Dwi mir 4

Kara wanwang’ bero i kum ring’kum Yesu ku rimbe, ukwayu wabed ku yiyoyic i jamgony. (Efe. 1:7) Ju ma Yesu ulwong’o nia “rombe mange” gicamu ngo man gicikiri ngo nicamu mukathi kadi nimadhu divai i saa mi Cemo mir uthieno pa Rwoth. (Yoh. 10:16) Re kadok kumeno de, ginwang’u bero i kum ring’kum Yesu Kristu ku rimbe nikadhu kud i yiyoyic ma gitie ko i tego mi war mi lam m’ethiero. (Yoh. 6:53) Ju ma gitie ku twero mi camu mukathi man mi madhu divai lundo ginyutho nia gin’i lembariba ma nyen man nia gitie ku genogen mi bedo jucampacu mi Ker mi polo. Pieno, kadok watie i kind ju ma juwiro kunoke i kind rombe mange de, ukwayu wabed ku yiyoyic pi ninwang’u kwo ma rondo ku rondo. w24.12 mba. 13 udu. 14, 16

I saa mi Cemo mir uthieno pa Rwoth, Yesu umiyo mukathi ma thobi mbe i iye ni jukwenda pare man ewacu igi nia eno ubenyutho kume. I ng’eye emiyo igi divai man eyero nia eno ubenyutho ‘rimbe mi lembariba.’ (Mark. 14:22-25; Luka 22:20; 1 Kor. 11:24) Yehova utimo lembariba ma nyen ku “ot mir Israel [mi tipo]” ma bibimo ‘i Ker pare.’ (Ebr. 8:6, 10; 9:15) Lembe ma Yesu uyero i saa mi Cemo mir uthieno pa Rwoth umulo kum “udul ma nok.” Ungu ma nok maeno ucaku ku jukwenda ma gigwoko bedoleng’ migi ma gibino karacelo kude. Gin re ma gibibedo karacelo ku Yesu i polo. w24.12 mba. 11 udu. 9-10

Jucibo Yesu, jutwiye, juyanye, jucido nyinge man jufwode. Juaskari gitere kaka ma jubinege i iye man giwok gigure iwi yen. Yesu ciro peko ma lith maeno ku gwoko bedoleng’. Ento Yehova uwinjo litho lee nisagu kinde m’ebeneno peko ma Wode n’i iye. Re ecerere nitiyo ku tego pare m’ajikine mbe pi nibodhe. Pirang’o? I adundo utie pi mer. Lam pa Yesu ubenyutho nia Yehova umeri lee mandha. Yehova ucidho bor cil m’eciro ko can ma lith nisagu zoo pi nileri kud i dubo man tho. (1 Yoh. 4:9, 10) Andhandha, ebemito ekony ng’atuman m’i kindwa unyeg i kum dubo man uloy anyegone. w24.08 mba. 6 udu. 13-14

Wacopo nyang’ cuu nia Yehova umaruwa lee tek wabeparu pi gin ma jamgony ubanju i bang’e. Sitani beriko nia jatic pa Mungu moko acel de mbe ma bigwoko bedoleng’ pare ni Mungu i saa mir amulaic ma tek. Pi nituco nia Sitani tie javupo, Yehova uweko Yesu usendere i wang’ tho pare. (Yob 2:1-5) Yehova ubino neno kinde ma judong dini ma jujai gibecayu Yesu, kinde ma juaskari gibefwode man kinde ma jubegure iwi yen. I ng’eye eneno kite ma Wode m’emaru lee ubetho ko tho mi litho. (Mat. 27:28-31, 39) Yehova ubino ku copo mi cero lembe maeno ceke i saa m’emaru. (Mat. 27:42, 43) Ento ka nwang’u emondo i lembene, nwang’u jamgony ubeciculere ngo man nwang’u wacidong’ m’umbe genogen. Pieno eweko Wode ucir masendi cil i tho. w25.01 mba. 22 udu. 7

Wan’i nindo 16 mi dwi mi Nisan, oro 33 N.N.Y. Julub pa Yesu gin’i can man lworo ma dit. Juario m’i kindgi giweko Yeruzalem gibecidho i Emao. Jalwo moko unwang’ugi man ecaku wotho karacelo kugi. Gikoro ire lembe mi can m’uwok iwi Yesu. Jalwone caku weco kugi iwi lembe ma wigi biwil ko ngo zoo de. “Ecaku ku Musa man Jubila ceke” pi nikoro igi thelembe m’unyutho nia ukwayu Masiya usendere man utho. Kinde ma gitundo i Emao, jalwone unyuthere nia etie ng’a i andha, niwacu Yesu m’ucer! (Luka 24:13-35) Yesu unyuthere wang’ dupa ni julub pare i kind nindo 40 ma tokcen m’etimo iwi ng’om. I kind nindo maeno, julub pare ma nwang’u gibino ku can man lworo ma lee gidoko udul jurwey man juponji mi lembanyong’a mi Ker ma weg anyong’a man ma weg tegocwiny. w24.10 mba. 12 udu. 1-3

