Kweek Nye Kikaan̄ Oruru Me Lek Ntap-Ubọk Jioba

1. Keke ore usini inu ebilene echubọk iweek inyi ekọt eluk ugwem? (Matiyu 5:3)

Eji miweek usini inu inyi eji ekọt eluk ugwem, kubọk inorie, ofọnti mè ere iluluk. Ire Jioba orom eji ikeyi ibe ekeweek inu chi echi okukup ufiak me ugwem. Ire eji kpekaan̄ inu chi, ikerere me mgbidim mgbọ, ugwem moyọt eji me lek enenen, mokọt isibi mkpa si. Ikare ufiak eyi anam akpalek gaalek ke Jioba otap me emen kiji, itap si ufiak eyi emen ekwukwu, orere, ufiak irọriọọn̄ ọmọ mè iyayaka lek imaan̄ me lek kan̄. (Fuk Matiyu 5:3.) Ire eji ichubọk iweek ikakaan̄ ata ubelejit, eji mekirọ mkpọ okijeen̄ ibe ke eji miriọọn̄ ufiak emen ekwukwu eji ekaan̄be mè ikikpọ chieen̄ me lek ufiak ya.

2. Keke ke obosa itọt me lek mkpọ isibibe owu irọriọọn̄ ufiak eyi emen ekwukwu kwun̄?

² Ida usem esabe ikaba ‘irọriọọn̄ ufiak emen ekwukwu’ ikisa nkeek ene ifo lek ogwu okibeek mkpọ, ogwu ofọnti kan̄ ogwakbe, okwekweek irek me agba oniin̄. Iwọ mije kpunube inorie, ebi ene si ekijijit ọmọ bak lek ubọk ikupbe, ikisa lek kan̄ ida uyok ura ikarek melek utọọk eririeen̄. Inyi ikọt igat ugwem, ogwu okibeek mkpọ yi iriọọn̄ ibe ke ọmọ iweek ntap-ubọk. Ubọk yaage si, ogwu orọriọọn̄ ibe ke ọmọ ikaan̄ ufiak eyi emen ekwukwu, ikiweweek ntap-ubọk isasa irọ ibe irek kan̄ inwene. Eya orọ, ikisasa me uyok uyok ejit ibọkọ itap inu emen ekwukwu echi Jioba okisan̄a isibi inyi ebi imama ọmọ.

3. Keke ke eji ebekween̄ me emen ibot usem yi?

³ Me emen ibot usem yi, eji medasi ikween̄ mkpọ inan̄a me lek akpat ukot ogwu enenwaan̄ Fonisia ge obebeek ntap-ubọk kè Jisọs. Mfufuk yi mogon aban me lek eru ita echi ogbegbe ibe ogwu orọriọọn̄ ufiak emen ekwukwu kan̄ ikaan̄. Eji menenikween̄ mkpọ inan̄a me lek Pita, Pọọlu mè Debit, ebi iyayaka lek imaan̄ me lek ntap-ubọk Jioba.

INU EJI EBEKWEEN̄ ME LEK OGWU ENENWAAN̄ GE OWEWEEK NTAP-UBỌK

4. Keke ke ogwu enenwaan̄ Fonisia ge oweek ibe Jisọs irọ inyi ọmọ?

⁴ Usen ge, ogwu enenwaan̄ Fonisia ge isisi lek Jisọs, mije ijo ekwukwu òkisisaak gwun̄ kan̄ enenwaan̄. (Mat 15:​21-28) Ogwu enenwaan̄ yi ogegele ekpe mè ibeek ibe Jisọs itap ubọk igwa gwun̄ kan̄. Ogwu enenwaan̄ Fonisia yi ijeen̄ eru echi osisibi esese mgbọ isibe lek Jisọs. Kè eji ekween̄-nu oniin̄ ita eji ebekọt isa igọọk akpat ukot kan̄.

