Halamhamay ci Yihofa, misaˈosi kita malo paro no lomaˈ Ningra a patafang to niyah i Cingranan, misamaanay hani? Makalimay Cingra kalawidang kitanan, midaˈocho a maˈorip. (Limoˈot 30:19, 20; Kalatiya 6:7, 8) Kawra, cowa pacieci ci Yihofa to tamdaw midoko Cingranan, pafeliay to tamdaw tano niyah a harateng a misaˈosi. Ano misafelit to rikec no Kawas ko mipaputisemayto a Krisciyang, pakidem ko raraw, wa samaan ko teloc hani? Ano cowa pasasiyor cingra, wa mapadengay ko ngangan ningra nai kasakopang. (1 Korinto 5:13) Kawra, kamayanay ci Yihofa padama to mararaway a tamdaw patatikol i tatihi Ningra. Mansa pafeli ci Yihofa to sapatefoc, o sapisododaw to pasasiyoray a tamdaw. Matomesay ko olah ni Yihofa, mansa padadotocay mitahidang to mararaway tamdaw a pasasiyor. (Cikariya 1:3; Loma 2:4; Yakop 4:8) w24.08 14 fiedac 1-2 fatac

Mitiliday ci Yohani to Saka 3 Yohani i, itiya, o roma tamdaw miyakayakay to mararaway a kimad, palacongisay to tamdaw. Kawra iraayho ko tamdaw midopoay to soˈlinay kimad, midofdofay cangra ci Yihofaan, ‘mitoor to masakenakenaay a sapirikec Ningra a midemak.’ (2 Yohani 4, 6) Oniya madimadiay a Krisciyang palipahakay ci Yohanian aci Yihofaan. (Taneng 27:11) O manan ko mananamay ita hani? Madimadiay pairaay to lipahak. (1 Yohani 5:3) Ano micoˈay kita to sakayhid, micada to soˈlinay kimad, tada mahemekay ci Yihofa. Ano mahemekay ci Yihofa i, mahemekay ko niyah. Mahaenay ko coyoh a mahemek pakayni kitanan. (Luka 15:10) O roma i, o salikaka mitawmecay to madimadiay, ano kitato mahemekay. (2 Tisalonika 1:4) Mapalaˈafo ko hekal ni Satan i, wa pakayni kita to mipiliˈan midoko ci Yihofaan a mahemek! w24.11 12 fiedac 17-18 fatac

ˈAyaw no paihkal to falocoˈ i, hahakowa ko kahalafin a mihapinang cingranan hani? Ano sakaliki sa kiso paihkal to falocoˈ i, o halicalohay ko pidemak a tamdaw wa saan miharateng tisowanan alatek. (Taneng 29:20) O roma i, ano tatayo sa eca paihkal to falocoˈ kiso i, mahapinangayto ningra to maolahay kiso i cingranan, o talotatodayto a tamdaw kiso wa saan miharateng alatek. (Patnakay 11:4) Aka tahirato masaˈosi ko falocoˈ iso to sakaciraramodaw tonini tamdaw ngaˈ itiya saho a paihkal to falocoˈ, kawra soˈlin maherekayto kiso misaday to sapakaetimaw, hanaca o matatodongay a haramod saan kiso miharateng i cingranan. Ano ira ko ciharatengay tisowanan, sasamaan ko pidemak hani? Ano cowa ka ciharateng kiso cingranan, sinanoten ko waywayan iso itini picada cingranan, ho cipinang cingra to falocoˈ iso. Ano cowa ka sakakaolahaw kiso cingranan i, kawra paoraten iso cingra to iraay ko olah iso cingranan, mihaen ko pidemak cowa ko sidaˈitay. (Ifiso 4:25) w24.05 22-23 fiedac 9-10 fatac