Nyathin wotho dongo ku bang’ nindo m’ubekadhu; ento kara ng’atini udong i thenge mi tipo, ukwayu etim kero moko kokoro. Ku lapor, umego ku nyimego mi Korintho gigam giyiyo lembanyong’a, gilimo batizo, ginwang’u tipo ma leng’ man ginwang’u ponji i bang’ jakwenda Paulo ku kume. (Tic. 18:8-11) Ento oro moko i ng’ey batizo migi, nwang’u fodi asu ju dupa m’i kindgi giteng’ini ngo. (1 Kor. 3:2) Pi niteng’ini i tipo, wacikara nilar pidho avane. Ju ma ‘gimaru ngo ning’eyo lembe akeca,’ niwacu ju ma gimaru nibedo awiya i thenge mi tipo, timo mediri voyogi. (Rie. 1:22) Wabemito ngo wabed calu dhanu ma gidongo i thenge mi kum, ento gibemediri nikuro nia junyodo migi re m’umak yub kakagi. Tung’ kugi, wabemito wamak lembe i cingwa pi nitimo mediri i thenge mi tipo. Tek fodi asu ibeii pi niteng’ini i tipo, kway Yehova umii iri “ava man kero mi timo” kumeno.—Filip. 2:13. w24.04 mba. 4 udu. 9-10

Yehova unyutho iwa kite ma pokolembe m’ekelo iwi dhanu ketho ewinjere ko. (Eze. 33:11) Kum Yehova miel ungo pi ninyotho dhanu wang’ acel pi nja. Etie won kisa ma lee, man enyutho kisa saa ceke m’ecopere. Jukani ma wang’eyo cuu nia bicer ungo? Biblia umiyo lapor ma nok kende mi dhanu maeno. Yesu unyutho nia Yuda Iskariot bicer ungo. (Mark. 14:21; nen bende Yohana 17:12.) Yuda ujai akakaka i kum Yehova Mungu man i kum Wode. (Mark. 3:29.) Yesu uyero bende nia judong dini moko ma gijai i kume gibitho m’umbe genogen mi cer. (Mat. 23:33; nen Yohana 19:11) Man jakwenda Paulo umiyo cimowang’ ma nia jujai ma gikwero niloko cwinygi gibicer ungo.—Ebr. 6:4-8; 10:29. w24.05 mba. 4 udu. 10-11

Tek watie ku winjiri ma ceng’ini ku Yehova, Sitani copo nyayu tak de ngo peko ma rondo ku rondo i kumwa. (1 Yoh. 3:8) I ng’om ma nyen, Yehova bimedere nigwoko jurimbe ma weg bedopwe i kum peko mi tipo kende ngo, ento bende i kum tho. (Nyu. 21:4) Andhandha, etie rwom ma lee nibedo welo i hema pa Yehova, niwacu nibedo kude ku winjiri ma ceng’ini man ma romo bedo rondo ku rondo. (Eze. 37:27) Ukwayu wabed ku timo ma nenedi tek wabemito wamedara nibedo welo pare? Tek ng’atu moko ulwong’i ibed welo pare, iromo maru ing’ey lembe m’ekwayu i beng’i. Kumeno bende, wan de wabemito wang’ey gin ma Yehova kwayu i bang’ dhanu ceke ma gibemito gimediri nibedo welo. Mer ma wamare ko konyowa nitimo gin ceke ma wacopo “pi ninyayu anyong’a i iye i lembe ceke.” (Kol. 1:10) Wacikara nilwore saa ceke man niwil ungo nia etie ng’a. Woro ma thuc maeno bikonyowa niuro timo moko ci ma romo nyayu can i iye. M’umbe jiji, wabemito saa ceke ‘wawoth ku Mungu mwa ku molcwiny.’—Mik. 6:8. w24.06 mba. 4 udu. 8-9