5. Eru echi owa ke ogwu enenwaan̄ ya ojeen̄, ike owa ke Jisọs osa ifọọk ogwu enenwaan̄ ya otu? (Kpọ si ogugo.)

⁵ Ogwu enenwaan̄ Fonisia ijeen̄ nsikilek. Keke orọ eji ebekọt itumu ikeya? Bak lek ikanaan̄ ejit me mgbọ Jisọs osabe ọmọ itọt me lek gwun̄ ibo, eyi ebi ekarege ebi Ju ekikaan̄ me uwu kiban̄. Keke ke owu morọ mebe ke Jisọs itumu usem ya inyi owu? Ire owu ke onaan̄ ejit mè ojit ibọbọkọ ntap-ubọk Jisọs ni? Ikare mkpọ ogwu enenwaan̄ ya orọbe ire eya. Ikare eru nsikilek gaalek ke ijeen̄, ijeen̄ si eru itetet lek inye, ike ikupbe inye ikibeek ntap-ubọk kè Jisọs. Keke obieen̄ ọmọ ibe irọ ikeyi ni? Bak lek ikaan̄ ichechieek me lek Jisọs. Me atikọ, ichechieek ogwu enenwaan̄ yi ibieen̄ Jisọs ibe itap ubọk inyi ọmọ. Ikerere ibe ke Jisọs itumu inyi ogwu enenwaan̄ ya ibe “eria emi inu me lek arọọn̄ òchechep me otoko kè Ijeren gaalek,” itap ubọk inyi ọmọ mè isan̄a ijo erumun̄ isibi me emen ogwu gwun̄.

6. Keke ke eji ekween̄ me lek mfufuk ofolek ogwu enenwaan̄ Fonisia?

⁶ Ire eji iweek ikakaan̄ oruru inan̄a me lek ntap-ubọk Jioba, igbe ibe eji egọọk akpat ukot ogwu enenwaan̄ yi. Eji kpelọlọ ikakaan̄ eru nsikilek, itetet lek inye mè ikakaan̄ ichechieek onyenye. Ire gaalek ogwu osisiki lek obokọt itet lek inye ikibeek ntap-ubọk Jioba. Eji si mekaan̄ ichechieek onyenye me lek Jisọs mè itoon̄ ejit me lek ebi ikisa inyi eji ntọ-ubọk me chereyi. (Mat 24:​45-47) Jioba mè ogwu Gwun̄ mikibele ejit me mgbọ eji esikibe lek, ikup inye ikibeek ntap-ubọk kiban̄ mè ikaan̄ ichechieek. (Sa tọt me lek Jemis 1:​5-7.) Mgbọ keyi, kè eji ekpa ubọk Jioba okisa inyi eji ntọ-ubọk mè ikinyi eji si inu echi obokirọ ibe eji ekebele ejit. Eji memun̄ si inu eji eberọ inyi eji ekaan̄ inu chi, sa me ikwekween̄ inu Pita, Pọọlu mè Debit erọbe.

