Jeyoyada Ijeen̄ Unye-Ejit

Jeseben ikaan̄ gwun̄ enenwaan̄ ge ekigwen Atalia. Atalia ire ogwu mkpikpak kubọk ogwu uga Jeseben. Atalia ire nwa kè Jeyoram ogwu ubọọn̄ ama Juda. Mgbọ Jeyoram ogwu olom okwube, Ayajaya gwun̄ kan̄ obebene ikikpulu. Ire, mgbọ Ayajaya okwube, Atalia onenirọ lek kan̄ ogwu ubọọn̄ Juda. Ibebene ikikpan̄ ebi owot iman ebi ubọọn̄ isisik, ikerere bọn bọn kan̄, ufuna ekanibọkọ irek kan̄ kubọk ubọọn̄. Ukpook Atalia otetet otutuuk ene.

Ogwu ibot ngwugwa Jeyoyada mè ogwu nwa Jioseba miriọọn̄ ibe ke inu Atalia okirọ isak enenen. Ema etatap ugwem kiban̄ me ufe mè inween̄ lek iben Jowas gwun̄ gwun̄ kè Atalia ge isi ilet me uwu mbuban. Ere ya ke ekpukpo ọmọ isibi.

Mgbọ Jowas orebe acha jaaba, Jeyoyada otititiin̄ otutuuk ebi ugane ama mè ebi Libai mè itumu inyi ema ibe: ‘Ibem isotu uwu mbuban, mè ikachieek ibe ene geege inin̄.’ Jeyoyada orọrọ Jowas ubọọn̄ me Juda mè iben okpibot ubọọn̄ ikwuun̄ ọmọ me ibot. Ebi Juda ebebene ikitaan̄ ukpo ibe: ‘Ogwu ubọọn̄, luk ujọn̄ọ ugwem!’

Mgbọ ogwu ubọọn̄ enenwaan̄ Atalia onọbe ere okidimi, ijeje isi uwu mbuban. Mgbọ imun̄be aya ogwu ubọọn̄, itataan̄ ukpo ibe: “Mîgwak ido! Mîgwak ido!” Ebi ibot akọn̄ etetet ogwu ubọọn̄ enenwaan̄ mkpikpak ya, mè iben ọmọ isibi me uwu mbuban isi ikpan̄ ọmọ. Ire, keke ke eberọ ofolek ijo inu echi Atalia orọbe ibe ebi Juda ekerọ ni?

Jeyoyada otatap ubọk irọ inyi ebi Juda enyan̄a ibot enyi Jioba mè echieek use itọtọbọ ebum inyi Jioba gaalek. Jeyoyada orọrọ ibe ebi ido ya egbugbọ uwu Baali mè ejijaka mkpọmfaka geelek. Itoto ebi ngwugwa mè ebi Libai ibe ekerọ ikwaan̄ me uwu mbuban inyi mekọt iyaka ikitọbọ ebum me ere ya. Ito si ebi mbem ibe ekebem uwu mbuban ya inyi ebi ekatanage me isi Awaji ekanin̄. Jeyoyada mè ebi ibot akọn̄ enenisa Jowas isi uwu ogwu ubọọn̄ mè ito ọmọ me inyọn̄ ikasi ubọọn̄. Otutuuk ebi ido Juda ekekibele ejit. Me ota kan̄, ema minan̄a me irak mkpulu ogwu mkpikpak Atalia, mitele si itọtọbọ ebum inyi Baali mè iyaka ikitọbọ ebum inyi Jioba. Ire omun̄ lek ubọk unye-ejit Jeyoyada osa itap ubọk inyi owuwa ene?