikween̄ ire atikọ, eya okitaba ema inu ntitiin̄ kè Jioba. (Mak 13:10) Me chereyi, isibi utoon̄ enenen ibe ke eji ere ebi ikitọbọ ebum inyi Jioba me oniin̄ otatat. Ogwu nriran Malakai itumu ibe: “Mgbọ ya, enyi mêkpọk imun̄ esese òkup me etete ebi ata irọrọ mè ebi ikpak, mè etete ebi ìkisi ikwaan̄ inyi Awaji mè ebi kpekisi ikwaan̄ inyi Awaji.” (Mal 3:18) Sa me eru kiban̄ mè ikwaan̄ ilolook ata etip, ebi usun̄ Jioba ekijeen̄ ibe ke ema ekitọbọ ebum inyi Awaji ogwu atikọ.

12. Ike owa ke ikwaan̄ ilolook ata etip okisa irọ nkeek Jioba iso?

¹² Sa me ikekilook ata etip Ama Ubọọn̄, eji ekisiki ibot inyi ikan Jisọs onyibe mè ikirọ nriran Baibul iso si. (Mat 24:14; 28:​18-20) Bak lek ikwaan̄ yi, ebi ene me otutuuk linyọn̄ yi mekikana ebi udun̄ kè Karais, mè ikaan̄ si ikpọchieen̄ itọtọbọ ebum inyi Awaji ogwu atikọ ire mgbọ ikakaan̄ge itata. Jioba ikekisa eji irọ nkeek kan̄ iso ichubọk ire irek omimin!

EJI MEKỌT ICHIEEK INYE IBE KE USE AWAJI MORỌ ISO

13. Ebi owa kè Setan ochubọk iweek itututuku, bak lek keke?

¹³ Setan ichuchubọk ikinaan̄ ejit mije, ‘îriọọn̄ ibe ke ìsik sọntiik mgbidim mgbọ gaalek’ mefiatbe inyọn̄ kan̄. (Ichi 12:​12, 13) Yọk ichubọk ikitutuku ebi ekenbe aran̄, orere, ebi Jioba ogobobe me inyọn̄ ijọn̄ yi ibe egọọk Jisọs ekpulu me Ama Ubọọn̄ kan̄. Ema ere ‘ebi ikisun̄ ikan Awaji mè ikaan̄ ikwaan̄ ilolook ebi ene atikọ ofolek Jisọs.’ (Ichi 12:17; 14:12) Setan ikitutuku si ebi geelek ikibieen̄ ebi ekenbe aran̄ inye.

14. Keke obobọkọ irek me mgbọ Setan oboyaka isi ida otutuuk ebi eyi Jioba? (Kpọ si ogugo okup me yi.)

¹⁴ Esifiat otutuuk ataak uwu uriaak isan̄a, Setan mè ebi ikigọọk ọmọ meyaka isi ida otutuuk ebi eyi Jioba. Mgbọ ya ke akọn̄ Amagedọn obobene. (Ichi 16:​13, 14, 16) Jisọs mè ebi akọn̄ kan̄ me emen inyọn̄ menyan̄a ebi ikitọbọ ebum inyi Jioba mè ifiat otutuuk ebi ijo ife. (Ichi 19:​19-21) Me mgbọ ya, otutuuk ebi ikikan̄ ataak, mè ebi mkpikpak, mè ebi ikifiaan̄ ene kpebeyaka ikup. (Ichi 21:8) Otutuuk ene meriọọn̄ ibe ke Jioba ire Awaji ogwu okirọ inu otatat mè ikitumu atikọ mgbọ geelek.

15. Keke orọ eji ebekọt ichieek inye ibe ke use Awaji ochieekbe ofolek mgbọ okup me isi morọ iso? (Asaya 65:​16, 17) (Kpọ si ogugo.)

¹⁵ Me chereyi, ebi ene me inyọn̄ yi ekpọkpọk ikup inye ikitim etim mè ikikan̄ ataak ikeme ge ge. Ire, sa me ntap-ubọk Jioba, ebi usun̄ kan̄ ekukup me obọp ge. Jioba okititiin̄ otutuuk ebi imama atikọ itap me emen ototun̄ ukan̄ kan̄. Kpunu inu geege oborọ ibe Jioba ikagbana ebi eyi kan̄ mè ikwaan̄ ema ekirọ inyi ọmọ. (Fuk Asaya 65:​16, 17.) Eji mekọt ichieek inye ibe ke Jioba morọ use kan̄ iso. Bak lek keke? Bak lek ogwu otuchieen̄ Pọọlu itumu me ikpa Ebi Rom 8:​38, 39 ibe: “Mè ìre mkpa mè ìyaka ire ugwem, mè ìre ebi osat Awaji, mè ìyaka ire ijo erumun̄, mè ìre inu òkukup me mgbọ keyi, mè ìyaka ire echi òkup me isi, mè ìre unye eyi mkpulu geelek, mè ìre ere òbebene ichit, mè ìre ere òdọdọk ichit, mè ìyaka irere ofifi inu geelek me etete otutuuk inu geelek Awaji orombe. Kpunu inu geege obokọt iche eji isan̄a me lek imumechieen̄ Awaji okaan̄be me lek kiji, eyi eji ekaan̄be sa me lek kè Jisọs Karais Okaan̄ kiji.”

16. Keke orọ eji ebetoon̄ otutuuk ejit kiji me lek Jioba?

¹⁶ Eji mikaan̄ owuwa inu orọrọ eji ebetoon̄ ejit me lek Jioba, Awaji ogwu atikọ. Ọmọ orom eji. Ima eji si enenen. Me mgbọ keyi, ikitititiin̄ ebi ene igbaalek inan̄a me otutuuk linyọn̄ yi ibe enetọbọ ebum enyi ọmọ me oniin̄ otatat. (Asaya 60:22; Jek 8:23) Eji miriọọn̄ ibe ke Jioba ikirọrọ nkeek kan̄ iso, ke motap uyaka me lek ofiaan̄ mè ataak kè Setan sọnja mgbọ. Kè eji ebeek ike Debit obeekbe ibe: Ìtọn̄ ikup inyi Jioba, Awaji . . . ọmọ gaalek ore ogwu òkirọ uyeke inu. Ìtọn̄ erieen̄ kan̄ òmimin ìre mgbọ geelek; kè otutuuk linyọn̄ etọn̄ ọmọ.”​—Itọn̄ 72:​18, 19.