Yehova ugam ukwayu Abraham uthier wode ma Isak ni lam. M’umbe jiji, Abraham unwang’u nia eno tie lembe mi litho ma lee. Re kadok kumeno de, eworo telowicne. Ento Mungu cere saa ma nwang’u dong’ ebecinego wodene. Re asu lapor maeno ubemiyo ponji ma e ma pire tek lee ni dhanu ceke ma weg yiyoyic: Yehova bibedo ayika nithiero Wode ma buu m’emaru ni lam. Andhandha, Yehova umaru dhanu lee dit! (Tha. 22:1-18) Oro dak swa i ng’eye, Cik ma Yehova umiyo ni thek mir Israel ubed ukwayu lam dupa mi leya pi nitimo adunya pi dubo mi dhanu pa Mungu. (Law. 4:27-29; 17:11) Lam maeno ubino tipopiny mi lam moko ma dwong’ nisagu, ma en e lam ma bilaru dhanu kud i dubo wang’ acel pi nja. Mungu utelo wi jubila pare ku tipo pare ma leng’ pi nikoro nia kodhi ma jular juewo pire m’udok ung’eyere ni Wod Mungu ma segi bisendere man jubinege pi nilaru dhanu ceke, kadok in bende, kud i dubo man tho!—Isa. 53:1-12. w24.08 mba. 4 udu. 7-8

Kinde m’ibesomo Biblia, bed isay ninwang’u ayi m’iromo tiyo ko ku gin m’isomone. Kinde m’idaru somo giragora moko, penjiri kumae: ‘Acopo tiyo ku lembe maeni nenedi kawoni kunoke i nindo m’ubino?’ Wakemeku nia isomo 1 Juthesaloniki 5:17, 18. Kinde m’isomo giragora ario eno, icopo kepenjiri ka nyo andha ibed irwo nja man kud adundeni ceke. Icopo paru bende pi gin m’itie ku foyofoc pire. Iromo sayu lembe adek m’icopo dwoko foyofoc pire athothi ni Yehova. Kan ikoyo kadok saa ma nok pi niparu i lembe cuu, iromo doko ng’atu ma winjo Lembe pa Mungu man ma tiyo kude. Kepar pi bero m’iromo nwang’u kan ibetiyo ku bodho maeno kubang’ ceng’ kadok iwi giragora mange! Ibimediri ameda nibedo ng’atu m’ubetiyo ku Lembe pa Mungu. w24.09 mba. 4-5 udu. 9-10

Yehova ucwiyowa ku copo ma segi. Anyong’a negowa tek jumiyo iwa piny; ento tek walund wamiyo pinyne wan ni jumange, anyong’a mwa doko dit nisagu. Wawinjara ma ber ka wabekonyo umego ku nyimego, man anyong’a negowa ka gibeneno bero ma watimo igi man gibedwoko foyofoc iwa pire. Re kadok gidwok iwa foyofoc kunoke ngo de, asu wacopo bedo kud anyong’a pilembe watimo gin m’ubekwayere. Wiwa kud uwil nia piny ceke ma wabemiyo, “Yehova [lundo] tie ku copo mi miyo [iwa] lee nisagu.” (2 Kei. 25:9) Wacopo miyo ngo piny lee ni jumange nisage! Bende, sukulia mange mbe ma miyo iwa anyong’a ma sagu pare. Dong’ wek wabed ku lembakeca mi lubo lapor pa Wegwa mi polo, Mungu ma won berocwiny. w24.09 mba. 31 udu. 20-21

Yehova tie jakisa man jabero. (Zab. 103:13; Isa. 49:15) Ekethere kakawa, niwacu tek jutimowa rac, en de ewinjo lithone; (Zek. 2:8) ekonyowa nidoko jurimbe; (Zab. 25:14; Tic. 17:27) man etie won jwigiri, pieno “ekulo kore piny pi nineno polo man ng’om [man] eting’o ng’atu ma ka kite mbe kud i utur.” (Zab. 113:6, 7) Lembe maeno ceke cwaluwa nimiyo dwong’ ni Mungu mwa ma dit. Wamiyo dwong’ ni Yehova pilembe wabemito jumange de ging’eye. Ju dupa ging’eyo ngo lemandha iwi Yehova. Pirang’o? Pilembe Sitani uumo wang’ pidoic migi ku vupo ma reco m’ebemewo i wiye. (2 Kor. 4:4) Sitani uketho dhanu giyii nia Yehova utie Mungu ma kwiny, ma dieng’ ungo ku dhanu man nia en re m’ebenyayu peko ma dupa mi ng’om. Ento wang’eyo lemandha iwi Mungu mwa! Pieno watie ku rwom mi tiro wi dhanu ging’ey lemandha i wiye man mi konyo gin de gimii ire dwong’.—Isa. 43:10. w25.01 mba. 3 udu. 6-7

