Ogwu Osat Jioba Ibem Ejikaya

Ebi akọn̄ Asiria mitim igak akọp otoko ebi Ijeren. Mgbọ keyi, Senakerip ogwu ubọọn̄ Asiria ikiweek ititim igak otoko iba kè Juda. Ibebene ikibọkọ uga ama me Juda ge ge. Ire, ama ichubọk iweek ichit ire Jeruselem. Ire, Senakerip ikariọọn̄ ibe ke Jioba okibem Jeruselem.

Ejikaya ogwu ubọọn̄ Juda ikpe Senakerip owuwa ikpoko ibe itele Jeruselem. Ire, Senakerip ikpọkpọk ikiria ebi akọn̄ kan̄ ikakaan̄ unye ibe esi etim egak Jeruselem ikerere ibe ke ibọkọ ikpoko Ejikaya onyibe ọmọ. Ebi ikup me Jeruselem ekekitet ukpook bak me lek ebi akọn̄ Asiria ekebije igbet ama Jeruselem igbaalek. Ejikaya onenitumu inyi ema ibe: ‘Ikatet ukpook. Ebi akọn̄ Asiria mikaan̄ unye, ire, Jioba morọ ibe eji ekaan̄ unye egak ema.’

Senakerip oneniria Rabshakeh orere, ogwu ibot isi akọn̄ kan̄ isi Jeruselem inyi isi irọ ebi ikup me ere ya mkpọ ochak. Ogwu Rabshakeh okekeke me agba lek ama ya ikitaan̄ ukpo itumu ibe: ‘Jioba ikpokọt itap ubọk inyi enyi. Ikachieek ibe Ejikaya ifiaan̄ enyi ifiin̄. Kpunu awaji geege obokọt inyan̄a enyi isibi me ubọk kiji.’

Ejikaya onenido Jioba inu iborọ. Jioba ofọfọọk ọmọ ibe: ‘Katet ukpook me lek mkpọ ogwu ibot isi akọn̄ ebi Asiria okitumu. Senakerip ikpotim igak Jeruselem.’ Senakerip oraria ikpa ijet Ejikaya. Ige me ikpa cha ibe: ‘Isibi ina me lek n̄a mije, Jioba ikpokọt inyan̄a enyi.’ Ejikaya obebeek uriaak ibe: ‘Soso Jioba, nyan̄a eji sibi me ubọk Senakerip, inyi otutuuk ido ebi linyọn̄ eriọọn̄ ibe ke ire owu gaalek ore ata Awaji.’ Jioba otutumu inyi ọmọ ibe: ‘Ogwu ubọọn̄ Asiria ikponin̄ Jeruselem mije, emi mabem ama ya.’

Senakerip ikpọkpọk ichieek inye ibe ke Jeruselem mokana ama ibokikpulu sọnja mgbọ. Ire, me eririeen̄ ge, Jioba oraria ogwu osat kan̄ ge isi ere ebi akọn̄ cha etitiin̄be me agba lek Jeruselem. Ogwu osat ya okpakpan̄ efit mè akọp obop ebi akọn̄ jeeta mè obop go (185,000)! Ogwu ubọọn̄ Senakerip ochechep ebi akọn̄ kan̄ ikakaan̄ unye ichit. Mije etimbe igak ọmọ, Senakerip ikakọt irọ inu geege, igwugwu ikom ifo uwu kan̄. Jioba ibem Ejikaya mè Jeruselem, ike ichieekbe me use. Mebe ke owu okup me Jeruselem mgbọ ya, ire owu ke otoon̄ ejit me lek Jioba ni?