Jioba Iria Jerimaya Ibe Isi Ilook Etip

Jioba igobo Jerimaya ibe ire ogwu nriran inyi ebi Juda. Iria ọmọ ibe isi ilook ema etip mè itaba ema ubọk me utọn̄ ibe etele ijo inu ema ekebirọ. Ire, Jerimaya itumu inyi Jioba ibe: ‘Emi ire sọntitiik gwun̄, nkarọriọọn̄ si ubọk ekitumu ikọ inyi ebi ene.’ Jioba ofọfọọk ọmọ ibe: ‘Katet ukpook me isi kiban̄. Emi matumu inyi owu inu obotumu. Matap ubọk inyi owu.’

Jioba otutumu inyi Jerimaya ibe ititiin̄ ebi ugane ama ya, mè iben ojọngwu arika (ojọngwu ebotbe) ge itọbọ ikpukpuku me isi kiban̄ mè itumu ibe: ‘Jeruselem motọbọ ikpukpuku kubọk ojọngwu yi.’ Mgbọ Jerimaya orọbe inu Jioba otumube, ebi ugane ama ya enanaan̄ ejit enenen. Ogwu ngwugwa ge ekigwen Pasuru osusut Jerimaya mè igon ọmọ ikam me emen mgba-mfiik ge. Jerimaya ikakọt isisik lek kan̄ me otutuuk eririeen̄ ya. Pasuru osasan̄a ọmọ isibi me ofit iwele kan̄. Jerimaya onenitumu ibe: ‘Mkpayaka itumu ikọ me erieen̄ Jioba ofifi.’ Ire, ire itele ikwaan̄ ilolook etip ya ni? In̄-in̄. Mgbọ Jerimaya okeekbe mkpọ ofolek etip ya, itutumu ibe: ‘Etip Jioba ikup kubọk ukan̄ me emen n̄a, mkpabakọt itet ikaan̄.’ Jerimaya okukup inye ikitaba ebi ene ubọk me utọn̄.

Owuwa acha iraraka me lek, ebi Juda enenikaan̄ aya ogwu ubọọn̄. Ebi ngwugwa mè ataak ataak ebi nriran kpema etip Jerimaya okebilook. Ema enenitumu inyi ebi ugane ama ya ibe: ‘Igbe ibe ogwu enerieen̄ yi ikwu.’ Jerimaya onenitumu ibe: ‘Ire enyi ikpan̄ emi, enyi mikpan̄ ogwu ubọk kan̄ otanabe. Nkitumu usem Jioba obe mè ntumu, ikare eyi n̄a.’ Mgbọ ebi ugane cha enọbe usem Jerimaya otumube, ema etutumu ibe: ‘Eji ekakpan̄ ọmọ.’

Mije Jerimaya okupbe inye ikilook etip Jioba, ebi ugane ama ya enanaan̄ ejit enenen. Ema enenitumu inyi ogwu ubọọn̄ ibe ikpan̄ Jerimaya. Ogwu ubọọn̄ onenitumu inyi ema ibe ke ema mekọt irọ Jerimaya inu geelek ema eweekbe irọrọ ọmọ. Ema etatap Jerimaya me emen udọn̄ odọdọk eyi utek okupbe me emen, me nkeek ibe ke mokwu me ere ya. Jerimaya obebene ikigen inin̄ emen ibat ya.

Ene ge me lek ebi ibot ikwaan̄ uwu ogwu ubọọn̄ ekigwen Ebedi-Melek onenitumu inyi ogwu ubọọn̄ ibe: ‘Ebi ugane ama mitọp Jerimaya itap me emen udọn̄! Ire eji itele ọmọ me ere ya, mokwu.’ Ogwu ubọọn̄ onyinyi Ebedi-Melek ida ibe isa akọp ene ita igbaalek lek kan̄ mè isi isan̄a Jerimaya ogwu nriran isibi me emen udọn̄ ya. Ire ikagbe ibe eji ekup kubọk Jerimaya, ogwu ikachieekge ibe inu geege igban ọmọ ilolook etip Jioba ni?