I rundi ma kwong’a, dhanu ma gin’i ng’ete pa Sitani gicwayu vupo wi wadi wi wadi iwi Wod Mungu ma pwe man m’utimo udu dupa. Ku lapor, judong dini giyero ni dhanu nia tego pa Yesu mi wodho pajogi uai i bang’ “jadit mi pajogi.” (Mark. 3:22) Kinde ma jubeng’olo lembe pa Yesu, gidote nia eyero lembacidi man gicung’o lembe i udul dhanu nia gikway junege. (Mat. 27:20) I ng’eye kinde ma julub pare giberweyo lembanyong’a, judegi migi “gicung’o lembe i dhanu mi thek mange man giroyo adegi i igi” kara ginyay ragedo i kum Jukristu. (Tic. 14:2, 19) Otkur ma Wiw mi nindo 1, dwi mir 12, 1998 ukoro kumae: “Calu ma rwonglembe mi Ker ubino foyo ngo i Juyahudi ma jujai, gicaku gamba ma rac man gipimo nicung’o lembe i dhanu mi thek mange kara gijai i kum Jukristu.” Tin, Sitani ubemedere asu ‘niwondo ng’om zoo.’ w24.04 mba. 11 udu. 15-16

Ninwang’u kwo ma rondo ku rondo ujengere ngo iwi saa ma ng’atini utho i iye. Poy nia Yehova utie Japoklembe ma pwe; saa ceke pokolembe pare bedo pwe man atira. (Zab. 33:4, 5) Pieno cwinywa ubed tek nia “Japoklembe mi ng’om zoo” bitimo gin m’atira. Etie bende lembe ma kakare nipoy nia nwang’u kwo ma rondo ku rondo ujengere ngo iwi kaka ma ng’atini ubekwo i iye. Ecopere ngo nia Yehova upok lembe wang’ acel iwi milioni dupa mi dhanu ma gibekwo i ng’om ma rwonglembe mi Ker urweyere ngo i igi nia gitie “diegi.” (Mat. 25:46) Japoklembe ma pwe mi ng’om zoo ubedieng’ lee mandha pi dhanu maeno nisagu ma wabedieng’ ko pigi. Wang’eyo ngo kite ma Yehova bitelo ko wi lembe i saa mi masendi ma dit. Saa moko nyo dhanu maeno gibinwang’u kaka mi ponjo lembe i wiye, mi bedo ku yiyoyic i iye, man mi dwogo i ng’ete pare kinde m’ebedwoko nyinge leng’ i wang’ dhanu mi thek ceke.—Eze. 38:16. w24.05 mba. 12 udu. 14-15

Dhanu pa Yehova gimaru nikonyiri i kindgi. (2 Kor. 8:4) Ento saa moko lembuno kwayu tegocwiny ma lee. Ku lapor, i saa pa lwiny judong cokiri mi the dero gisayu ninyang’ ka nyo umego ku nyimego migi gitie ku yeny mi tielocwiny, mi kony, mi Biblia ku girasoma m’ujengere iwi Biblia, ku yeny mi cam, kendi kunoke kabedo. Mer ma gimaru ko rombe cwalugi niketho kwo migi i ariti pi nimiyo igi kony ma gitie ku yenyne. I saa ma kumeno, pire bedo tek lee mandha nigwoko bedo i acel. Pieno, wor telowic m’uai kud i Bethel mwu. (Ebr. 13:17) Ukwayu judong cokiri gibed gipoy wigi thiri thiri i kum yub m’umakere iwi ayi mi yikiri pi peko ma wok rek man bende i kum telowic ma dilo mwa uwodho iwi gin m’ukwayu jutim kinde ma peko ma wok rek udhingo tundo. (1 Kor. 14:33, 40) Cwinyi bed tek, re bed ku weng’i. (Rie. 22:3) Lar inyang’ cuu i lembe m’imito timo. Kud iroyiri i ariti mananu. Jengiri iwi Yehova. Kud iwil nia Yehova dieng’ lee mandha pi bedomoth peri man mir umego ku nyimego peri. Ecopo konyi kara imii kony ni umego ku nyimego peri m’umbe ariti. w24.07 mba. 4 udu. 8; mba. 5 udu. 11

