Xɔsuzangbe 16 octobre
[Ŋgbelɔn nɔ ao ji abu yí sɔ yi mɔwo o]. Mí ŋgbe kplɔ yi mɔ do o.—Elo. 7:25.
Salomɔ xolɔlɔ lɔ dre enu ci yí ajɔ do Yehowa sɛntɔ ɖekpokpui ji. Étɛnŋ je nuvɔn gangan ɖe mɛ yí le yi goduɔ, ákpɔɛ mɔ enu lɔwo pleŋ jɔ “zeɖeka tɔntɔn.” Alo étɛnŋ nu mɔ: “É jɔ vɔ.” Eyi nɔ ébu tamɛ so enu ci yí jɔ lɔ nuɔ, ákpɔɛ mɔ yeŋtɔ yí ɖe afɔ dɔndɔn ɖewo ciwo yí kplɔ ye do nuvɔn mɛ. Afɔɖeɖe lɔwo tɛnŋ nyi egbɛvwinwo dodo, numu masɔgbewo mumu alo texwe vwinwo yiyi ŋmɛŋmɛ alo to ka ji. Taŋfuin degbedonɔ gbe ɖaɖa o, hlɛnnɔ Bibla, yinɔ bɔbɔwo alo ɖenɔ kunu ŋtɔkpu can o. Shigbe ɖajɛvi ci nuxu woxo le Elododo Wema lɔ mɛ nɛɔ, gbeta dɔndɔn sugbɔwo ci esɔ yí dɔ yí ewa nuvɔn zeɖeka tɔntɔn. Nukplamu ci yí le mɛ nɔ mìɔ? Denyi nuvɔn lɔ ŋtɔ ɖekɛ yí mìashi nɔ o, vɔ egbele veviɖe mɔ mìagbeshi nɔ afɔɖeɖe ciwo yí akplɔ mì yi nuvɔn mɛ. Enu ci pɛɛ Salomɔ wa ci exo nuxu so exolɔlɔ lɔ nu ɖegbɔ nɛ.—Mt. 5:29, 30. w24.07 16 ¶10-11
Zozangbe 17 octobre
Mìɖo dɔkunu cɛ le esuzewo mɛ.—2 Kor. 4:7, nwt.
Nyi yí nyi dɔkunu hunnɔtɔ́ɔ? Fyɔɖuxu ŋɛdu ci yí hwlɛnkɔ agbe nɔ amɛwo yɔ. (2 Kor. 4:1) Nyiwo yí nyi esuze lɔwoɔ? Wole dumɛ nɔ Mawu sɛntɔ ciwo yí drakɔ eŋɛnywi lɔ nɔ mɛbuwo. Le Pɔlu hwenuɔ, afisatɔwo zannɔ esuzewo yí sɔnɔ enuveviwo donɔ mɛ, shigbe ŋɖuɖu, vɛn koɖo eho nɛ. Ahanke Yehowa sɔ ŋɛdu vevi ɖeka do alɔ̀ mɛ nɔ mì ci yí nyi eŋɛnywidradradɔ lɔ nɛ. Le Yehowa kpekpedonu mɛɔ, mìatɛnŋ akpɔ ŋsɛn ci mìʒan keŋ adra eŋɛnywi lɔ le egbejinɔnɔ mɛ. Hweɖewonuɔ, mìtɛnŋ vɔnvɔn nɔ agbetɔ alo avɔnvɔn mɔ amɛwo daɖo eto mì o. Lé mìatɛnŋ aɖu cukaɖa ŋtɔ́ ji doɔ? Mìakpɔ gbedoɖa ci apotruwo wa hwenu wogbe nɔ wo mɔ woŋgbeɖe kunu o. Wodevɔn yí mi kunuɖeɖe o, ewaɖeɔ, wonu nɔ Yehowa mɔ yɛ le kpedo yewo nu nɔ yewoakpɔtɔ anu yi nyɔ koɖo edɔngbegbe. Yehowa ɖo wowo gbedoɖa lɔ ŋci nɔ wo zeɖeka le afɔdumɛ. (Edɔ. 4:18, 29, 31) Nɔ hweɖewonu èvatɔ vɔnvɔn nɔ agbetɔɔ, àbiɔ Yehowa mɔ yɛ le kpedo ye nu nɔ lɔnlɔn ci yeɖo nɔ amɛwo, le ɖu vɔnvɔn nɔ agbetɔ ji. w24.04 16 ¶8-9
Kwɛshilagbe 18 octobre
Mìwo Da ci yí le jeŋkwi mɛ, ao ŋkɔ le mɛ́.—Mt. 6:9, nwt.
Lɔnlɔn ci mìɖo nɔ Yehowa dɔ yí mìkɔnɔ yi ŋkɔ ŋci. Mìji mɔ mìawɛ nɔ yi ŋkɔ lɔ anɔ mɛmiɖe yí anu nɔ mɛbuwo mɔ enyɔdɔndɔn ciwo Satana nu so Yehowa nu nyi ŋsu. (Gɔnm. 3:1-5; Job 2:4; Ʒan 8:44) Le mìwo kunuɖeɖedɔ lɔ mɛɔ, mìji veviɖe mɔ mìahwlɛn ta nɔ mìwo Mawu yí anu nyɔnɔnwi ciwo yí kudo nu nɔ mɛ ciwo pleŋ yí aɖo eto mì. Mìji mɔ amɛshiamɛ lé nya mɔ lɔnlɔn yí nyi yi nɔnɔmɛ gangantɔ yí lé ekpanɔ acɛ do, le jɔjɔɛɖe yí gbesɔgbe yí sabaɖeyɛɔ, yi Fyɔɖuxu lɔ avaɖe efunkpekpewo pleŋ swi yí ahɛn fafa koɖo jijɔ va nɔ agbetɔ xomu lɔ. (Eha. 37:10, 11, 29; 1 Ʒan 4:8) Nɔ mìxokɔ nuxu nɔ amɛwo so mɛ ciŋmɛ Yehowa nyi nu le kunuɖeɖedɔ lɔ mɛɔ, anyi mìkɔkɔ yi ŋkɔ ŋci. Mìgbekpɔnɔ jijɔ ci mìnya mɔ, mìnɔkɔ agbe esɔkɔ koɖo mìwo ŋkɔ lɔ. w24.05 18 ¶12