ለችግሩ ቶሎ እልባት ስጠው!

ሁኔታውን በምሳሌ ለማስረዳት ያህል፣ የተሰበረ አጥንት በአግባቡ ከታከመ በጊዜ ሂደት ሙሉ በሙሉ ይድናል። ቶሎ ካልታከመ ግን ሥቃዩ አይቆምም። ይባስ ብሎም፣ አጥንቱ በትክክል ስለማይገጥም ዘላቂ ጉዳት ሊያስከትል ይችላል።

በተመሳሳይም ከአንድ የእምነት አጋራችን ጋር ያለን ወዳጅነት ከሻከረ ለችግሩ ቶሎ እልባት ልንሰጠው ይገባል። አለዚያ የስሜት ቁስላችን አይሽርም። በመካከላችን ቂም ይፈጠር ይሆናል፤ ይባስ ብሎም ጓደኝነታችን ሙሉ በሙሉ ሊበላሽ ይችላል። ኢየሱስ “ፈጥነህ ታረቅ” የሚል ምክር ሰጥቷል። (ማቴ. 5:25) ስለዚህ ወደ ጓደኛህ ቀርበህ በደግነት ሆኖም በግልጽ አነጋግረው። እንዲህ ማድረግ ከባድ ሊሆን የሚችለው ለምንድን ነው? ሁለት ምክንያቶችን እስቲ እንመልከት።

አንደኛ፣ ጉዳዩን አንስቶ መነጋገር ስለከበደህ ብቻ ችግሩ ባይፈታም እንኳ እንዲሁ አዳፍነህ ለማለፍ ትፈተን ይሆናል።b የኤዎድያንንና የሲንጤኪን ምሳሌ እንመልከት። እነዚህ እህቶች በመካከላቸው የተፈጠረውን አለመግባባት መፍታት ከብዷቸው ነበር። እነሱ ካሉበት አካባቢ ርቃ በምትገኘው በሮም የነበረው ሐዋርያው ጳውሎስ እንኳ ጉዳዩን መስማቱ ችግሩ ረዘም ላለ ጊዜ እንደቆየ ይጠቁማል። ጳውሎስ እነዚህ እህቶች ሰላም ለመፍጠር የቻሉትን ሁሉ እንዲያደርጉ አበረታቷቸዋል። (ፊልጵ. 4:2) ትሑት ከሆኑ፣ ስሜታቸውን በግልጽ ከተነጋገሩ እንዲሁም ከልባቸው ይቅር ከተባባሉ ጓደኝነታቸውን መልሰው ማደስ ይችላሉ።

ሁለተኛ፣ ሌላኛው ወገን ጥፋቱን አምኖ እንዲቀበል ትጠብቅ ይሆናል። ሆኖም ዓላማህ ጓደኝነታችሁን ማዳን ነው እንጂ ‘ጥፋተኛው ማን ነው’ የሚለውን መለየት እንዳልሆነ አስታውስ። የተሰበረ አጥንት የሚያክም ሐኪም፣ አጥንቱ እንዲሰበር ያደረገው ምንድን ነው የሚለውን በማጣራት ብዙ ጊዜ አያጠፋም። ከዚህ ይልቅ አጥንቱን በማከም ላይ ያተኩራል። አንተም ጓደኛህን ስታነጋግረው ‘ጥፋተኛው ማን ነው’ በሚለው ላይ ሳይሆን ‘ወዳጅነታችንን ማደስ የምንችለው እንዴት ነው’ በሚለው ላይ አተኩር።

ከወንድምህ ጋር የነበረህን ወዳጅነት የማደስ ግብ ይዘህ ለምን ዛሬውኑ አታነጋግረውም? ‘ተቆጥተህ እያለ ፀሐይ አይጥለቅብህ።’ (ኤፌ. 4:26) ለችግሩ ቶሎ እልባት ለመስጠት እርምጃ መውሰድህ ‘አንድ ላይ የሚያስተሳስረው የሰላም ማሰሪያ’ እንዳይበጠስ ያደርጋል።—ኤፌ. 4:1-3