ውጫዊውን ሁኔታ ብቻ አይተህ ትፈርዳለህን?

ሽፋኑን በማየት ብቻ ስለ አንድ መጽሐፍ የሆነ ድምዳሜ ላይ ትደርሳለህ? እንዲህ ካደረግህ ልትታለል ትችላለህ። ይህ እንዳይሆን መጀመሪያ ይዘቱን መርምር። በቱርክ በሚነገር አንድ ተረት ላይ የተጠቀሰው የዝነኛው ገጸ ባሕርይ የናዝሬዲን ሆዣ ገጠመኝ ይህን ያሳያል። (ሆዣ የሚለው የቱርክ ቃል “መምህር” ማለት ነው።) ናዝሬዲን “ብልህና ገራገር፣ ጥበበኛና ሞኝ ሰው ነው ... ለእምነቱ ያደረ ቢሆንም ሰብዓዊ ድክመቶች አሉት።” “በሕይወት ውስጥ ለሚያጋጥሙ እንግዳ የሆኑ ነገሮች እጅ የማይሰጥ ሰው” ነው።—በጆን ኑናን የተዘጋጀው ቴልስ ኦቭ ዘ ሆዣ፣ አራምኮ ዎርልድ፣ መስከረም-ጥቅምት 1997

አንድን የኦቶማን ባለሥልጣን ለመጠየቅና ከእርሱ ጋር እራት ለመብላት ስላደረገው ጉዞ የሚነገር አንድ ተረት አለ። “[ናዝሬዲን] ተጀንኖ ከፈረስ ላይ ወረደና ከፊት ለፊት ያለውን ግዙፍ በር አንኳኳ። በሩ ሲከፈት ድግሱ እየተካሄደ መሆኑን ተገነዘበ። ሆኖም ራሱን ከማስተዋወቁ በፊት ጋባዡ በጉዞ የመነቸከውን ልብሱን ተመልክቶ በንቀት ለማኞች አለመጋበዛቸውን ነገረው።”

ናዝሬዲን ኮርቻው ላይ ወደታሠረው ከረጢቱ ተመልሶ በመሄድ “ምርጥ የሆነ የክት ልብሱን ይኸውም ዙሪያውን ፀጉር ያለው ከሐር የተሠራ የሚያምር ካባውንና ሰፊ የሐር ጥምጣሙን አደረገ። በዚህ መልኩ ሽክ ብሎ ወደ ፊተኛው በር ተመለሰና በድጋሚ አንኳኳ።

“በዚህ ጊዜ ጋባዡ ሞቅ ያለ አቀባበል አደረገለት ... አገልጋዮቹ ጣፋጭ ምግቦች አቀረቡለት። ናዝሬዲን ሆዣ በሳህን የቀረበውን ሾርባ አንስቶ በካባው ኪስ ውስጥ አፈሰሰው። ሌሎቹ ታዳሚዎች በመገረም እያዩት የተጠበሱ ሥጋዎችን አንስቶ ጥምጥሙ ውስጥ ከተታቸው። ከዚያም በድንጋጤ በተዋጠው ጋባዡ ፊት ባለ ፀጉር ካባውን ሳህን ላይ ወደቀረበው ሩዝ አስጠግቶ ‘ብላ፣ አንተ ፀጉር ብላ!’ ይል ጀመር።

“ጋባዡ ‘ምን ማድረግህ ነው?’ ሲል ጠየቀው።

“‘ጌታዬ፣ ልብሶቼን እየመገብኳቸው ነው’ ሲል ሆዣ መለሰ። ‘ከግማሽ ሰዓት በፊት ባደረጉልኝ አቀባበል መሠረት እርሶ እንግድነት የተቀበሉት እኔን ሳይሆን ልብሶቼን እንደሆነ በግልጽ ማየት ችያለሁ!’”

እኛም ብዙ ጊዜ ውጫዊ ሁኔታን ብቻ በመመልከት አሉታዊ ወይም አዎንታዊ ፍርድ ሰጥተን ሊሆን እንደሚችል የታወቀ ነው! ነቢዩ ሳሙኤል፣ ይሖዋ ቀጥሎ የሚመርጠው የእስራኤል ንጉሥ የዳዊት ወንድም ኤልያብ መሆን አለበት ብሎ ባሰበ ጊዜ ይሖዋ እንዲህ ብሎታል:- “ፊቱን የቁመቱንም ዘለግታ አትይ፤ ሰው እንዲያይ እግዚአብሔር አያይምና ናቅሁት፤ ሰው ፊትን ያያል፣ እግዚአብሔር ግን ልብን ያያል።” (1 ሳሙኤል 16:7) አዎን፣ ይሖዋ የሚፈርደው ውጫዊ ገጽታን በመመልከት ሳይሆን የልብ ሁኔታን በማየት ነው። አንተስ የምትፈርደው እንዴት ነው?

[በገጽ 11 ላይ የሚገኝ ሥዕል]

ሳሙኤል ውጫዊ ሁኔታን በመመልከት እንዳይታለል ይሖዋ አስጠንቅቆታል