Jioba Ikaan̄ Ime Me Lek Jona

Ebi ikup me ama ile ge ekigwen Ninife ire ebi mkpikpak. Jioba iria Jona ibe isi ama ya isi itaba ebi ene ubọk me utọn̄ ibe enwene ugwem kiban̄. Ire, Jona olilibi isi ofifi agan̄ mè inin̄ uji obosi Tasis, ema ebebene ikikọp ije.

Ike ekọpbe uji ya inin̄ okwaan̄, unye egwijo obebene, eyi otatap ebi ikikọp uji ya ukpook me emen. Ema ebebeek uriaak inyi awaji kiban̄ mè ido ibe: ‘Keke orọ inu yi okirọ eji?’ Me ota kan̄, Jona otutumu inyi ema ibe: ‘Emi ke ebefieek ikọ. Nkilibi inan̄a me lek ikwaan̄ Awaji obe mè emi nrọ. Iben emi itọp ito me emen okwaan̄, ke uga egwijo yi molọkọ inyi enyi.’ Ebi ikikọp uji ya kpeweek itọtọp ọmọ ito me okwaan̄ ya, ire, ikpọkpọk ikitumu inyi ema ibe etọp ọmọ eto. Mgbọ ema etọpbe ọmọ ito me okwaan̄, egwijo ya owọwọ.

Jona ikikeek ibe ke ọmọ mokwu. Ike ikigen idọk inin̄ emen okwaan̄ ya, ibebeek uriaak inyi Jioba. Jioba oneniria ikpele anam-irin̄ ibe imen Jona, ire, irin̄ ya ikakpan̄ ọmọ. Me emen owot anam-irin̄ ya, Jona obebeek uriaak inyi Jioba ibe: ‘Nchieek owu use ikekisiki ibot inyi owu mgbọ geelek.’ Jioba obebem Jona me emen owot anam-irin̄ ya iso egwe ita mè irọ ibe anam-irin̄ ya igọkọ Jona ito me otu ijọn̄.

Eyi Jioba onyan̄abe Jona, ire isibi ibe ke Jona ikpoyaka isi Ninife ni? In̄-in̄. Jioba ikpọk itumu inyi Jona ibe isi ama ya. Me mgbọ keyi, Jona osisiki ibot mè isi itumu inyi ebi mkpikpak cha ibe: ‘Ninife ibochechep! Akọp usen ini gaalek osik!’ Ogwu ubọọn̄ Ninife otutumu inyi ebi kan̄ ibe: ‘Itaan̄ ukpo igwen Awaji mè igwu ikom itele ijo ugwem kinyi. Ekene oriọọn̄, Awaji mokọt itele uga unaan̄-ejit kan̄, mè ikaan̄ nsan me lek kiji, inyi eji ekakwaan̄ ita.’ Inu ge ekakeekge orọrọ​—ebi Ninife egbagban̄ etip kè Jona mè inwene eru kiban̄. Mgbọ Jioba omun̄be ibe ke ema migwu ikom itele ijo ugwem kiban̄, ikayaka ifiat Ninife.

Jona onanaan̄ ejit ibe ke Awaji ikafiat ama ile ya. Keek-nu: Jioba ikaan̄ ime mè nsan me lek Jona, ire, Jona ikakaan̄ nsan me lek ebi Ninife. Kpan̄asi ikeya, ijeje isibi me ama ile ya mè isi igwuun̄ atanga ge inyi lek kan̄, mè ikweek me ere ya ikinaan̄ ejit. Jioba orọrọ ibe uti olik ge itibi isibi me ere ya, mè ikwek ọmọ ura me ibot. Jona obebele ejit enenen mije uti olik ya. Ire, uti ya onenikwu, Jona onanaan̄ ejit iso lek. Jioba onenitumu inyi ọmọ ibe: ‘Owu omọnọ uti yi ibene igak ebi Ninife. Nkafiat ema mije njeen̄be ema nsan.’ Keke ke eyi okijeen̄ ni? Jioba imọnọ ebi Ninife ibene igak uti.