Jioba Inyan̄a Jisọs

Me ido ge ojọjọn̄ọ ere me lek ama Ijeren, ikaan̄ ebi ichechieek ibe ke ntoronyan̄ mokọt ikijeen̄ ema oniin̄. Me ikakwun̄ ge, usini ebirieen̄ inan̄a me agan̄ mbum-ura mimun̄ inu okije me isinyọn̄ obet lek ntoronyan̄ ge ototoon̄ ijaan̄ mè igọọk inu ya. Ike ema ekije igọọk inu obet lek “ntoronyan̄ ya,” ema erere Jeruselem. Me ere ya, ema ekekido ebi ene ibe: ‘Gwun̄ ya ogwu obokana ogwu ubọọn̄ ebi Ju ikup me owa? Eji enu inenitọbọ ibot inyi ọmọ.’

Erọdu ogwu ubọọn̄ Jeruselem ikaan̄ sasaak enenen mgbọ inọbe ibe ke ikaan̄ ogwu obonikana ubọọn̄. Igwegwen ebi ibot ngwugwa mè ido ema ibe: ‘Ire ere owa ke ogwu obokana ubọọn̄ ya okup?’ Erọdu ododo ebi ibot ngwugwa ibe: ‘Owa ke eman gwun̄ yi obonire ubọọn̄?’ Ema efọfọọk ibe: ‘Ebi nriran ebe ke ebeman gwun̄ ya me Beteleyem.’ Erọdu ogwegwen ebirieen̄ cha inan̄a me agan̄ mbum-ura mè itumu inyi ema ibe: ‘Ije isi Beteleyem isi iweek gwun̄ ya. Enyi isimun̄ gwun̄ ya, igwu ikom initumu inyi emi ere ikupbe, ke emi si magọọk isi itọbọ ibot inyi ọmọ.’ Ire, inu itumube ya ire ataak.

Inu obet lek ntoronyan̄ ya okpọkpọk ibene ikije. Ebirieen̄ cha egọgọọk inu obet lek “ntoronyan̄ ya” isi ire Beteleyem. Mgbọ “ntoronyan̄ ya” oyakabe me inyọn̄ uwu ge, ebirieen̄ cha eninin̄ emen uwu ya. Ema emumun̄ Jisọs melek Meri ogwu uga. Ema egegele igwook me ijọn̄, mè itọbọ ibot inyi ọmọ, mè isan̄a alata araran̄, mè okpukpuk mgbe òkidun̄u olu utop utop ònan̄a me lek uti ekigwen farankinsens, mè eyi ònan̄a me lek uti ekigwen mâa isibi isa iche inyi gwun̄ ya. Ire Jioba ochubọk iria ebirieen̄ cha inu me lek Jisọs ni? In̄-in̄.

Me eririeen̄ ya, Jioba otutumu inyi Josefu ibe isa Jisọs mè Meri ilibi ifo Ijipiti mè ema ekup me ere ya mege monyibe ema ida ibe egwu ekom mije, Erọdu okiweek ikpakpan̄ Jisọs. Mgbọ yaage, Josefu mè ebi ototun̄ ukan̄ kan̄ elilibi ifo Ijipiti.

Jioba otutumu inyi ebirieen̄ cha inan̄a me agan̄ mbum-ura ibe ekagwu ikom isi lek Erọdu. Mgbọ Erọdu omun̄be ibe ke ema kpeyaka inu, inanaan̄ ejit enenen. Eyi irebe ibe ke ikariọọn̄ ere Jisọs okupbe, inyinyi ida ibe ekpan̄ otutuuk asa nsabọn irieen̄ ikup me Beteleyem. Ire, kpunu inu geege oborọ Jisọs, mije, ema ekup me Ijipiti.

Ike mgbọ ojebe, Erọdu okwukwu. Jioba onenitumu inyi Josefu ibe: ‘Mgbọ keyi enyi mekọt igwu ikom ifo ke inu geege ikpoborọ enyi.’ Josefu, Meri mè Jisọs egwugwu ikom ifo Ijeren, ema ebebene ikiluk me uwu kiban̄ me Najeret.