Ebi Osat Milook Imaman kè Jisọs

Ogwu ibot mkpulu ebi ido Rom, Ọgọsitọs, ogwu Sisa, onyinyi otutuuk ebi Ju ida ibe egwu ekom eka ama kiban̄ inyi ema enegọọk etap erieen̄ me ikpa. Eya orọ, Josefu mè Meri ejeje isi Beteleyem, ere ebi ototun̄ ukan̄ kè Josefu enan̄abe. Mgbọ Meri oboman gwun̄ okigbet.

Me mgbọ ema erebe Beteleyem, ema ekup me uwu anam ge mije, ere ya gaalek ke ema ekaan̄ irek. Ire me ere ya ke Meri oman gwun̄ kan̄ enerieen̄ Jisọs. Ikakat ọmọ me ekwut omemem mè imaan̄ ọmọ me emen okwa ekisa inyi anam inorie.

Me agba lek Beteleyem, usini ebi ikpukpo arọọn̄ ekup me oyet me eririeen̄ ikikpọ chieen̄ me lek arọọn̄ kiban̄. Mgbọ yaage, ogwu osat Awaji ge osisibi ikeke me isi kiban̄, utoon̄ ujamgbugbo Jioba ototoon̄ ikana ema. Ukpook otetet ebi ikpukpo arọọn̄ cha, ire, ogwu osat ya otutumu inyi ema ibe: ‘Ikatet ukpook. Nsa etip unwọọn̄ ijet enyi. Miman ogwu Mesaya chereyi me Beteleyem.’ Mgbọ yaage, owuwa ebi osat ekakana isibi me akpabin inyọn̄ mè ikitumu ibe: ‘Itọn̄ mè umin ikup inyi Awaji me emen inyọn̄ mè esuuk ikup me inyọn̄ ijọn̄.’ Ebi osat cha eneninan̄a itele ebi ikpukpo arọọn̄ cha. Keke ke ebi ikpukpo arọọn̄ cha eyaka irọ?

Ebi ikpukpo arọọn̄ cha etutumu inyi ge ge ibe: ‘Eji enesi Beteleyem mgbọ keyi.’ Ema egwagwat lek isi mè imun̄ Josefu mè Meri melek ayaya gwun̄ kiban̄.

Inu ebi osat cha elookbe ebi ikpukpo arọọn̄ cha ike otutuuk ebi inọnọ chieen̄. Meri ikeek inu ogwu osat otumube inyi ọmọ idọk, ikawuuk si usem cha. Ebi ikpukpo arọọn̄ cha mitọn̄ Jioba me lek otutuuk inu ema emun̄be mè inọ, ike ema egwube ikom ikifo lek arọọn̄ kiban̄.