GỌỌK AKPAT UKOT PITA MÈ KWEEK NYE KIKWEEN̄ USEM AWAJI

7. Kpasi ikwaan̄ ke Jisọs onyi Pita, keke si okup ufiak ibe irọ? Kpa wele-nu. (Ebi Iburu 5:14–6:1)

⁷ Kpọ-nu mkpọ Pita orọbe. Ọmọ ire ge me lek ebi idadasi iriọọn̄ ibe ke Jisọs ore ogwu Mesaya. Pita iriọọn̄ ibe ke Jisọs ore ogwu Jioba osabe ikijeen̄ ebi eyi kan̄ inu eyi “òkinyi ene ugwem ikakaan̄ge itata.” (Jọn 6:​66-68) Sabum Jisọs ofobe emen inyọn̄, itumu inyi Pita ibe: “Nyi arọọn̄ n̄a inorie.” (Jọn 21:17) Pita isiki ibot inyi Jisọs mè irọ ikwaan̄ ya iso. Jioba si isa ọmọ ige ikpa iba me emen Baibul. Ire, ikup ufiak si ibe Pita me lek kan̄ ikaan̄ oruru inan̄a me lek inorie emen ekwukwu. Kubọk inu njeen̄, Pita ikween̄ usini ikpa echi Pọọlu owuukbe lek ige. Ofolek inu cha Pọọlu ogebe, Pita itumu ibe: “Usini inu îkige me emen ikpa kan̄ ìre inu òkiyọyọt ikọkọt igobo itet.” (2 Pita 3:​15, 16) Ire, isibi utoon̄ ibe ke Pita itetet lek inye ikifuk, mè ikaan̄ ichechieek ibe ke Jioba motap ubọk inyi ọmọ ikọt igobo inu Pọọlu ogebe itet mè itap me ikwaan̄.—Fuk Ebi Iburu 5:14–6:1.

8. Ike owa ke Pita orọ eru mgbọ Jioba onyibe ọmọ ayaya ntọ-ubọk?

⁸ Pita ijeen̄ ibe ke ọmọ ikaan̄ ichechieek me lek Jioba sa me iluluk igọọk ntọ-ubọk kan̄. Kubọk inu njeen̄, usen ge, Pita imun̄ ogwu osat ge okitumu inyi ọmọ ibe itaka anam echi ikan kè Mosis obe mè ebi Ju ekataka me emen ilaak òkpọchieen̄ ge. Mbet ntọ-ubọk okup ikeyi moke ebi Ju chieen̄. Adasi mkpọ Pita ofọọkbe ire: “In̄-in̄, Okaan̄-ene, m̀kpakọt, mije, ǹkararak ìkitaka inu geege òrere mbuban inu, mè echi ikatanage me isi Awaji.” Ogwu osat ya onenitumu ibe: “Inu geelek Awaji orombe itana, owu katumu ibe ke ìkatana.” (Ikwaan̄ 10:​9-15) Pita isiki ibot mè inen̄e nkeek kan̄ isun̄. Ike owa ke eji esa iriọọn̄ eyi? Sọnja mgbọ iraraka imun̄be ilaak ya, ogwu ikarege ogwu Ju ge ekigwen Kọniliọs oraria ebirieen̄ ita ibe esi egwen Pita ibe inu. Mebe ire mgbọ Pita ikamumun̄ ilaak ya, kpomochieek ininin̄ uwu ogwu ikarege ogwu Ju. Ebi Ju ekimun̄ ebi ekarege ebi Ju kubọk ebi ekatanage. (Ikwaan̄ 10:​28, 29) Ire, mgbọ yaage Pita omun̄be ibe ke Jioba ikiweek ibe otutuuk ife geelek enọ ata etip, inwenwene kan̄ mè isiki ibot inyi Jioba. (Urọk 4:18) Ilook Kọniliọs mè ebi uwu kan̄ ata etip. Otutuuk kiban̄ mibọkọ atikọ itap, mibọkọ ekwukwu mbuban mè ikaan̄ ntap-me-mun̄ si.—Ikwaan̄ 10:​44-48.