Ubimo Daudi ugam ung’eyo Yehova cuu man ebed ejengere i wiye. Kinde m’ubimo Saul ku judegi pa Daudi mange gibino yenyo yore mi nege, erwo i bang’ Yehova pi nikwayu kony. I ng’ey ma Mungu udwoko wang’ rwo pare man ubodhe, eyero kumae: “Yehova [tie] kwo!” (Zab. 18:46) Wec maeno ubenyutho ngo kende kende nia Daudi uyiyo nia Mungu unuti. Buku moko ma koro i wec mi Biblia uyero nia Daudi ubino nyutho tegocwiny m’etie ko iwi Yehova nia etie “mungu mandha ma saa ceke konyo dhanu pare.” Andhandha, lembe ma Daudi ukadhu kud i iye i kwo pare utego cwinye nia Mungu tie kwo. Tegocwiny maeno umiyo ire kero m’emedere ko nitimo ni Yehova man nipake. (Zab. 18:28, 29, 49) Tek wayiyo andhandha nia Yehova utie Mungu ma kwo, eno copo konyowa nitimo ire kud amora. Wabinwang’u tego mi ciro peko man amora mi medara nitimo tic pare ku tego. Wabibedo bende ku lembakeca mi medara nicoro ceng’ini i vute. w24.06 mba. 20-21 udu. 3-4

Wec ma jakwenda Paulo ukiewo ni Juthesaloniki ubemiyo iwa ponji ma kani? Kinde ma wawinjo lembe moko m’urombo ngo ku lembe ma waponjo i Biblia kunoke kinde ma wawinjo awiw iwi lembe moko, ukwayu watii ku ng’iyo i lembe. Ku lapor, i Union soviétique ma con, judegi mwa gimiyo ni umego barua moko ma jubino paru nia uai kud i kabedo mwa ma dit. I baruane jubino cwalu umego mwa moko nia gicak the dilo mange ma n’i wiye gire. Baruane ubino nen ni lemandha. Ento umego ma weg yiyoyic giweko ngo juwond wang’gi. Ginyang’ nia lembe ma jukwayu i baruane urombo ngo ku gin ma giponjo. Tin, saa moko judegi mi lemandha gitiyo kud internet pi nisayu yore mi royo jiji i iwa man mi poko kindwa. Kakare ‘niweko juwing wiwa,’ ukwayu wagwokara. Nenedi? Nwang’u wabeng’iyo cuu i lembe ma wawinjo man ma wasomo ka nyo erombo ku lemandha ma wadaru ponjo.—2 Thes. 2:2; 1 Yoh. 4:1. w24.07 mba. 12 udu. 14-15

Yub ma pire tek nisagu zoo ma ng’atini copo maku utie yub mi thiero kwo pare ni Yehova man mi mondo i kind juruot mi ju ma gibetimo ire. Yehova ubemito dhanu ceke gimak yub maeno. Pirang’o? Ebemito gibed ku winjiri ma ceng’ini kude man gikwo rondo ku rondo. (Poy. 30:19, 20; Gal. 6:7, 8) Ento Yehova diyo ngo ng’atu moko nia etim ire. Eweko ng’atuman umak yub mi gin m’ebitimo. Dong’ ka Jakristu moko m’ulimo uturo cik pa Mungu, m’etimo ko dubo ma pek ke? Tek eloko ngo cwinye, jucikiri niwodhe cen kud i cokiri. (1 Kor. 5:13) Re kadok kumeno de, Yehova mito lee dit nia jadubone udwog i bang’e. I andha, eno re m’utie thelembe ma pire tek lee m’uketho emiyo jamgony; niwacu pi niweko dubo mi ju m’uloko cwinygi. Mungu mwa ma jamer ubekwayu ju m’utimo dubo ma pek nia gilok cwinygi.—Zek. 1:3; Rum. 2:4; Yak. 4:8. w24.08 mba. 14 udu. 1-2

Saa ma jakwenda Yohana ubekiewo barua pare mir adek, nwang’u jumoko ubino mewo ponji mi ndra man ubino nyayu pokiri. Ento jumange gibino mediri “niwotho i lemandha.” Gibed giworo Yehova man gimediri “niwotho nimakere ku cik pare.” (2 Yoh. 4, 6) Jukristu maeno ma gigwoko bedoleng’ migi ginyayu anyong’a i Yohana kende ngo, ento i Yehova bende. (Rie. 27:11) Lembuno ubemiyo iwa ponji ma kani? Gwoko bedoleng’ nyayu anyong’a. (1 Yoh. 5:3) Ku lapor, anyong’a negowa pilembe wang’eyo nia wabenyayu anyong’a i Yehova. Anyong’a nege kan ebeneno nia wakwero abidhe mi ng’om man wayiyo lemandha. Jumange bende anyong’a negogi i polo. (Luka 15:10) Wan de anyong’a copo negowa tek wabeneno umego ku nyimego mwa gibegwoko bedoleng’ migi. (2 Thes. 1:4) I ng’eye saa ma ng’om maeni bikadhu, mutoro binegowa ning’eyo nia wagwoko bedoleng’ mwa ni Yehova, kadok i ng’om ma Sitani re m’ubimo wiye de. w24.11 mba. 12 udu. 17-18

