Mgbọ Jisọs Okupbe Ijija

Josefu, Meri, mè Jisọs melek ofifi nsabọn ebirieen̄ mè ebibaan̄ kiban̄ eluk me Najeret. Josefu ikirọ ikwaan̄ usọ inyi ikọt ikikpọ chieen̄ me lek ototun̄ ukan̄ kan̄. Ikijeen̄ ema mkpọ ofolek Jioba mè ikan kan̄ si. Ebi ototun̄ ukan̄ kè Josefu mikisi uwu mbuban mgbọ geelek ikisi itọbọ ebum, mikisi Ijọk Iraraka me Jeruselem acha geelek si.

Mgbọ Jisọs orebe akọp mè acha iba, ebi ototun̄ ukan̄ kan̄ ejeje ujọn̄ọ ije isi Jeruselem ike ema ekirọ. Owuwa ebi ene inunu inirie Ijọk Iraraka ejojot ama ya. Mgbọ ijọk ya otabe, Josefu mè Meri ebebene ikifo ama kiban̄ me nkeek ibe ke Jisọs okigọọk urum ebi ikije ifo me oniin̄. Ire, mgbọ ema ebenebe ikiweek ọmọ me etete ebi uwu kiban̄, kpemun̄ ọmọ.

Ema egwugwu ikom isi Jeruselem. Ema esa egwe ita iweek Jisọs. Me ota kan̄, ema eweweek ọmọ imun̄ me uwu mbuban, me etete ebi ijejeen̄, ike ikiriọọn̄ ubọk igban̄ mè ikido ema ata idodo. Inu yi Jisọs orọbe ineme ebi ijejeen̄ cha ire lek ema ebenebe ikido ọmọ esese esese idodo. Ubọk isabe ifọọk ema otu ike ema chieen̄ si, mije, ema mimun̄ ibe ke igobo ikan Jioba itet ijaan̄.

Josefu mè Meri mikaan̄ sasaak enenen. Meri otutumu inyi ọmọ ibe: ‘Gwun̄, ìre keke ire eyi owu orọbe eji ikeyi? Nte kwun̄ melek n̄a mîfieek owot, mè inyinya ikana ere iweek owu igak, eji kpemun̄ owu.’ Jisọs ofọfọọk ibe: ‘Ire enyi kperiọọn̄ ibe ke makup me uwu nte n̄a ni?’

Jisọs onenigọọk ebi ogwu ute ifo uwu kiban̄ me Najeret. Josefu ijeen̄ Jisọs ikwaan̄ usọ. Mbet ene okukup ke okeek ibe ke Jisọs ore ike ikimin isibi? Ike ikimin isibi, Jisọs ikpọkpọk ikikaan̄ iriọọn̄-inu mè nnwọn-isi Awaji mè eyi ebilene.