9. Kpasi oruru iba ke eji ebekaan̄ ire eji ikikween̄ mkpọ echi oyọyọt igogobo itet?

⁹ Kubọk Pita, igbe ibe eji ekekween̄ usem Awaji usen geelek. Owuwa mgbọ, eji ekifuk atikọ echi ofefet igogobo itet. Kè eji etap efuuk ekekween̄ si atikọ echi oyọyọt. Ikup ufiak ibe eji ekesan̄a mgbọ esibi mè etap efuuk ekekween̄ mkpọ edọk inyi eji ekọt egobo inu okup me Usem Awaji etet ejaan̄. Keek-nu oniin̄ iba eji ebesa ikaan̄ oruru ire eji ekirọ ikeyi: Adasi, eji mekween̄ mkpọ ofolek Jioba echi oborọ ibe ima mè ulibi eji ekaan̄be me lek kan̄ ikimin; òso iba, eji mekween̄ mkpọ okup uyeke uyeke ofolek Jioba echi eji kpewuuk lek iriọọn̄. Eyi mobieen̄ eji ibe ekekpa mkpọ ofolek Jioba enyi ebi ofifi ife. (Rom 11:33; Ichil 4:11) Akpat ukot Pita ijeen̄ eji ofifi inu si: Esinwene ngobo-ntet eji ewuukbe lek ikaan̄ ofolek ere Baibul ge, ikup ufiak ibe eji egwat lek ebọkọ unwene ya etap mè enwene nkeek mè irọrọ kiji. Eji esikirọ ikeya, Jioba mokup inye ikinyi eji ntọ-ubọk kan̄. Irọrọ ikeya si motap ubọk irọ inyi eji ekọt ekegbe utoon̄-ejit enyi Jioba.

GỌỌK AKPAT UKOT PỌỌLU MÈ KWEEK NYE KIKAAN̄ ERU ECHI OKINEME AWAJI

10. Igọọk me lek mkpọ okup me ikpa Ebi Kọlọsi 3:​8-10, keke ke eji eberọ inyi Jioba ikibele ejit inyi eji?

¹⁰ Jioba ikiban eji sa me ijejeen̄ eji ubọk eji ebesa ikikaan̄ eru obokineme ọmọ. (Fuk Ebi Kọlọsi 3:​8-10.) Ikimọnọ mgbọ mè efuuk isasa ikaan̄ eru echi okineme Awaji. Keek-nu mkpọ ofolek ogwu ikwaan̄ Pọọlu. Bene me mgbọ ijija kan̄ ke ibene ikirọ mkpọ inyi ọmọ ikọt ikaan̄ nnwọn-isi Awaji. (Gal 1:14; Filip 3:​4, 5) Ire, ikachubọk igobo itet ubọk ibosa itọbọ ebum inyi Awaji me oniin̄ otatat. Ikariọọn̄ si atikọ ofolek Jisọs. Pọọlu ire ogwu ugumu, eya orọ, ikarọ mkpọ me oniin̄ eyi oboneme Awaji. Pọọlu itumu ibe ke me mgbọ oraraka, ke ọmọ ire ogwu okirọ ene inu esip.—1 Tim 1:13.

11. Kpasi unwene si ke Pọọlu okaan̄ irọrọ me lek eru kan̄? Kpa wele-nu.

¹¹ Sabum ikanabe ogwu eyi Karais, Pọọlu ire ogwu okigwat lek inaan̄ ejit. Mfufuk ge me ikpa Ikwaan̄ itumu ibe ke Pọọlu inaan̄ ejit enenen inyi ebi udun̄ kè Jisọs ire lek “ikitap ukpook, mè mkpa” me lek kiban̄. (Ikwaan̄ 9:1) Eyi ikanabe ogwu eyi Karais, Pọọlu ira itap efuuk enenen inyi ikayaka ikigwat lek inaan̄ ejit, ikana si ogwu okakaan̄ ime mè ata ejit. (Efes 4:​22, 31) Ikerere ikeya, Pọọlu irọ ilọ usini mgbọ. Kubọk inu njeen̄, ọmọ mè Banabas mikaan̄ ifan̄a ofolek inu ge, inu ya “otatap ikpele ibaak me etete kiban̄.” (Ikwaan̄ 15:​37-39) Me mgbọ ya, Pọọlu ikarọ inu ubọk Awaji oweekbe ibe irọ, ire, ikawọ lek, ikukup inye ikitap efuuk inyi ikọt ikaan̄ nnwọn-isi Awaji.—1 Kọr 9:27.