Ukwayu ilub ng’atini pi kare ma rukani i wang’ ninyutho ire pidoic peri mi meri? Tek kumi ular umiel niyero paru peri ni ng’atini, eromo paru nia ava kum re m’ubecweli. (Rie. 29:20) Ku ng’ete kurucel lundo, tek ibegalu akeca, ng’atune romo paru nia maku yub ubevoyi, asagane kan edaru nyang’ nia ebetelo nen peri. (Ekl. 11:4) Poy nia i wang’ ninyutho paru peri ni ng’atini, pire tie tek ungo nilar bedo ku tegocwiny nia wubigemuru kude. Ento ukwayu cwinyi ubed tek nia in dong’ itie ayika pi gamiri man nia ecopo bedo jadhogi ma cuu mi gamiri. Dong’ tek inyang’ nia ng’atu moko ubefoyo kudi ke? Tek en lundo ebetelo ngo nen peri, wek lembene unen kamaleng’ nikadhu kud i timo peri. Ecibedo rac magwei niketho ng’atini ubed ku genogen p’undiek.—Efe. 4:25. w24.05 mba. 22-23 udu. 9-10

Jakristu ma juwiro m’ugwoko bedoleng’ pare kende re ma “jubiting’o,” niwacu ma Yesu bijolo i Ker mi polo. Tek Jakristu ma juwiro ku tipo ubemedere ngo nibedo ku wang’e i thenge mi tipo, kakare bibedo mbe i kind ju “ma jung’iyo.” (Mat. 24:31) Re wec ma Yesu uyero utie cimowang’ ni Jukristu ceke, kadok m’utie ku genogen mi cikwo i polo kunoke ngo de; kum ng’atuman ucikere nigwoko bedoleng’ pare man nikiyo. Wang’eyo Yehova cuu man wayiyo bende nia lembe ceke m’etimo utie atira. Pieno, cwinywa kud udieng’ tek ewiro ng’atu moko ku tipo pare i rundi mwa tin. Poy i kum lapor ma Yesu umiyo iwi podho mir ulok, m’uweco pi jurutic m’utundo i kum saa 11 mi reto. (Mat. 20:1-16) Ju ma tokcen ma julwong’o ubin utim tic, i mwony pa ceng’ ceke ginwang’u cul ma rom ku ju m’ular ucaku tic kugweno. Kumeno bende, kadok nwang’u Yehova uwiro Jukristu moko i saa ma kani de, gibinwang’u sukulia migi i polo kende kende nwang’u gigwoko bedoleng’ migi. w24.09 mba. 24 udu. 15-17

Yesu uweko lapor ma ber mandha iwi kite mi ciro masendi. Wakewecu iwi masendi m’ekadhu kud i iye i kind jupagi man bende i bang’ ju ma woko. Wedi pare ma gi juyic ungo giwacu nia wiye nyothere, judong dini ke giwacu nia ebetimo ku pajogi, man juaskari mi Roma lundo gicaye, gifwode man tokcenne ginege. (Mark. 3:21; 14:50, 55; 15:16-20, 35-37) Re Yesu uciro masendi maeno ceke man mange de m’umbe niculo kwor. Lapor pare copo miyo iwa ponji ma kani? (1 Pet. 2:21-23) Yesu uweko iwa lapor ma ber mandha ma wacopo lubo ka wabenwang’ara ku masendi. Eng’eyo saa m’ukwayu ebed i iye ling’ man saa m’ukwayu ewec i iye. (Mat. 26:62-64) Edwoko ngo wang’ lembe ma rac ceke ma jubeyero pire. (Mat. 11:19) Saa m’ebeweco, ecayu ngo ju m’ubenyayu ragedo i kume kadi ecimogi de ngo. w24.11 mba. 4-5 udu. 9-10

