Jọn Ikilook Etip Ofolek Inunu Ogwu Mesaya

Jọn, gwun̄ kè Jekaraya mè Elisabet ikana ogwu nriran mgbọ iminbe. Jioba isa Jọn ikijeen̄ ebi ene mkpọ ofolek ogwu Mesaya sabum inube. Ire, kpan̄asi ibokijeen̄ inu yi me uwu mbuban mè iyaka ire me emen ama, Jọn ikilook etip kan̄ me emen èwê. Ebi ene ekekinan̄a me Jeruselem mè otutuuk agan̄ me Judia inikween̄ mkpọ inan̄a me ubọk kè Jọn. Ijeen̄ ebi ene ibe ekayaka ikirọ ijo inu, kpan̄asi ikeya, ekerọ inu obokibele Awaji ejit. Mgbọ enọbe ikọ Jọn otumube, owuwa kiban̄ egwugwu ikom mè itele ijo kiban̄, Jọn onenitap ema me mun̄ me okwaan̄ Jodan.

Jọn iluk mfufet ugwem. Ikitap ofọnti esabe inwọọn̄ aligọ irom mè ikirie akaka ituuk mè njijoon̄ aran̄ akwọọk. Ebi ene ekpọkpọk ikiweek irọriọọn̄ mbet ene Jọn orebe. Ikerere ebi Farisi mè ebi Sadusi minu inimun̄ ọmọ. Jọn otutumu inyi ema ibe: ‘Ìkirọ ata irọrọ eyi òbokijeen̄ ibe ke enyi mîgwu ikom me atikọ. Ikakeek ibe ke enyi ire ebi isisibi esese mije enyi erebe bọn kè Ebereyam. Eya ikasibi ibe ke enyi ire bọn Awaji.’

Me mgbọ ge, owuwa ebi Ju minu me lek kè Jọn mè ido ọmọ ibe: ‘Keke ke eji eberọ inyi Awaji ibele ejit?’ Jọn ofọfọọk ema ibe: ‘Ogwu òkaan̄ ofọnti iba, iche ge inyi ogwu ikakaan̄ge geege.’ Ire oriọọn̄ mkpọ orọrọ itumube inu ya ni? Iweek ibe ema eriọọn̄ ibe ke ire ema iweek irọrọ ibe ejit Awaji ibele, ke ema kpelọlọ ikekimun̄ ebi ene me chieen̄.

Jọn itumu inyi ebi ìkibọkọ otitip ido ibe: ‘Ikisa atikọ irọ mkpọ mè ikafeen̄ ene geege.’ Itumu inyi ebi akọn̄ ibe: ‘Ikabọkọ ikpoko udun̄ mè iyaka ire, ikan̄ ataak.’

Ebi ngwugwa mè ebi Libai si enunu me lek kè Jọn mè ido ọmọ ibe: ‘Owu ire ekene? Otutuuk ene ekiweweek irọriọọn̄.’ Jọn ofọfọọk ibe: ‘Emi nre ida ene ge ya òkitaan̄ ukpo me emen èwê mè ikisa ebi ene ifo lek oniin̄ Jioba, ike ogwu nriran Asaya otumube.’

Ebi ene mima mkpọ Jọn okijeen̄ ema. Owuwa me lek kiban̄ ekekikeek mè ire ọmọ ore ogwu Mesaya. Ire, itutumu inyi ema ibe: ‘Ogwu òbonu me udun̄ n̄a imin igak emi. Emi me lek n̄a ǹkagbe ogwu òbotọn̄ọ olik ikpukot ene ya. Nkitap ene me mun̄ gaalek, ire, ene ya ibosa ekwukwu mbuban itap ebi ene me mun̄.’