12. Keke otap ubọk inyi Pọọlu ikup inye ikirọ unwene me lek eru kan̄?

¹² Pọọlu ikọt irọ unwene me lek eru kan̄ bak lek isikibe lek. (Filip 4:13) Kubọk Pita, Pọọlu iyaka lek imaan̄ me lek Jioba inyi itap ubọk inyi ọmọ ikọt irọ unwene ogbegbe me ugwem kan̄. (1 Pita 4:11) Ikerere ikeya, Pọọlu ikirọ ilọ usini mgbọ, ire, efuuk isita ọmọ me owot, ira ikeek ata mkpọ ofolek inu Jioba orọbe inyi ọmọ, eya motatap ọmọ efuuk me owot ibe ikup inye ikirọ unwene mè ikirọ ibe Jioba ibele ejit.—Rom 7:​21-25.

13. Ike owa ke eji ebekọt igọọk akpat ukot kè Pọọlu?

¹³ Ikerere ibe ke eji mekitọbọ ebum inyi Jioba me owuwa acha, igbe ibe eji ekup enye ekerọ unwene me lek eru kiji. Eji merọ ilọ usini mgbọ. Kubọk inu njeen̄, eji mekọt ikigwat lek inaan̄ ejit mè iyaka ire ikitumu usem ikanwọnge. Inu chi isibọkọ irek, eji ekakeek ibe ke eji kpebeyaka ikọt irọ inu oboneme Jioba. Kpan̄asi ikeya, eji ekup enye ekesa irọrọ unwene me ubọk eji ekikeek mkpọ mè ikirọ mkpọ. (Rom 12:​1, 2; Efes 4:24) Igbe ibe eji eriọọn̄ inu yi okukup ufiak. Ire eji iweek ikukup inye ikirọ unwene me lek eru kiji, igbe ibe eji ekup enye ekegobo etet ejaan̄ inu echi Jioba okiweek me ubọk kiji.

GỌỌK AKPAT UKOT DEBIT MÈ TELE IBE JIOBA IKIBEM OWU

14-15. Me oniin̄ okukup ke Jioba okisa ibem ebi eyi kan̄? (Okwa Itọn̄ 27:5) (Kpọ si ogugo okup me ikpa yi.)

¹⁴ Inyi eji ekaan̄ ata ubelejit, eji miweek mbem Jioba. Me oniin̄ okukup ke Jioba okisa ibem eji? Keke ke eji eberọ inyi ikup inye ikibem eji?

¹⁵ Ogwu ubọọn̄ Debit ichieek inye ibe ke Jioba mobem ọmọ me mgbọ oyọyọt. (Fuk Okwa Itọn̄ 27:5.) Ike owa ke Jioba okisa ibem ebi eyi kan̄ me chereyi? Jioba ikibem eji isan̄a me lek ene geelek mè inu geelek obokọt ifiat ichechieek kiji me lek kan̄. Ikerere ibe ke ebi ene misa igbagban eji ibe ekayaka ikitọbọ ebum inyi ọmọ, ichieek eji use ibe ke mobem mgbaan̄je kiji melek kan̄. (Itọn̄ 34:7; Asaya 54:17) Setan, ebi ijo ekwukwu, mè ebi ikitutuku eji mikaan̄ unye. Ire, Jioba ikaan̄ unye igak ema. Ikerere ibe ke mikpan̄ eji, Jioba mojomo eji me mkpa. (1 Kọr 15:​55-57; Ichili 21:​3, 4) Jioba ikekitap ubọk inyi eji si me mgbọ eji ekaan̄be sasaak, inyi eji ekọt ekup enye eketọbọ ebum enyi ọmọ. (Urọk 12:25; Mat 6:​27-29) Nte kiji Jioba inyi eji bọn ute irieen̄ mè ibaan̄ ebi ikitap eji efuuk me owot mè ikibieen̄ eji inye me mgbọ ufialek. Inyi eji si ebi ugane ntitiin̄ ebi ikijeen̄ eji inu mè ikitap ubọk inyi eji etet ichechieek kiji enye. (Asaya 32:​1, 2) Eji esisi nkween̄mkpọ ntitiin̄, eji mikikween̄ esese esese oniin̄ eji ebekọt itele ibe Jioba ikitap ubọk inyi eji mè ikibem eji.—Iburu 10:​24, 25.