Kepar nia imiyo ni ng’atu moko giramiya moko ma leng’ man m’etie ku yenyne. Cwinyi romo tur lee ka ng’atune ulund ukane i the kavuto ma dong’ ebeparu de ngo pire! I ng’ete m’ucelo lundo, anyong’a romo negi lee kan ebetiyo kude ma ber man efoyi pire. Lapor maeni urombo nenedi ku giramiya mi jamgony? Yehova umiyo Wode piwa. Kepar kite m’anyong’a ucikere ninege ko ka wabenyutho foyofoc pi giramiya maeno ma pire tek lee man pi mer m’enyutho iwa, niwacu mer m’ucwale nimiyo iwa jamgony! (Yoh. 3:16; Rum. 5:7, 8) Ento ku nindo m’ubekadhu, waromo caku neno ngo valer pa giramiya mi jamgony. Ecopo bedo ve wakanu giramiya ma Mungu umiyo iwa i the kavuto. Andha watie kud anyong’a nia emiye iwa, re wakethe kaka ma wiwa romo wil kude. Kara lembuno kud utimere, wacikara nibeparu thiri thiri pi gin ma Mungu giku Kristu gitimo iwa. w25.01 mba. 26 udu. 1-2

Umego m’upong’o lembe m’ukwayere pi nidoko jadit cokiri kud ebed jayic ma nyen. Kadok nwang’u ukwayu ngo nia ibed ng’atu m’ulimo batizo oro dupa de, re ubekwayu nindo ukeukadhi pi nidoko Jakristu m’uteng’ini. I wang’ ma jukethi ni jadit cokiri, icikiri ninyutho calu Yesu nia itie dhanu ma mol man m’utie ayika nikuro Yehova umii ire tic moko ci. (Mat. 20:23; Filip. 2:5-8) Inyutho nia itie ng’atu m’ubegwoko bedoleng’ pare ni Mungu nwang’u ibemoko kii i kum Yehova, i kum cik pare ma pwe man nwang’u ibelubo telowic m’ebemiyo nikadhu kud i dilo pare. Lembagora unyutho kamaleng’ nia jadit cokiri ucikere nibedo jabodho mi ponji. Nyo eno unyutho nia icikiri nibedo jakorolembe ma jabodho magwei? Ungo. Judong cokiri ma dupa ma giromo, ma re gitie ngo juponji ma jubodho magwei, giponjo cuu i lembanyong’a man i tic mi kwac. w24.11 mba. 23-24 udu. 14-15

Tek inwang’u giragora moko i Biblia m’inyang’ ungo cuu i iye, tim sayusac i wiye. E dieceng’ duu, nyam i lembe iwi gin m’iponjone man iwi ponji m’inwang’u iwi Yehova, iwi Wode man iwi mer ma gimeri ko. (Zab. 119:97) Tek saa ceke ma kan ibedo piny pi nisomo lembe man nitimo sayusac inwang’u ngo ponji ma nyen kunoke m’unyeng’i, cwinyi kud utur. Keporiri ku ng’atu ma tong’o or (kunoke gold). Wang’ ma pol, ng’atu m’ubesayu or nyutho cirocir man etimo tic pi saa kunoke nindo ma dupa i wang’ ninwang’u kadok ng’iline. Ento emedere asu pilembe eng’eyo nia ng’ili or de utie ku valer ma lee. Ka dong’ lonyoman m’i Biblia ke romo bedo ku valer ma rukani? (Rie. 8:10) Pieno, nyuth cirocir man wor program peri mi somo Biblia.—Zab. 1:2. w25.01 mba. 25 udu. 14-15

Yehova ubekwayu nia wabed ayika niweko ni ju ma gikierowa. (Zab. 86:5; Luka 17:4; Efe. 4:32) Lembe ma ng’atini uyero kunoke utimo romo kierowa lee mandha, asagane tek etie jarimbwa kunoke wat mwa ma ceng’ini. (Zab. 55:12-14) Saa moko litho ma wabewinjo i cwinywa bedo ve jucobowa ku pala. (Rie. 12:18) Waromo pimo niwil ku lithone. Ento nitimo kumeno romo bedo ve jucobowa ku pala, re walund waweko palane de i wang’ rem. Kumeno bende, kud wapar nia wabiwinjara ma ber tek wabekwo ve lemoko mbe. Kinde ma ng’atu moko utimowa rac, ku kwong’a ng’eicwiny romo makuwa. Biblia de uyero nia lembuno romo tundo. Ento ebecimo wang’wa nia kud wawek ng’eicwinyne ubim wiwa. (Zab. 4:4; Efe. 4:26) Pirang’o? Pilembe ng’eicwiny cwalwa ngo nitimo gin ma ber. (Yak. 1:20) Poy nia waromo cero ngo ng’eicwiny ku makuwa, ento waromo ng’iyo nia wabim wiye kunoke ngo. w25.02 mba. 15 udu. 4-6

