Mafanaˈay ci Tafiti ci Yihofaan, mitiˈerayho Cingranan. Tiya lepelen ni Sawlo ato ˈada ci Tafiti i, micangacangay cingra to sapadama ni Yihofa. Matengilay ni Yihofa ko satolon ningra, milidong cingranan, oranto i, pakahemekay cingra ci Yihofaan sanay: ‘O soˈlinay materek maˈoripay ci Yihofa!’ (ˈOlic 18:46 ato ilaenoay safanaˈ.) “O materekay ko Kawas”, sanay ci Tafiti. Sanay ko cecay taˈarawan a cudad, mihaen ko sowal ni Tafiti, o paihkalay to pakasoˈlinay cingra to tahadaˈocay maˈorip a soˈlinay Kawas ci Yihofa, tocerid talaˈayaway a padama to finawlan no Niyah. Mikitini nalifetan no niyah mahapinangay ci Tafiti to o soˈlinay materek maˈoripay ko Kawas, mapakalalokay cingra padadotoc a midoko ato pakahemek ci Yihofaan. (ˈOlic 18:28, 29, 49) Malecad ci Tafitian, pakasoˈlinay kita o soˈlinay materek maˈoripay a Kawas ci Yihofa, wa fanekfekto ko falocoˈ midoko Cingraan. Wa miemem to sapalifet, ira ko ˈicel matayal saki ci Yihofaan, oha mamidotoc miingid ci Yihofaan. w24.06 20-21 fiedac 3-4 fatac

Mikitini to mitilidan ni Pawlo a tikami i kasakopang no Tisalonika, o manan ko mananamay ita? Ano matengil ita ko cowa ka tatodong to Fangcalay Cudad a sowal, anca sapikidataw to tamdaw a lihaf i, sakadademaken ita ko pafafidaˈay a inaneng. I Suwiay a kitakit, iraay ko misafelitay kitanan a tamdaw, naitiniay i congpo a tikami sanay a misakaniw. Oniya tikami pakalalokay to roma a faˈinayan salikaka, patireng to roma misatekeday a lekakawa sanay. Hato soˈlinay naitiniay i congpo nengnengen, kawra cowa ka masakaniw ko madimadiay a salikaka. Mahapinangay nangra oniya tikami cowa ka lecad to isaˈayaway mananamay nangra a kimad. Anini, oya misafelitay kitanan a tamdaw misakadademak to wanglo a milipalaw mikaliorat kitanan. Ka pisinanot aka a “mangiyangi, malahdaw ko pafafidaˈay a inaneng,” songilaˈen a miharateng, ora matengilay maˈosiay ita mahecaday to mananamay ita a soˈlinay kimad han? Mihaen ngaˈ madipot kita. (2 Tisalonika 2:2; 1 Yohani 4:1) w24.07 12 fiedac 14-15 fatac

Halamhamay ci Yihofa, misaˈosi kita malo paro no lomaˈ Ningra a patafang to niyah i Cingranan, misamaanay hani? Makalimay Cingra kalawidang kitanan, midaˈocho a maˈorip. (Limoˈot 30:19, 20; Kalatiya 6:7, 8) Kawra, cowa pacieci ci Yihofa to tamdaw midoko Cingranan, pafeliay to tamdaw tano niyah a harateng a misaˈosi. Ano misafelit to rikec no Kawas ko mipaputisemayto a Krisciyang, pakidem ko raraw, wa samaan ko teloc hani? Ano cowa pasasiyor cingra, wa mapadengay ko ngangan ningra nai kasakopang. (1 Korinto 5:13) Kawra, kamayanay ci Yihofa padama to mararaway a tamdaw patatikol i tatihi Ningra. Mansa pafeli ci Yihofa to sapatefoc, o sapisododaw to pasasiyoray a tamdaw. Matomesay ko olah ni Yihofa, mansa padadotocay mitahidang to mararaway tamdaw a pasasiyor. (Cikariya 1:3; Loma 2:4; Yakop 4:8) w24.08 14 fiedac 1-2 fatac