16. Me oniin̄ okukup ke Jioba osa ibem Debit?

¹⁶ Me mgbọ Debit osikibe ibot inyi Jioba, isan̄a lek kan̄ isan̄a me lek mkpọ unan okirọ ebi ikigen ibak irọ ijo inu. (Sa tọt me lek Urọk 5:​1, 2.) Ire, mgbọ ijitbe igọgọọk onineen̄ Jioba, Jioba ikakput ọmọ ibe ikabọkọ mkpukpe ijo ntumu-mfieek kan̄. (2 Sam 12:​9, 10) Usini mgbọ, Debit ibọkọ ukwook si bak lek ebi ofifi ife erọbe ikeme ọmọ. Me irek chi ge ge, Debit ikichichili ejit ibeek uriaak inyi Jioba. Jioba ofọfọọk ọmọ otu sa me irọrọ ibe sasaak kan̄ igele. Irọ inyi Debit iriọọn̄ si ibe ke ima ọmọ enenen, ke mokpọ chieen̄ me lek kan̄ si.—Itọn̄ 23:​1-6.

17. Ike owa ke eji ebekọt igọọk akpat ukot kè Debit?

¹⁷ Eji mekọt igọọk akpat ukot kè Debit sa me ikekiweek nteme Jioba me mgbọ eji eberọ ntumu-mfieek. Eji ekawuuk si ibe ke ire eji kpesiki ibot inyi Jioba, ikpobokput eji isan̄a me lek mkpọ ijo ntumu-mfieek kiji obosan̄a isibi. (Gal 6:​7, 8) Ire, ikerere me mgbọ eji esikibe ibot inyi Jioba, eji mekọt ibọkọ ukwook bak lek ofifi ofifi inu. Me mgbọ ufialek, eji mekọt ikpa otutuuk mkpọ ofolek sasaak kiji inyi Jioba mè ibeek ibe itap ubọk inyi eji. Ọmọ mokat eji ejit mè irọ inyi eji emun̄ ibe ke ọmọ ima eji.—Filip 4:​6, 7.

KWEEK NYE KIYAKA LEK MAAN̄ ME LEK NTỌ-UBỌK JIOBA

18. Keke ke owuwa ebi ene ekikeek ofolek ntọ-ubọk okinan̄a me ubọk Jioba, keke ke eji eberọ ire eji eweek ibe Jioba ikinyi eji ntọ-ubọk? (Kpọ si ogugo.)

¹⁸ Ibot usem kiji eyi acha 2026 ibe: “Uga ubelejit okup inyi ebi geelek ìrọriọọn̄ ibe, isan̄a me lek Awaji, ke ema kpekup me lek inu geege.” Ichubọk ikup ufiak me chereyi ibe eji erọ egọọk ike Jisọs otumu mè eyaka lek emaan̄ me lek ntọ-ubọk Jioba. Bak lek keke ni? Bak lek owuwa ebi ene kpechieek ibe ke ema miweek Awaji mè ntọ-ubọk kan̄ me ugwem kiban̄. Owuwa ebi ene michieek me lek Awaji, ire, ema egobo itọtọbọ ebum inyi ọmọ me oniin̄ oneneme ema. Ire, usini ene egobo iyayaka lek imaan̄ me lek ntọ-ubọk ebilene. Eya orọ, ema kpekikaan̄ ubelejit. Eji ekagọọk akpat ukot kiban̄. Kpan̄asi ikeya, keke ke eji kpelọ irọrọ inyi eji ekup inye ekeyaka lek emaan̄ me lek Jioba? Eji mekup inye ikikween̄ Usem Jioba, ikijeen̄ eru echi okineme ọmọ, ikisiki ibot inyi ọmọ mè itele ibe ikibem eji.