Yesu umiyo lapor moko m’ubenyutho nia etie lemkasegu nikanu sente m’umbe nibedo jalonyo “i wang’ Mungu.” (Luka 12:16-21) Wan ceke wang’eyo ngo nia urwo bikelo ang’o. (Rie. 23:4, 5; Yak. 4:13-15) Bende, Yesu uyero nia wa julub pare wacikara nibedo ayika ‘niweko’ piny mwa ceke. (Luka 14:33) Jukristu mi rundi ma kwong’a mi Yudea giyiyo niweko piny migi ku mutoro. (Ebr. 10:34) I rundi ma tin, umego mwa ma dupa gibayu piny migi mi thenge mi kum pilembe gikwero nicwaku thenge moko ci mi lemgamba. (Nyu. 13:16, 17) Ang’o m’ukonyogi nitimo kumeno? Gitie ku tegocwiny ma nging’ nging’ iwi lembang’ola pa Yehova m’uyero kumae: “Abiweki ki ngo, man kadok akuna de abikuni ki ngo.” (Ebr. 13:5) Pieno, watimo gin ceke ma wacopo pi niyiko anyim mwa, man ka lembe moko uwok rek i wiwa, wabedo ku genogen ma tek nia Yehova bigwokowa. w25.03 mba. 29 udu. 13-14

Yehova ubekwayu ngo nia wadong i thenge mi tipo ku tego mwa giwa. Ju ma gitie jukwac man juponji i cokiri, julilogi pi nikonyowa ‘wadong’ i thenge mi tipo, “kara wadok dhanu m’uteng’ini i mukero mi dongo man mi pong’ pa Kristu.” (Efe. 4:11-13) Yehova bemiyo iwa bende tipo pare ma leng’ pi nikonyowa wabed ku “paru pa Kristu.” (1 Kor. 2:14-16) M’umedo maeno, egam etelo wi tic mi kiewo Injili ang’wen pi ninyutho iwa kite ma Yesu ubed uparu, uweco man utimo ko lembe kinde m’ebino iwi ng’om. Tek ibelubo lapor pa Yesu, ibitundo i kum lembakeca peri mi doko Jakristu m’uteng’ini. Ento kara watim mediri i thenge mi tipo, wacikara bende nikadhu “kadhiri mi ponji ma kwong’a m’uneno Kristu,” niwacu ponji mir ukungu mi Jukristu. w24.04 mba. 4-5 udu. 11-12

Bekwayere nia wamak yub kubang’ ceng’. Yub moko maku yot, calu ve maku yub iwi gin ma jubicamu kugweno kunoke iwi saa mi vuto. Ento yub mange ma dongo unuti. Giromo mulo kum yotkum mwa, mutoro mwa, wedi mwa kunoke thier mwa. Wabemito yub mwa umii bero iwa man ni juruot mwa. M’usagu zoo ke wabemito ginyay anyong’a i Yehova. (Rum. 12:1, 2) Gin ma pire tek utie nia, pi nimaku yub ma ber, mito ijok lembe m’ukwayu ing’ey. Pirang’o pire tie tek nitimo kumeno? Kepar nia jaratwoyo moko ucidho i bang’ munganga pi twoyo moko ma pek m’ubesende. Nyo mungangane bimiyo kit thieth moko m’umbe nikelar ng’iyo i lembe pa jaratwoyone kunoke m’umbe nipenje ku penji? Copere ngo. In de ibimaku yub ma cuu tek ku kwong’a ilar iparu cuu pi lembe ceke m’ugwaku kum yub m’imito maku. w25.01 mba. 14 udu. 1-3

Wang’eyo lembang’o iwi kisa pa Yehova? Enyutho nenedi nia “ebeyenyo ngo nia ng’atu moko acel de unyothere”? (2 Pet. 3:9) Wakewec iwi kisa m’etimo ni dhanu moko ma gipodho i dubo ma pek. Ubimo Daudi upodho i dubo ma dongo dupa, calu ve timo gier man nek. Ento eloko cwinye uketho Yehova utimo ire kisa. (2 Sam. 12:1-12) Ubimo Manase utimo lembe ma reco dupa, ke i nindo ma pol mi kwo pare. Kadok kumeno de, Yehova utimo ire kisa man eweko ire pilembe eloko cwinye. (2 Kei. 33:9-16) Lapor maeno ubenyutho nia ka Yehova uneno thelembe m’atira, etimo kisa. Ebicero kit dhanu ma kumeno pilembe ginyang’ nia gitimo dubo ma pek man giloko cwinygi. w24.05 mba. 4 udu. 12