Josaya Ima Ikan Awaji

Josaya ikana ogwu ubọọn̄ Juda me mgbọ irebe acha jeeta. Me mgbọ ya, ebi ene ekifaka mkpọ ekọkọ mè ikigọọk ebi ijo ekwukwu irọ mkpọ. Me mgbọ Josaya orebe akọp mè acha gweregwen, ibebene ikween̄ oniin̄ otatat itọtọbọ ebum inyi Jioba. Mgbọ isobe akọp acha iba, ibebene ikifiat otutuuk mkpọmfaka mè ntook okup me ido ya. Me mgbọ Josaya orebe akọp acha iba mè gweregwen, inyinyi ida ibe ebene enen̄e uwu mbuban kè Jioba esun̄.

Me uwu mbuban, Ilikiya ogwu ibot ngwugwa omumun̄ ikpa ikan kè Jioba​—mokọt ire ibe ke ire ikpa Mosis me lek kan̄ ogebe. Safan ogwu uti ikpa ogwu ubọọn̄ osasa ikpa ya ijet Josaya mè ibene ikifuk ikpa ikan kè Jioba isibi inyi ọmọ. Ike Josaya okigban̄ mkpọ Safan okifuk, irọriọọn̄ ibe ke ebi kan̄ kpesiki ibot inyi Jioba me owuwa acha. Josaya onenitumu inyi Ilikiya ibe: ‘Jioba okinaan̄ ejit inyi eji enenen. Si gọọk ọmọ kpa usem, ke motumu inyi owu inu eji eberọ.’ Jioba onenifọọk itibi ogwu nriran enenwaan̄ Uluda ibe: ‘Ebi Juda miyaak emi. Masut ema osusut, ire, ikpobore me mgbọ keyi Josaya orebe ogwu ubọọn̄, bak me lek isikibe lek kan̄ inyi emi.’

Mgbọ Josaya onọbe etip ya, isisi uwu mbuban mè igwen ebi Juda ibe etitiin̄. Inenifuk ikan kè Jioba isibi inyi otutuuk ebi ido ya. Josaya mè ebi Juda echechieek Jioba use ibe ke ema mekisiki ibot inyi ọmọ inan̄a me otutuuk ejit kiban̄.

Ebi ido Juda kperọ Ijọk Iraraka me owuwa acha. Ire, me mgbọ Josaya ofukbe me emen ikpa ikan ibe ke igbe ibe ekerọ Ijọk Iraraka acha geelek, itutumu inyi ebi ido ya ibe: ‘Eji merọ Ijọk Iraraka isa inyi Jioba.’ Josaya oneneen̄ igwagwa owuwa ngwugwa mè ineen̄ si ebi ibekikọt okwa me uwu mbuban. Ebi ido ya enenirọ Ijọk Iraraka me otuuk usen jaaba, mè irọ si Ijọk Fituru Kpunube Olat me òso usen jeeta. Kperara irọ Ijọk Iraraka okup ikeya karake usen kè Samien. Josaya ichubọk ima ikan Awaji. Ire okekinwọọn̄ ikwekween̄ mkpọ ofolek Jioba ni?